رێكخەرێ راسپاردێن نێڤدەولەتی: حكومەتا هەرێمێ پابەندە ب هاریكاری و خزمەتكرنا ئاواران
ههولێر/ تۆرا لالش
ئەڤرۆ سێشەمبووێ 27ێ ئابا 2024ێ ل ههولێرێ، دیندار زێباری رێكخەرێ راسپاردێن نێڤدەولەتی یێن حكومەتا هەرێما كوردستانێ، د كۆنفرانسهكێ رۆژنامەڤانی دا راگەهاند ب ههموو شیانین خۆڤه ههول ددهین پێشڤەبرنا مافێن ئاوارە و پەنابەران ل گۆر ستاندارتێن نێڤدەولەتی بت و ئەز دخوازم سوپاسیا رێكخراوا نێڤدەولەتی یا كۆچێ (IOM) بكەم ژ بۆ بەشداربوونا وان د رێكخستنا ڤێ كۆنفرانسێ دا.
وی گۆت كو حكومەتا هەرێما كوردستانێ بەردەوام جهێ پەناهیێ یێ سەدان هزار ئاوارە و كۆچبەران بوویە و پابەندیا وان بۆ دابینكرنا ئەمنیەتێ ژ بۆ ئاواران دێ وەكی خۆ مینت.
زێباری دیار كر كو گرنگە د بابەتێ داخستنا كەمپێن ئاواران دا ب هەستیاری نێزیك بین و پشتراست بین كو ڤەگەریانا ئاواران ب دلخوازی بوویە و دوور ژ زۆرداریێ یه.
وی هەروەها ئاماژە ب نەبوونا یاسایەكا تایبەت كر كو راستەوخۆ بەحسێ ماف و پاراستنا ئاواران بكەت، چ ل ناڤ حكومەتا هەرێمێ یان یا فیدرالی دا.
دیندار زێباری گۆت كو وەزارەتا ناڤخۆ ب هەڤكاریا UNHCR مژوولی ئامادەكرنا رێنمایێن كارگێری نە دەربارەی پرۆسەیا پەنابەریێ ل هەرێما كوردستانێ.
وی دیار كر كو وان گرنگی دایە ژنان و كچان ل كەمپان، و نێزیكی 15 هزار ژنان مفا ژ خزمەتگوزاریان وەرگرتینە، هەروەها ژ بۆ گرنگیدانا ب ژنان وی ئاماژە ب هندەك پرۆگرامێن نووی كر.
زێباری راگەهاند كو حكومەتا هەرێمێ پابەندە ب هاریكاری و خزمەتكرنا ئاواران، و دابینكرنا ئارامی و ئەمنیەتا وان، نۆكه هەرێما كوردستانێ مێڤانداریا ئێك ملیۆن و دوو هزار ئاواران دكەت كو ل 22 كەمپان ل سنۆرێن هەولێر، دهۆك و سلێمانیێ دژین.
پتر ژ ئێك ملیۆن ئاوارە و پەنابەر ل هەرێما كوردستانێ دژین و حكومەت 80% ژ مەسرەفێن خزمەتگوزاریێن وان دابین دكەت. ئارمانجا ڤێ كۆنفرانسێ ژی تیشك خستنە سەر دەرفەتێن هاریكاری و پشتەڤانیێ یە د وارێ ئاوارە و پەنابەران دا.
سەرەرای نەسەقامگیریا رۆژهەلاتا ناڤین، هەرێما كوردستانێ جهێ ئارام یێ پتر ژ ئێك ملیۆن ئاوارە و پەنابەرانە و پابەندی پیڤەرێن نێڤدەولەتی بوویە و 80% مهزاختیێن خزمەتگوزاریان ل سەر خۆ گرتینە.
تُتاح هذه الصورة أيضا في: کوردی