هۆنەرمەندێ ناڤدارێ دەڤەرا شنگالێ(قاسمێ خدرێ چەلۆ)
رائد غانم
ئاشقێ كلتۆرێ باب و باپیرا خەمخۆرێ پەیڤا رەسەن و سترانا دیرۆكا مللەتێ خۆ، و دەنگخۆشێ هەردەم شێفخۆشكێن ئاشق و ئەڤیندارا ب رەوش دكرن گولچیچەكێ جڤات و دیوانا خەملا چیایێ فەقیرا و جدالا رەنگین سۆزدارێ پاراستنا فلكلۆرێ كوردی ل كەلها عەگید و جوامێرا شنگالا خۆراگر.
سترانبێژ قاسمێ خدرێ چەلۆ ل گوندێ سمێ هێسترێ هاتیە دونیایێ سالا ژ دایكبوونا خۆ ندزانی لێ دگۆت وەختێ بەرفا سۆر باری ئەز خۆرت بووم،ل تەمەنێ(25)سالی دا ستران گۆتینە و پشتی باركرینە گوندێ جدالێ لسەر دەستێ سترانبێژێ ناڤدار برۆیێ شەرقی فێری گۆتنا سترانێ بوویە.
هەموو جۆرێن سترانێ گۆتینە ب تایبەت سترانێن ئەڤینی هەروەسان سترانێن غەریبیێ و شەرا گۆتینە ژ وان سترانا ئەوژی(سەفەرا خالتا،گەورێ،سەیدخانێ كەڕ) و گەلەكێن دن قاسمێ خدرێ چەلۆ ل سالا(1922)ێ ل گوندێ كەرسێ ژیانا هەڤژینیێ پێكئینایە، و ناڤهاتی ستران دگەل زۆربەیا سترانبێژێن دەڤەرا شنگالێ رە گۆتیە، ب تایبەتی دگەل خودێ ژێ رازی كچێ عەمێ و قاسویێ بشار و بەركاتێ حەلیقی.
قاسمێ خدرێ چەلو ستران ل كۆچك و دیوانا دا گۆتینە،گەلەك جارا كورێ وی سەیدۆ دگۆت من دگۆتە بابێ خۆ سترانێن ئەڤینیێ نەبێژە شەرمە لێ وی دگۆت ئەزدێ بێژم،چنكو پشكەكن ژ فلكلۆرێ مللەتێ مە و من ژ دەڤێ جوامێرا وەرگرتینە،پشتی ژیانەكا تژی هەژاری و بەلەنگازی دەرباز كری ل سالا(1977)ێ پشتی راكرنا گوندان ژلایێ رژێمێ ڤە دلێ وی ژ لێدان دكەڤت و دچتە بەر دلۆڤانیا خودێ مەزن و ل گۆرستانا شێخ مەند ل چیایێ شنگالێ دئێتە ڤەشارتن.
تُتاح هذه الصورة أيضا في: کوردی