سەرپەرشتێ لژنا كەمپان:داخوازێ ل جیێن پەیوەندیدار دكەین ل هانا ئاوارەیێن شنگال بهێن
تۆرا لالش:
لیژنا سەرپەرشتا كەمپان ل لقا 17 یا پارتی دیموكراتی كوردستان ل شنگالێ ڕێدایە كو بتریا خیڤەتان ل كەمپان بۆ بلۆكان بێنە گهۆرین،هەروەسا دگەل هاتنا وەرزێ زڤستانێ داخوازێ ل جیێن پەیوەندیدار دكەت كو ب هانا ئاوارەیێن شنگالێ ل كەمپاندا بهێن و دەستێ هاریكاریێ بۆ درێژ بكەن.
ئیدریس زۆزانی،سەرپەرشتێ كەمپان ل لقا 17 یا پارتی دیموكراتی كوردستان ل شنگالێ بۆ دەنگێ لالش گۆت:وەك لیژنا سەرپەرشتا كەمپان ڕێدایە كو بتریا خیڤەتان ل كەمپان بۆ بلۆكان بێنە گهۆرین،هەر دیسان رێژەیەكا خەلكی پێ چێنەبوویە خیڤەتێن خۆ بكەنە بلۆك و هەر ماینە خیڤەت لێ ل هەردوو جیان ژی دێ ژیارا وان یا ب زحمەت بت،پێشبینی دئێتە كرن زڤستانا ئیسالە یا دژوار بت،لەوما هەموو بزاڤێن خۆ داینە كاری و پەیوەندی ب دام و دەزگەهێن پەیوەندیدار و رێڤەبەریا كۆچ و كۆچبەران و بەرسڤدانا قەیرانان ل دهۆكێ كریە كو بتر گوهێ خۆ بدەنە خەلكێ مە،هەروەسا هاوارا خۆ گەهاندیە پارێزگەها مووسلێ ژی كو د هانا خەلكێ مە بین بەری زڤستان ب دروستی دەست پێ بكەت،ژبەركو د ڤی دەمی دا خەلكێ مە زۆر پێتڤی ب كەلوپەلێن خوارن و ڤەخوارنێ و سوتەمەنیێ نە،ئەم ب هیڤی بوون كو حكومەتا ناڤەندی تشتەكی بۆ خەلكێ مە بكەت لێ ب مخابنی ڤە هەتا نۆكە خۆ بێ دەنگ كریە.
ژبال خۆڤە رێڤەبەرێ رێڤەبەریا كۆچ و كۆچبەران ل دهۆكێ پیر دەیان جەعفەر،بۆ دەنگێ لالش دیاركر،پشتی بریار هاتیەدان ل دەستپێكا هەیڤا 11 دەست ب بەلاڤكرنا گازا سپی بێتە كرن دناڤا كەمپان دا،ب نڤیسارەكا رێڤەبەریا مە كو بوویە چەندین سال گازا سپی ل سەر ئاوارێن دەرڤەی كەمپان نەهاتیە بەلاڤكرن،بریارە ئیسالە ئەو ژی وەرگرن،بێگۆمان دەما وەرزێ زڤستانێ دئێت خیڤەت پێتڤی ب گهۆرینێ نە لەوما نۆكە ل كەمپا شێخان پرۆسەیا گهۆرینا خیڤەتان هاتیە كرن و بزاڤان دكەین هاریكاریەكێ بگەهینە وان مالێن دشیان دا نەبن خیڤەتێن خۆ بكەنە بلۆك و دۆشەك و بەتانیان ژی ل سەر خێزانێن دەست كورت بەلاڤ بكەین.
دگەل هاتنا وەرزێ زڤستانێ هێشتا ب هەزاران ئاوارەیێن شنگالێ دناڤا كەمپان و كاڤلاندا ژیانا خۆ دبۆرینن و چاڤەرێ وەرگرتنا هاریكاریان دكەن،داكو خۆ ژ سەرمایا زڤستانێ بپارێزن.
تُتاح هذه الصورة أيضا في: کوردی
