باژێرهك رادارا دهنگى بۆ سزادانا ترۆمبێلێن دهنگێن بلند ژێ دهردكهڤن ددانيت
گاڤ نيوز
د دهمهكێ دا رادار ل سهرانسهرى جيهانێ بۆ دهستنيشانكرنا سهرپێچيێن لهزاتيا هاژۆتنا ترۆمبێلان دهێنه دانان، لێ باژێرهكێ جيهانێ دانانا رادارێن تايبهت ب دهستنيشانكرنا دهنگێن بلند تێست دكهت.
ل پاريس پايتهختێ فرهنسا ئێكهمين رادار هاته دانان كو وێنهيهكێ بۆ ژمارهيا وان ترۆمبێلان دگريت يێن كو دهنگێن بلند ژێ دهردكهڤن و رهنگه شۆفێرێن سهرپێچيكهر ب 130 يۆرۆيان بهێنه غهرامهكرن.
ئهڤ راداره بۆ پشتراستبوونێ ژ كاريگهريا وێ وهك تێست بۆ ماوهيێ سێ ههيڤان هاتيه دانان و ئهگهر شيا ژمارهيێن وان ترۆمبێل و ماتۆرێن راددهيێ دهنگى دبهزينن، دهستنيشان بكهت، ل بهره ل گهل دويماهيا سالا 2022 ئهڤ سيستهمه بهێته بجهئينان و ل بوهارا 2023 شۆفێرێن سهرپێچيكهر بهێنه سزادان.
ل گۆرهى بهرپرسێن پاريسێ؛ ئارمانج ژ ڤێ پێنگاڤێ ئهوه كو سنوورهك بۆ دهنگێن بلند ل باژێرى بهێته دانان كو كارتێكرنێن دهروونى، ساخلهمى و مێشكى ل سهر وهلاتيان پهيدا دكهن.
ديار ژى دكهن: دهنگێن بلند نه ب تنێ دبنه ئهگهرێ نيگهرانيێ و تێكچوونا نڤستنێ، بهلكو دبنه ئهگهرێ ژدهستدانا ههستێ گوهلێبوونێ، ئێشانێن گوهان و ئاريشهيێن دلى ژى.
ل گۆرهى رێكخستيا ساخلهميێ يا جيهانى؛ 113 مليۆن كهس ل سهرانسهرى ئهورۆپا ژ كارتێكرنا دهنگێن بلند دنالن.
ئاژانسا ژينگههێ يا ئهورۆپى ژى ديار دكهت؛ ههر كهسهك ژ پێنج كهسان، تووشى راددهيێن زيانگههينهر يێن دهنگى دبن.
ئالاڤێن هاتنوچوونێ وهكى ترۆمبێل، ماتۆر، هێلێن شهمهندهفران و فرۆكه ب ژێدهرێن سهرهكى يێن دهنگێن بلند دهێنه هژمارتن.
تُتاح هذه الصورة أيضا في: کوردی