ناڤهرۆكا دهستپێشخهريا سهربخۆيان پێشكێشى سهركردايهتيا ههرێما كوردستانێ كرى ئاشكرا بوو
گاڤ نيوز
ههڤپهيمانيا ئيراقا سهربخۆ د پهرلهمانێ ئيراقێ دا كو ژ ژمارهيهكا پهرلهمانتارێن سهربخۆ پێكدهێت، ئهڤرۆ رۆژا ئێكشهمبيێ هندهك بڕگهيێن دهستپێشخهريا خۆ يا كو پێشكێشى سهركردايهتيا سياسى يا ههرێما كوردستانێ كرى، ئاشكرا كرن.
ئهحمهد غازى ئهندامێ تيما راگههاندنێ يا ههڤپهيمانيا ئيراقا سهربخۆ كو ل گهل شاندێ ئهڤرۆ سهرهدانا ههولێرێ كرى پشكداره بۆ ئاژانسا شهفهق نيوز دياركر؛ دهستپێشخهريا شاندێ پهرلهمانتارێن سهربخۆ بۆ هێزێن سياسى يێن كوردى ژمارهيهكا پێشنياران بۆ چارهسهركرنا داخستنا سياسى ل ئيراقێ و دهربازكرنا قهيرانا پێكئينانا حكومهتێ ب خۆڤه گرتينه.
ديار ژى كر؛ ئێك ژ پێشنياران دوپاتیە ل سهر گرنگيا پێگيريێ ب ئيستيحقاقێن دهستوورى د ههمى قووناغێن خۆ دا و ژ وان ژى پێكئينانا حكومهتێ.
خۆيا ژى كر؛ ههروهسا پێشنيارا پێكئينانا فراكسيۆنهكا پهرلهمانى كو ژ پهرلهمانتارێن سهربخۆ پێكدهێت هاته كرن كو ل دويڤ دا فراكسيۆنێن دى ل گهل وێ ههڤبگرن دا كو فراكسيۆنا مهزنتر يا پهرلهمانى بهێته پێكئينان.
ئاشكرا ژى كر؛ ژ برگهيێن دى يێن دهستپێشخهريێ، دوپاتیە ل سهر وێ چهندێ كو پێدڤيه سهرۆكوهزيرێ ئيراقێ كهسهكێ سهربخۆ و دهستپاك و ژێهاتى بيت، دانانا سنوورهكێ بۆ بههدهردانا سامانێن نيشتيمانى، فراكسيۆنێن حكومهتێ پێكدئينن زهمينهيا ههبوونا ئوپوزيسيۆنێ خۆش بكهن ههروهسا پێدڤيه بهرنامهيێ حكومهتێ دياردهيێن چهكدارى نههێليت و ياسايێ ل سهر ههميان بجهبينيت.
زێده ژى كر: ل گۆرهى دهستپێشخهريێ پێدڤيه دهستنيشانكرنا سهرۆككۆمارى ل گۆرهى وان پرهنسيپ و مهرجان بيت يێن كو د دهستوورێ ئيراقێ دا هاتين.
ئهڤرۆ ئێكشهمبيێ شاندهكێ پهرلهمانتارێن سهربخۆ د پهرلهمانێ ئيراقێ دا سهرهدانا ههرێما كوردستانێ كرن و دهستپێشخهريهك پێشكێشى سهرۆك بارزانى و نێچيرڤان بارزانى سهرۆكێ ههرێما كوردستانێ بۆ چارهسهركرنا داخستنا سياسى ل ئيراقێ كربوون.
تُتاح هذه الصورة أيضا في: کوردی