دەرد و داخوازیێن ئێزدیان دگەهینتە جهێن شۆلەژێ
دەنگێ لالش،خێرهات بێدرڤان 
راگەهاندكارێ ئێزدی”عەزیز خودێدا”بەرنیاس ب “عەزیز شەركانی” خەلكێ قەزا شنگالێ یە دیاركر:”پشتی كارەساتا شنگالێ من بریاردا ل سەر ئاستێ ئێزدیان كاربكەم و دەرد وداخوازی و خەمێن مللەتێ خۆ بگەهینم جهێن شۆلەژێ،هەروەسا راگەهاندن بۆ من ئارامیە و دووەم تشتە د ژیانا من دا”.
شەركانی نۆكە پەیامنێرێ رۆژناما دەنگێ لالشە ل هەولێرێ و پێشكێشكارێ بەرنامێ نووچێن ئێزدیخانێ یە ل كەنالێ زاگرۆس تی ڤی و بەرپرسێ نڤیسینگەها لالشە ل هەولێرێ،بۆ رۆژناما دەنگێ لالش گۆت:”ئەڤە ماوێ هەشت سالانە من دەست ب كارێ راگەهاندنێ كری،دڤان چەند سالێن بۆری دا من دگەل نێزیكی 12 دەزگەهێن راگەهاندنێ كاركریە دناڤ ودەرڤەی هەرێما كوردستانێ دا چ رۆژنامە وگۆڤار یان رادیۆ وتی ڤی یانژی ئاژانس،حەزا من بۆ هەموویان هەیە لێ پتر رادیۆ و رۆژنامە نەك تی ڤی،لێ راگەهاندكار ل كوردستانێ وعێراقێ بەلكو ل رۆژهەلاتا ناڤین ب گشتی پتر ب كارێ تی ڤی پێشدكەفت خەلك ژی گرنگیێ ب تی ڤی ددەت بەروڤاژی وەلاتێن ئەوروپی وئەمریكا كو(تی ڤی) ل داویا هەموو جۆرێن میدیا دئێت.
شەركانی دبێژت ژی بەری كارەساتا شنگالێ ل 3/8/2014ێ، خەونا من ئەو بوو ل سەر ئاستێ كوردستانێ ئانكو عێراقێ كارەكی بكەم وبەرنیاس بم،لێ من ئەو یەك هەلبژارت كو تنێ ل سەر ئاستێ ئێزدیان كاربكەم و دەرد وداخوازی و خەمێن مللەتێ خۆ بگەهینم ،ل هەرێمێ من ئەڤ دەرد وداخوازی ب رێیا بەرنامێ نووچێن ئێزدیخانێ گەهاندن دەسەلات و جهێن شۆلەژێ و خەلكێ كوردستانێ”.
ناڤهاتی دا زانین ژی راگەهاندن بۆ من ئارامیە و دووەم تشتە د ژیانا من دا گرنگیێ پێ ب دەم،پشتی خێزانا من.
تُتاح هذه الصورة أيضا في: کوردی