نێچیرڤان بارزانی و عەبادی جارهكا دی كۆم دبن
K24 – ھەولێر
بۆ تاوتوێكردنی چارەسەری كێشەكانی نێوان ھەولێر و بەغدا، جارێكی دیكە نێچیرڤان بارزانی، سەرۆكی حكومەتی ھەرێمی كوردستان و حەیدەر عەبادی، سەرۆك وەزیرانی عێراق، ئەمجارە لە داڤۆس كۆدەبنەوە.
دوای گەڕانەوەی لە تاران، نێچیرڤان بارزانی، سەرۆكی حكومەتی ھەرێمی كوردستان، لە كۆنگرەیەكی رۆژنامەوانیدا ئاشكرای كرد، وەك ھەرێمی كوردستان بەشداری لە كۆڕبەندی ئابووری جیھان لە داڤۆس دەكەن و لە چوارچێوەی بەشداری كردنیش لەو كۆڕبەندە، چەند دیدارێكی گرنگیان دەبێت لەوانە، لەگەڵ حەیدەر عەبادی، سەرۆك وەزیرانی عێراق و عەبدولجەبار لعێبی، وەزیری نەوتی عێراق کۆدەبنەوە.
کۆڕبەندی ئابووری جیهانی داڤۆس، كە ئەمڕۆ دەست پێدەکات و تا 26 ئەم مانگە بەردەوام دەبێت. لە 70 وڵاتەوە سەرۆك و سەرۆك وەزیران و کەسایەتی دیار و بازرگان و خاوەن كاران روو لە سویسرا دەکەن و لەماوەی 3 رۆژدا دەرفەت و ئاستەنگەکانی بەردەم ئابووری جیھان تاوتوێ دەکەن.
ئەمە لەكاتێكدایە لە 20/1/2018، نێچیرڤان بارزانی و حەیدەر عەبادی، لە بەغدا لەبارەی كێشەكانی ھەولێر و بەغدا گفتوگۆیان كرد، رۆژی دواتریش شاندی ھەرێمی كوردستان بە سەرۆكایەتی نێچیرڤان بارزانی، گەشتە تاران و لەگەڵ سەرۆك كۆمار و سەرۆكی پەرلەمان و ژمارەیەك بەرپرسی دیكەی ئێران كۆبوونەوە.
تُتاح هذه الصورة أيضا في: کوردی