بەغدا دەروازيهكى ناڤبهرا كوردستانێ و ناڤەراستا عێراقێ داخست
وشه:
بەهۆی زۆریی ڕووداوەكانی كوشتن و چەندان حاڵەتی تری تاوان دەروازەی بازرگانی “سەفرە” لە نێوان هەرێمی كوردستان و بەغدا داخرا و بەرپرسێكی حكوومەتی عێراقیش لە پارێزگای دیالە ڕای گەیاند، لێكۆڵینەوە لەو تاوانانە دەكرێ كە لەو سنوورەدا كراون.
ئەمڕۆ پێنجشەم هەشتی ئادار/ مارس، ژمارەیەك لە شۆفێرانی ڕێی نێوان هەرێم و بەغدا بە “وشە”یان ڕاگەیاند، كاری بازرگانی و بردنی كەلوپەل لە دەروازەی “سەفرە”ی نێوان كەركووك و بەغدا لەمڕۆوە راگیراوە.
ئەیاد حەسەن یەكێك لە شۆفێرانی بارهەڵگری ئەو ڕێیە بە “وشە”ی ڕاگەیاند، هێزێكی تەناهیی سوات گەیشتوونەتە دەروازەكە و دەستیان بە لێكۆڵینەوە كردووە لە هۆكارەكانی كوشتن و حاڵەتەكانی تری تاوان.
بە قسەی ئەو شۆفێرە بێت، ئێستە دەیان ئۆتۆمبێل لەو ڕٍێیە ماونەتەوە و گیریان خواردووە.
دەروازەی بازرگانی “سەفرە” لە نێوان شارۆكەی خورماتوو و شارۆكەی خاڵسە كە حكوومەتی عێراق بە دەروازەی بازرگانیی نێوان هەرێم و بەغدای ناو دەبات و خاڵی گومرگی و پشكنینی تێدایە.
هاوكات عودەی خدران قایمقامی شارۆكەی خاڵس بۆ “وشە” گوتی، داخستنی دەروازەكە زۆر ناخایەنێت و هۆكاری داخستنەكەیشی پێوەندی بە لێكۆڵینەوە لە ڕفاندن و كوشتنی چەند كەسێك هەیە كە كاریان بەرێخستنی مامەڵەی هاووڵاتییانی نێوان هەرێم و بەغدا بووە.
“وشە” زانیویەتی، پێش گەیشتن بەو دەروازەیە، چەند بازگەیەكی میلیشیا شیعەكان هەیە و هۆكاری بایەخی حكوومەتی بەغداش بەو دەروازەیە بۆ ئەوە دەگەڕێتەوە كە هاووڵاتییانی ناوەڕاست بڕی زۆری كەلوپەلی ئێرانی و توركیان پێ دەگات.
تُتاح هذه الصورة أيضا في: کوردی