مەکتەبا سیاسی یا پارتی: د شیان دایە رێککەفتن ل سەر هەلبژارتنێن پێشوەخت بهێتە کرن
گاڤ نیوز
مەکتەبا سیاسی یا پارتی دیمۆکراتی کوردستان بەیانەک دەربارەی رەوشا نوکە یا ئیراقێ بەلاڤ کر و تێدا نەرازیبوون و نەئارامیا خۆ دەربارەی رەوش و ناکویێن سیاسی یێن ئیراقێ دیار کر.
مەکتەبا سیاسی یا پارتی د بەیانا خۆ دا نڤیسیە “دەربارەی رەوش و ئالۆزیێن سیاسی یێن ئیراقێ، پارتی دیمۆکراتی کوردستان نەرازیبوون و نەئارامیا خۆ همبەری رەوش و ناکوکیێن سیاسی یێن نوکە یێن ئیراقێ دیار دکەت. یا ئاشکرا یە کو هەر ژ دەستپێکا راگەهاندنا ئەنجامێن هەلبژارتنێن ئیراقێ کو ل ئۆکتۆبەرا سالا 2021 هاتیە کرن، ئەو پێشهات، کێشە و ئالۆزیێن پشتی هەلبژارتنان بووینە ئاستەنگ ل هەمبەری پێکئینانا حکومەتا نوی ل سەر بنەمایێ دەستووری و باوەرپێکری و ل سەر بنەمایێ سیستەمێ سیاسی یێ نوکە یێ ئیراقێ وەلات گەهشتیە لێڤا رەوشەکا سیاسی یا داخستی”.
هەروەسا هاتیە “وەک هەستکرن ب بەرپرساتی ژ پێخەمەت وەلاتی و پاراستنا ئیراقێ ژ مەترسیێن د ڤێ قووناغێ دا، دخوازای ژ هەمی سەرکردەیێن سیاسی یێن گورەپانا ئیراقێ دکەین بەرپرساتیا ڤێ رەوشێ وەربگرن و داخوازێ ژ هەمی ئالیان دکەین گاڤێن رژد و بلەز بهاڤێژن بۆ دەستپێکرنا دانوستاندنێن بەرهەمدار و سەرکەفتی ل سەر بنەمایێن دەستوورێ ئیراقێ بۆ رزگارکرنا وەلاتی ژ ڤێ رەوشا نوکە”.
مەکتەبا سیاسی یا پارتی دیمۆکراتی کوردستان راگەهاندیە ژی “ژ پێخەمەت ئەنجامدانا پرۆسەیا چاکسازی و گوهۆڕینێن راست و باشترکرنا رەوشا نوکە یا ئیراقێ، د شیان دایە رێککەفتن ل سەر هەلبژارتنێن پێشوەخت بهێتە کرن و سۆزا وێ یەکێ ژی بدەن کو ب ئەنجامێن دوماهیێ یێن هەلبژارتنان رازی ببن و تاقیکرنا هەلبژارتنێن پێشتر دوبارە نەبیت”.
تُتاح هذه الصورة أيضا في: کوردی