مامۆستایەكێ زانكۆیێ:چارەسەریا بنگەهین ڤەگەراندنا شنگالێ بۆ سەر هەرێما كوردستانێ یە
تۆرا لالش:
مامۆستایەكێ زانكۆیێ دیاركر كو هەڤركیێن ل شنگال سیاسی نە و پێتڤیە خەلكێ شنگال ب هەموو پێكهاتێن خۆڤە دگەل هەڤ كۆم ببن و گوهـ بدەنە داخوازیێن ئێك،چنكو هەڤركیێن سیاسی كارتێكرنەكا نێگەتیڤ ل سەر خەلكێ دەڤەرێ كریە،لەورا دڤێت شنگالی چارەنڤیسێ خۆ دیاربكەن و چارەسەریا بنگەهین ڤەگەراندنا شنگالێ بۆ سەر هەرێما كوردستانێ ڤەیە.
محەمەد تەتەرخان،مامۆستایێ زانكۆیا دهۆكێ بۆ دەنگێ لالش گۆت:هەڤركی و كێشەیێن ل شنگال هەر ژ دامەزراندنا دەولەتا عێراقێ و حكومەتێن ئێك ل دووڤ ئێكێ یێن عێراقێ هەولداینە دەڤەرا شنگال ژ كوردستانێ ڤەقەتینن،ئەو ژی رابوون ب ئینانا هۆزێن عەرەبان بۆ سنوورێ دەڤەرێ و دروستكرنا پشتینەكا عەرەبێن سوننە مەزهەب، نۆكە ژی شنگال و خەلكێ وێ ل سەر هێزێن سیاسی و سەربازی یێن ناڤخۆی و هەرێمی دا دابەش بووینە ئەڤ ژی دبتە دەرگەهـ ئاستێ هەڤركیێن ل شنگال گەلەك ئالۆز ببت.
هەمان مامۆستایێ زانكۆیێ گۆت:ل هەر دەڤەرەكا هەڤركی و ئالۆزی لێ هەبن، ئەو دەڤەر دێ بتە ئارمانجا هێز و دەولەتێن هەرێمی و نێڤ دەولەتی ئەڤ جۆرێ سیاسەتێ بوویە عورف دناڤ سیاسەتا رۆژهەلاتا ناڤین دا، ب تایبەتی ل دەڤەرا شنگالێ هەبوونا حەشدا شەعبی یا نێزیك ئیرانێ و بۆمبەبارانكرنا فرۆكەیێن توركیا و پرچەككرنا سوننە و شیعەیێن دەڤەرێ هەموو نیشانێن هەبوونا ئەجندا و پیلان و پرۆژێن جیاوازن ژلایێ هێزێن هەرێمی و نێڤ دەولەتی ڤە،لەورا ب دیتنا من ئەڤا چێدبت نە ئەگەرێ ئاریشایە بەلكو دەرئەنجامێ ئاریشایە،بەلكو ئەگەر ئەوە د بنیات دە چ دەولەتێن رۆژهەلاتا ناڤین باوەری ب سنوورێن نۆكە هەی نینن.
ل دۆر چارەسەركرنا هەڤركیێن شنگال،مامۆستایێ زانكۆیێ وەسا گۆت:ب دیتنا من ئەگەرێ سەرەكی كو هێزێن ل شنگال نكارن بگەهنە چ رێككەفتنا ئەوە،ئەو هێزە هەموو ب ئیرادا خۆ كار ناكن بەلكو ژ بۆ ئیرادا هێزێن ژ خۆ مەزنتر كار دكن،هەروەسا چارەسەریا بنگەهین ئەوە ڤەگەراندنا شنگال بۆ سەر كوردستانێ ڤەیە،دیسان ژی ب تنێ چارەسەریا هەڤركیێن ل شنگال سیاسی یە ئانكو دڤێت بالانسا بەرژەوەندیا وان هێزان بێتە دانین و یەك ژ چارەسەریێن دی ژی خەلكێ شنگال ب هەموو پێكهاتێن خۆڤە دگەل هەڤ كۆم ببن و گوهـ بدەنە داخوازیێن ئێك،چنكو هەڤركیێن سیاسی كارتێكرنەكا نێگەتیڤ ل سەر خەلكێ دەڤەرێ كریە،لەورا دڤێت شنگالی چارەنڤیسێ خۆ دیاربكەن.
تُتاح هذه الصورة أيضا في: کوردی