بنگەهێ لالش د 29ەمین بیرەوەریا دامەزراندنا خوە دا:
_ ئەم ژ رێیا خوە یا خزمەتكرنا ئێزدیان و گەلێ كورد دەرناكەڤن
_خەمباربووین ب وەغەرا داویێ یا پیر خدر سلێمان و شێخ شامۆ،ئەم سۆزێ ددەن وێ
رێبازا وان بپارێزن
29 سال بسەر دامەزراندنا بنگەهێ لالش یێ رەوشەنبیری و كۆمەلایەتی دەرباز دبن ،ئەڤ بنگەهێ كو ژبۆ كۆمەكا نڤیسكار و ڤەكۆلەرێن گەنج یێن ئێزدیان ژ دەڤەرێن جودا جودا یێن ئێزدیان وەكو خەونەكێ بوو،كو ل 12/5/1993ب پشتەڤانیا سەركردایەتیا كوردستانێ كو دوی دەمی دا تێكوشین ژبۆ رێكوپێككرنا رەوشا گەلێ كوردستانێ پشتی سەرهلدانا ئادارا مێرخاس و وارگەهەكێ ئێمن بۆ گەلێ مە یێ كوردستانێ ئاڤا بكن.
بێ شك ئەم نكارین دەستكەفتیێن كو بنگەهێ مە دخزمەتا چاند و فلكلۆرێ ئێزدیان دا ب دەست خستین رێز بكەین،نە ژی دخزمەتا خەلكێ مە ل دەڤەرێن ئێزدیان و نە قوتابیێن مە یێن هێژا دا،و نكارین بەحسا وان چالاكیێن تایی و نڤیسینگەهێن مە پێ رابووین بكەین بەری و پشتی هێرشا هۆڤانە یا داعش ل سەر شنگالا بریندار.
بەلێ ئەم دكارن بێژین كو بنگەهێ مە هەر دێ مینت وێستگەهەكا گرنگ بۆ هەر ڤەكۆلەرەكێ نافخۆ یان بیانی یێن ل رەسەناتیا ئێزدیان وەكو ئاین و دیرۆك و باوەر و جڤاك دگەرن، و دەرگەهێ بنگەهێ مە هەمبەر هەر كەسەكی كو گرنگیێ ب ڤان مژاران ددەت دێ یێ ڤەكری بت و ئەم ئامادەنە كو دڤی واری دا پشتەڤان بن ب رێیا بەردەستكرنا ئەرشیفێ مە یێ بوویە گەنجینەك ژبۆ هەر كەسێ لێكۆلینێ دكە یان ژی ل بەشەكێ وی دگەرت.
ئەڤ كاودانێن بسەرێ جڤاكێ ئێزدی دا هاتین پشتی كۆمكوژیا بكۆم یا خەلكێ مە ل شنگالێ هێشتا كاریگەریێن خۆ هەنە،و پشتی چەند سالان ژی هێشتا ئارام نەبوویە،و ڤان بوویەران كاریگەریا خۆ ل سەر بنگەهێ مە هەبوویە، مە بزاڤ كرن خۆ دگەل ئاریشێن ل دەڤەرێ پەیدابووین ب گونجینین و ب هەموو هێز و شیانێن خۆ كار بكەین بۆ خزمەتكرنا خەلكێ خۆ ل شنگالێ ب تایبەتی و دەڤەرێن دی یێن ئێزدیان یێن زیاندار.
و ل سەر بوویەرێن ڤێ داویێ ل شنگالێ، دوپات دكەین كو ئەم پشتەڤانن و ل كێلەكا خەلكێ خۆ یێ شنگالێ دانە ،ب رێیا داخوازیێن وان بۆ دوورخستنا گرۆپێن چەكدار ژ دەڤەرێن ئاكنجیبوونێ، و بادەكا ئێمناهیێ دڤێ قۆناغێ دا د دەستێ سوپایێ عێراقێ وپۆلیسێن نافخۆ بەرپرسیارەتیا ئێمناهیێ ل ناڤا شنگال و كۆمەلگەه و گوند و دەوروبەرێن وێ وەرگرن.
ئەم تەكەز دكەین داوی رێیا چارەسەركرنا كێشەیا شنگالێ ب جهئینانا رێككەفتنا دناڤبەرا حكومەتا بەغدا وهەولێر دایە ب چاڤدێریا وەلاتێن هەڤدۆست و هەڤپەیمانیا نێڤ دەولەتی دا،دڤێت گرۆپێن چەكدارێن یێن نە شەرعی ژ دەرڤە هاتین دەركەڤن،چنكو هەبوونا وان مەترسی یە ل سەر ئێمناهی و ئارامیا شنگالێ و رێگرتنە ل ڤەگەریانا خەلكێ شنگالێ بۆ دەڤەرێن خۆ ،چنكو ژیانا ئاوارەیێ یا تەعل و پەریشانە.
ژلایەكێ دی ڤە ئاماژێ دكن كو بنگەهێ مە دوو كەسایەتیێن مەزن دماوێ چەند هەیڤێن بۆری دا ژ دەستدان ئەو ژی مامۆستا ورۆناكبیر پیر خدر سلێمان،هەروەسا كەسایەتیێ بەرنیاس شێخ شامۆ شێخۆ بوو،ئەم گەلەك ب وەغەرا وان ئیشیان وئەڤ بوویەرا دلتەزین نە ب تنێ زیانەك بوو بۆ كەسوكار یان بنگەهی و هەڤالێن وان بەلكو خوسارەتەكا مەزن بوو بۆ تەڤایا جڤاكا ئێزدیان،لێ ئەم سۆزێ ددەن كار و خەباتا وان یا تەڤایا ژیێ خۆ بۆ خزمەتكرنا بنگەهێ لالش و جڤاكا ئێزدی تەرخانكرین ژبیر نەكەین.
هەروەسا ئەم تەكەز دكەین كو بنگەهێ مە ژ رێیا خوە یا خزمەتكرنا ئێزدیان و گەلێ كورد دەرناكەڤت و لالش دێ مینت كانیەكا زەلال دهورتە درۆبارێ رەوشەنبیریا كوردی دا.
دەستەیا بلندا بنگەهێ لالش یێ رەوشەنبیری و كۆمەلایەتی/دهۆك
13ى ئهيارا 2022
تُتاح هذه الصورة أيضا في: کوردی