خەمۆكی دناڤ گەنجێن ئاوارەیێن شنگالێ دا ل كەمپان بەرەف زێدەبوونێ یە
تۆرا لالش:
خەمۆكی ئێك ژ وان نەخۆشیێن دەروونی یە كو مەترسیا خۆ ل سەر مرۆڤی هەیە و ل سەرانسەری جیهانێ رێژەیەكا مەزن تووش دبنێ و ب تایبەت د رەوشا كۆچبەری و ئاوارەبوون و شەران و بارێ خراب یێ ئابووری دا،ئەڤ نەخۆشی یە د نۆكەدا دناڤ ئاوارێن شنگالێ ل ناڤا كەمپان دا ل سنوورێ پارێزگەها دهۆكێ یا بەربەلاڤە و بەرەف زێدەبوونێ یە و بتریا گەنجان تووش بووینە.
ل دۆر بەربەلاڤبوونا خەمۆكیێ دناڤ ئاواران دا،عومەر سەعید وەكو گەنجەك بۆ رۆژناما دەنگێ لالش دیاركر، ژینگەها مرۆڤ تێدا دژیت و بارودۆخێن نەخۆش یێن مرۆڤ د ژیانێ دا ئێك ژ ئەگەرێن سەرەكی یێن پەیدابوونا خەمۆكیێ یە و بەربەلاڤبوونا ئەڤێ نەخۆشیێ،د نۆكەدا دناڤ ئاواران دا خەمۆكی تووشی گەلەكان دبت ب تایبەت تەخا گەنج و قوتابیان و كارتێكرنەكا زۆر ل سەر ڤان هەردوو تەخان هەیە و ب تایبەت قوتابیان،دڤێت بەردەوام مرۆڤ یێ گەشبین بت و باوەریێ بخۆ چێكەت و یێ رەشبین نەبت بەرامبەر كاودانێن ژیانێ داكو ژ نەخۆشیا خەمۆكیێ رزگار بت و ناخ و دەروون د ئارام بن،ب دیتنا من دبینم یە فەرە پەروەردە گرنگیێ ب ڤی بابەتی بدەت و دناڤ قوتابخانان دا ئەڤ بابەتە بێتە بەحسكرن داكو قوتابی مفایی ژێ ببینن و بگەهیننە هەموو جڤاكی.
نوری عیسا،گەنجەكێ ئاوارەیە دەربارەی ڤی بابەتی بۆ رۆژناما دەنگێ لالش دبێژت:گەلەك ئەگەر هەینە وەسان ل مرۆڤی بكن كو خەمۆكی ژێ پەیدابت،دناڤ ئاواران دا دبت هندەك ئەگەرێن جودا ژ ئەگەرێن گشتی هەبن ل هەموو جیان، ئەو ژی دەربازبوونا دەمەكێ زێدە و ژیانەكا ب زەحمەت دناڤ كەمپان دا و نەمانا باوەریێ ب ژیانا خۆ و دووربوونا وان ژجیێن وان و بەلاڤبوونا پۆستێن روودانێن نەخۆش د سۆشیال میدیایێ دا و ڤێ چەندێ ژی باندۆرا خۆ ل سەر خەلكی هەیە كو تووشی نەخۆشیا خەمۆكیێ ببن،ئیرۆ ئەڤ نەخۆشی بەرەف زێدەبوونێ دچت،یا گرنگە خۆلێن چاوانیا سەرەدەریكرنێ دگەل ڤی بابەتی ب بەردەوامی بێنە ڤەكرن و هەر خێزانەكێ ئێك ژێ پشكدار بت داكو بابەتی بگەهیننە مالێن خۆ و باندۆرا مەترسیدار ل سەر وان دروست نەكەت،هەروەسا ئێك ژ ئەگەرێن سەرەكی یێن ئاوارە تووشی خەمۆكیێ كرین ب تایبەت تەخا گەنجان بۆ خرابیا بارێ ئابووری و نەبوونا دەلیڤێن كاری ڤەدگەرت.
هەروەسا سەمیرا شنگالی،كچەكا ئاوارەیە بۆ رۆژناما دەنگێ لالش گۆت:دڤان سالێن داویێ دا رێژەیا خەمۆكیێ دناڤ ئاواران دا د زێدەبوونێ دایە و ئەڤەژی تشتەكێ نەیێ باشە ل سەر دەروون و ژیان و پاشەرۆژا وان، كەسێن تووشی خەمۆكیێ دبن بتریا وان تەخا گەنجانە ب تایبەت یێن ژیێ وان دناڤبەرا(16 تا 20)سالیێ دانە،بێگۆمان پەیدابوونا خەمۆكیێ ژ ڤالاتیێ نەهاتی یە بەلكو بۆ گەلەك ئەگەران دزڤرت ژوان ژی بەلاڤكرنا بابەتێن كوشتنێ و نەخۆشیان دناڤ سۆشیال میدیایێ دا و نەبوونا دەلیڤێن كاری،زێدەباری ژیانا ب زەحمەت یا دناڤ كەمپان دا،هیڤی یا من ئەوە گەنجێن مە ژ هزرێن رەشبین دووربكەڤن و بەرامبەر كاودانێن ژیانێ ب هێز ب سەكنن و دەست ب ژیانەكا گەشبین بكن و خۆ ژ خەمۆكیێ دوور بكن و خزمەتا مال و مللەتێ خۆ بكن.
جڤاكناس نصر مەحمود،سەبارەت ئەگەرێن بەلاڤبوونا خەمۆكیێ بۆ رۆژناما دەنگێ لالش ئاشكەراكر،خەمۆكێ دیاردەیەكا دەروونی یە و هەموو مرۆڤ تووش دبنێ لێ رەنگە ئەو تووشبوون دیاردەیەكا ئاسایی بت، لێ د نۆكەدا دناڤ ئاوارەیان دا ئەڤ چەندە ژ بازنەیێ دیاردەیێ دەربازبوویە،ب شێوەیەكێ مەزن بەربەلاڤ دبت،ئەو دزڤرت ژبۆ چەندین ئەگەرێن گرێدایی ب بارودۆخێ ژیانا وان ڤە ژوان ژی ژبەركو ئەڤە زێدەترە هەفت سالانە خەلك ژیانا خۆ دناڤ كەمپان دا دەرباز دكن،هەروەسا خەلكەكی كەسوكارێن خۆ ژ دەست داینە و تووشی ڤێ نەخۆشیێ بووینە،هەروەسا نەبوونا دەلیڤێن كاری و گەلەك ئەگەرێن دی ژی،دیسان ژ ئەنجامێ ڤێ دیاردا دەروونی گەلەك تشتێن مەترسیدار چێدبن ژوان ژی هزركرن د خۆكوشتنێ دا و تێكدانا ئارامی یا خێزانێ و پەیدابوونا ئاریشان دناڤبەرا ئەندامێن خێزانێ دا،هەروەسا پەیدابوونا ناكۆكیان دگەل خەلكێ دەوروبەر …هتد،گەلەك چارەسەری ژبۆ ڤێ نەخۆشیێ هەینە یا كو دناڤ ئاواران دا بەربەلاڤ ئەو ژی ڤەكرنا خۆلێن تایبەت یێن گرێدایی ب نەساخیێن دەروونی و پەیداكرنا دەرفەتێن كاری و ڤەگەراندنا ئاواران بۆ جه و وارێن وان و ئارامبوونا رەوشا ئێمناهیێ و باشكرنا رەوشا ئابووری و دابینكرنا دەرفەتێن كاری و هتد.
تُتاح هذه الصورة أيضا في: کوردی