ههتا نۆكه نێزيكى 800 ھەزار ئاوارەيێن عێراقێ ل ھەرێما کوردستانێ دژین
بەغدا-KDP.info-
سەرۆکی لیژنەی کۆچ و کۆچبەران لەپەرلەمانی عێراق گوتی، ئەمڕۆ ڕۆژی جیھانی پەنابەرانە لە جیھان، بەڵام بەداخەوە حکوومەتی عێراق ھیچ بەرنامەیەکی نیە بۆ گەڕانەوەی ئاوارەکان و تائێستا نزیکەی 800 ھەزار ئاوارەی عێراق لە ھەرێمی کوردستان دەژین و حکوومەتی ھەرێم بەھاوکاری ھەندێک رێکخراوی جیھانی ھاوکاریان دەکات و حکوومەتی عێراقیش وەکو پێویست ھاوکاریان ناکات.
شەریف سلێمان، سەرۆکی لیژنەی کۆچ و کۆچبەران لە پەرلەمانی عێراق، بۆ ماڵپەڕی فەرمیی پارتی دیموکراتی کوردستان گوتی: “ئەم ڕۆژە لەسەرجەم ئاوارە و پەنابەران پیرۆز دەکەین و ھیوادارین ئەمە ببێتە کۆتایی بە ناخۆشی و نەھامەتیەکانیان و بگەڕێنەوە بۆ سەر ماڵ و حاڵی خۆیان، چونکە تا ئێستا نزیکەی 800 ھەزار ئاوارە لە ھەرێمی کوردستان ھەن و 28 کەمپی لێیە و تەنھا لەدھۆک 300 ھەزار ئاوارە ھەیە، بەڵام بەداخەوە حکوومەتی عێراق ھیچ بەرنامەیەکی بۆ گەڕاندنەوەی ئاوارەکان دانەناوە و ئەو رێککەوتنەی لەکاتی پێکھێنانی حکوومەتیش لەگەڵ ھاوپەیمانی ئیدارەی دەوڵەت کراوە ئەویش جێبەجێ نەکراوە و وەکو پێویستیش ھاوکاریان نەکراوە، ھاوکات خەڵکیش زۆر بەکەمی دەگەڕێتەوە لەماوەی رابردووش 400 خێزان گەڕاونەتەوە شنگال ئەگەرنا خەڵک ئامادەنییە بەو جۆرە بێ ھاوکاری و قەرەبووکردنەوە بگەڕێنەوە بۆ سەر ماڵ و حاڵی خۆیان و کەمپەکانیان پێ باشترە”.
شەریف سلێمان گوتیشی: “ئەوەی تا ئێستا ھاوکاری ئاوارەکان دەکات حکوومەتی ھەرێمی کوردستان و ھەندێک رێکخراون، کە بوونەتە ئەرکێکی قورس بەسەر ھەرێمی کوردستانەوە و پێویستە حکوومەتی عێراق بەئەرکی خۆی ھەڵسێت و بەرنامەیەک دابنرێت بۆ ئەوەی بگەڕێنەوە، چونکە ماوەی نۆ ساڵە لەکەمپ دەژین”.
سلێمان ڕوونیشیکردەوە: “لەسەرەتای شەڕی داعش ئاوارەیەکی یەکجار زۆر ڕووی لە ھەرێمی کوردستان کرد کە ژمارەیان لە دوو ملیۆن کەس تێپەڕی کرد، بەڵام بەشێکی زۆری گەڕانەوە و ئێستاش نزیکەی 800 ھەزار کەس ھەر ماون کە ئەوەش ژمارەیەکی زۆرە و کاتی ئەوە ھاتووە کۆتایی بە نەھامەتی و ناخۆشیان بێت و بیانگەڕێننەوە بۆ سەر ماڵەکانیان”.
تُتاح هذه الصورة أيضا في: کوردی