هۆنەرمەند قاسم سمۆقی:شنگال بنیاتا سترانا كوردی یە
تۆرا لالش یا راگەهاندنێ
هۆنەرمەندێ دەڤەرا شنگالێ”قاسم سمۆقی”ئاوارەی كۆمەلگەها شاریا بوویە و لێ ئاكنجی یە و دیدارەكێ دا بۆ رۆژنامەیا دەنگێ لالش دیاركر،نۆكە هەولا دروستكرنا دوو كلیپێن دی دكەم كو دەربرینێ ژ بارودۆخێ نۆكە یێ كوردێن ئێزدی دكت،ئاماژەكر كو ل دەمێ رێكخراوا تیرۆرستیا داعش دەست ب سەر شنگال دا گرتی ئەو سترانێن وی نڤیسین نەهێلا دەستێ وان بگەهتێ و ژناڤ ببەن،گۆتژی شنگال بنیاتا سترانا كوردی یە.
ل دۆر دەستپێكا كارێ خۆ یێ هۆنەری و بەرهەمێن داهاتی هۆنەرمەند”قاسم سمۆقی” دیاركر:”دەمێ هاتیمە د مەیدانا هۆنەرێ سترانگۆتنێ دا،ل سالا 2003ێ داوەت من گێراینە و بتنێ ل سالا2010ێ ژبەركو برایەكێ من وەغەركر من ستران نەگۆتن و من جۆتیاری ژی دكر،لێ كارێ سەرەكی هۆنەرێ سترانگۆتنێ بوو ،هەروەسا هەتا نۆكە دووئەلبووم من چێكرینە،دیسان پشتی سێ سالان ژ فێربوونێ ل سالا 2008ێ من ئامیرێ موزیكی ساز كریە وب هاریكاریا هەڤالان فێربوویمە و بتنێ وێ دزانم بژەنم ،ژبلی وی ئامیرەی گەلەك حەژ بلۆرێ دكەم ،پشتی كارەساتا شنگالێ ل 3/8/2014ێ بۆ ئێكەم جار من دوو كلیپ ل سەر شنگالێ دروستكرن و نۆكە هەولا دروستكرنا دوو كلیپێن دی دكەم كو ئەوژی دەربرینێ ژ بارودۆخێ نۆكە یێ كوردێن ئێزدی تێدا دەربازدبن دكت و ژ پەیڤ و ئاوازێن هۆزانڤان(ئەدریس سەرحۆكی)نە،هەرچەندە بارێ دارایی یێ من وەكی هەر كەسەكێ شنگالێ پشتی كارەساتێ ژناڤچۆ ،لێ ب هەر رەنگەكێ بت دێ دروستكەم”.
دەربارەی دكیۆمێنتكرنا سترانێن شنگالێ “سمۆقی” گۆت:”ل سالا 2014ێ من دەست ب كۆمكرن و نڤیسینا سترانێن هۆنەرمەندێن شنگالێ كریە و ب هیڤیا دئایندە دا ب بتە پەرتۆك و ل زانكۆیێن كوردستانێ ل پشكێن موزیكی بێتە خووندن،ژبەركو شنگال بنیاتا سترانا كوردیە و ژوان سترانێن دكیۆمێنتكری یێن هۆنەرمەند(برهویێ شەرقی،خدر فەقیر،عیدۆیێ كوتی، قاسمێ مەیریێ) نە و دگەل سترانێن خۆ ،ل دەمێ رێكخراوا تیرۆرستیا داعش دەست سەر شنگال دا گرتی ئەو سترانێن من نڤیسین وەكی بلبیلە چاڤێ خۆ من پاراستن و من نەهێلا دەستێ وان بگەهتێ و ژناڤ ببەن”.
سەبارەت رۆلێ هونەرمەندێن كورد دكارەساتا شنگالێ دا”قاسم سمۆقی”دبێژت:”پشتی كارەسات ب سەرێ مەهاتی هۆنەمەندێن كوردستانێ ب چێكرنا چەندین كلیپان و دگەل دروستكرنا سەمفونیا (شنگال)شیان دەربرینێ ژ بارودۆخێ نۆكە یێ شنگال تێرا دەربازدبت بكن،لێ مەدڤیا سترانبێژەكە دەڤەرا مە پشكداری دسەمفونیایێ دا كربا،ژبەركو ئەم ڤێ چەندێ ب مافێ خۆ دزانین”.
هۆنەرمەندێ دەڤەرا شنگالێ خواست حكوومەتا هەرێما كوردستانێ لقەكێ سەندیكایا هۆنەرمەندان دگەل ستۆدیویەكێ ل شنگال ڤەكن،ژ پێخەمەت هۆنەرمەندێن مە بكارن ب شێوەیەكێ ئەكتیڤ كارێ خۆبكن.
ناڤبری ل سالا 1978ێ ل كۆمەلگەها دوگرێ ل قەزا شنگالێ ژدایك بوویە،پشتی كارەساتا ب سەر شنگالێ دا هاتی هەتا نۆكە ل سەر كارێ خۆ یێ هۆنەری بەردەوامە و نۆكە ل كۆمەلگەها شاریا ئاكنجی یە.
تُتاح هذه الصورة أيضا في: کوردی
