شاندێ جڤاتا رێفراندۆمێ بۆ بەغدا دێ دگەل بارزانی کۆم بیت
WAAR-دهۆک:
شاندا جڤاتا بلندا رێفڕاندۆمێ بۆ بەغدا ئەڤرۆ ئێڤاری دێ ب سەرپەرشتییا سەرۆکێ ھەرێما کوردستانێ کۆمبیت و ژڤانێ سەرەدانا بەغدا دیار کەت.
شاندا جڤاتا رێفراندۆمێ بۆ بەغدا، ئەڤرۆ ل دیوانا سەرۆکاتییا ھەرێما کوردستانێ سێیەم کۆمبوونا خوە ب سەرپەرشتییا د. رۆژ نووری شاوەیس کر و گۆتوبێژا تەوەرێن و ئەجیندایێن سەرەدانا چاڤەڕێکری یا بەغدا کرن.
ئەرشەد شوان پەیامنێرێ وار ل ھەولێرێ راگەھاند؛ ئەڤرۆ ئێڤاری ژی ژبۆ داوی بڕیار و دیارکرنا ژڤان و کارنامەیا سەرەدانا بەغدا، شاندی جڤاتا بلندا رێفراندۆمێ دێ دگەل مەسعوود بارزانی سەرۆکێ ھەرێما کوردستانێ کۆمبیت.
شاندێ جڤاتا بلندا رێفراندۆمێ ل بەرە د سەرەدانا چاڤەڕێکرییا بەغدایێ دا، ژبلی کۆمبوونا دگەل بەرپرسێن ئیراقی، دگەل ھەر یەک ژ ئالیێن سیاسی و بالیۆزێن وەلاتێن بیانی ژی کۆمببیت.
ل گۆری زانیاریێن وار، شاندێ جڤاتا بلندا رێفراندۆمێ ل ڤان دو رۆژان دێ سەرا بەغدایێ دەت و بەرپرسێن ئیراقی ب فەرمی ھایدار کەت کو ھەرێما کوردستانێ دێ ل بیست و پێنجی ئیلۆنا ئەڤسالە رێفراندۆمێ بۆ سەرخوەبوونێ کەت.
شاندا ھەرێمێ بۆ بەغدا ھەر یەک ژ د. رۆژ نووری شاوەیس ئەندامێ مەکتەبا سیاسییا پارتی، سەعدی ئەحمەد پیرە، ئەندامێ مەکتەبا سیاسییا ئێکەتیێ، ھەروەسا محەمەد ئەحمەد سەرۆکێ ئەنجوومەنا سیاسییا یەکگرتوویا ئیسلامی ل سلێمانیێ و ڤیان دەخیل نوونەرا کوردێن ئێزدی، رۆمیۆ ھەکاری نوونەرێ کرێستیانان و ھەروەسا ماجد بازرگان نوونەرێ تورکومانان ب خوەڤە دگریت.
تُتاح هذه الصورة أيضا في: کوردی