فلمێ(شنگال 74)ب داوی هات و دێ ل ڤیستەڤالێن جیهانی ئێتە نمایشكرن
تۆرا لالش یا راگەهاندنێ
فلمێ(شنگال 74) لسەر زۆرداریا بسەرێ مللەتێ ئێزدی ل كۆمكۆژیا شنگالێ دا هاتی ب شێوەیەكی پرۆفێشینال و رێك و پێك هاتیە چێكرن ،نهۆ ب داوی هاتیە و دێ ل ڤیستەڤالێن جیهانی ئێتە نمایشكرن.
(عادل شنگالی) قارەمانێ سەرەكی یێ فلمی یە بۆ رۆژناما دەنگێ لالش دیاركر،پشتی فلمەك ل هەرێما كوردستانێ دژی جڤاكا ئێزدی و چاوانیا پێشوازیكرنا رزگاربوویێن خۆ ژ دەستێ داعشێ هاتیە چێكرن و ل گەلەك جیێن ژدەرڤە و ناڤخۆ هاتیە نمایشكرن،مە بریاردا فلمەكی چێكن راستیا جڤاكا مە یا ئێزدیا دیاربكت و زۆرداریا ل مللەتێ ئێزدی بووی ل كۆمكۆژیا شنگالێ ل(3/8/2014)ێ بینتە بەرچاڤ ئەو بوو كو من چیرۆكا فلمەكی نڤیسی و مە چەندین كەسان خۆ ب هەڤ گرت ژ ئەمریكا و بریتانیا ژی دگەل مە بوون، هەتا كاری ئەم ڤی فلمی چێكن و وێنە بكن كو ژ ئەكتەریا هەفت كەسان بوویە چار ژ وان ژی د ئەمریكی بوون،وێنەگر و مۆنتاژ ژی دوو كەسێن ئەمریكی بوون و ژ ستایل و مكیاژكرنا كچەكا بریتانی بوویە، هەروەسا ئەڤ فلمە ل پەرستگەها لالش و گوندێ بۆزا و بەنداڤا مووسل هاتیە وێنەكرن و هندەك كۆمپانیێن ئەمریكی یێن زانا و بناڤ و دەنگ رابووینە ب مونتاژكرنێ، دیسان مە لبەرە ڤی فلمی ل ڤیستەڤالا ئەمریكا یا فلمان كو ل هەیڤا هەشت دێ دەست پێ كت نمایش بكن و بریارە ل ڤیستەڤالا دهۆكی ل هەیڤا نەه و ل چەندین وەلاتێن ئەورۆپا ژی بێتە نمایشكرن.
شنگالی ئەو چەندە ژی ئاشكەراكر،ل كۆمكۆژیا ئێزدیان ل شنگال كەسەك ب هاوارە مللەتێ ئێزدی ڤە نەهات و هاریكاریا وان نەكر،هنگی چ بسەرێ وان دا هات مە ئەو یەك ژی تێدا خویاكریە و ئەمریكا ژی تێدا هاتیە شەرمەزاركرن،ژبەركو ل وی دەمی وان ژی وەكو نەتەوەیێن ئێكگرتی ئەركێ خۆ ب جه نە ئینایە.
ژلایەكی دی ڤە خویاكر،چ كەسی ژئالیێ ماددی ڤە پشتەڤان نەبوویە و هاریكاری نەكریە،بەلێ ب رێز و سوپاسی ڤە سەرۆكێ دەستەیا بلندا بنگەهێ لالش بەرێز(شێخ شامۆ)رابوویە ب پارێزگەریێ ژبۆ دیمەنكرنا ڤی فلمی و دابینكرنا ترۆمبێل و كەلوپەلێن سەربازی.
ل داویێ گۆت:هندەك كەسان دڤیا مە شەرمەزار بكن و دگۆتن وان دەست ژ فلمێ خۆ بەردایە،لێ ب رێیا رۆژنامێ دبێژم مە دەست ژێ بەرنەدایە و ئەم دێ دبەردەوام بن.
تُتاح هذه الصورة أيضا في: کوردی