ئامارا ساله‌كێ یا قوربانیێن كورد ب ده‌ستێ سوپایێ توركیا
دواڕۆژ
پارتا دیموكراتیك یا گه‌لان، هه‌ده‌پێ، ئامارا قوربانیێن شه‌ڕێ سوپایێ توركیا راگه‌هاند و زه‌لالكر، كو هه‌ر ژ ده‌ستپێكرنا شه‌ڕێ توركیا دژی ده‌ڤه‌رێن كوردان، 828 كه‌س هاتینه كوشتن و دیسا ژی 133 كه‌س هاتینه برینداركرن، هه‌ڤده‌م، تا نها ژی قه‌ده‌غه‌یا هاتوچۆیێ و ده‌ركه‌ڤتنا كۆلانان ده‌وام دكه‌ت.
ب سه‌دان هزار كورد ئاواره بووینه
د هه‌یاما ساله‌كێ دا سوپایێ توركیا ژ بلی زیانێن گیانی، زیانێن مه‌زن یێن دراڤی ب ده‌ڤه‌رێن كوردان گه‌هاندییه و هه‌ژماره‌كا مه‌زن یا ئاڤاهییان ژ ناڤبرینه و كرینه ئه‌رد، ل ده‌مه‌كی، تا نها ژی ب دژواری هنده‌ك ده‌ڤه‌رێن سڤیلان دهێنه بۆمبه‌باران و تۆپ بارانكرن.
ژ ده‌ستپێكا هێرشێن سوپایێ توركیا كو نێزیكی ساله‌كێ یه و تا نها ژی بۆ سه‌ر ده‌ڤه‌رێن كوردان به‌رده‌وامه، سه‌دان كه‌س هاتینه كوشتن و ب هزاران كه‌سان ژی مال و حالێن خوه بجهـ هێلاینه.
ئاژانسا سپۆتنیك ژی ئامارا قوربانییان ژ پارتییا دیموكراتیك یا گه‌لان هه‌ده‌پێ راگه‌هاندییه و دیاركرییه، ل سلۆپی هێشتا قه‌ده‌غه‌یا هاتوچۆیێ به‌رده‌وامه و زیانه‌كا مه‌زن ژی ب ده‌ڤه‌رێ گه‌هاندییه.
هه‌زه‌خ و نسێبینێ 194 كه‌س هاتینه كوشتن
ئاژانسا سپۆتینك ژ پارتییا دیموكراتیك یا گه‌لان ڤه‌گوهاستییه كو ل هه‌زه‌خێ قه‌ده‌غه‌یا هاتوچۆیێ و ده‌ركه‌ڤتنا كۆلانان 16 جاران هاتییه راگه‌هاندن و 69 كه‌س هاتینه كوشتن و 12 ژی برینداربووینه و ناسنامه‌یێن وان نه‌هاتینه ئاشكراكرن، ژ ئالییه‌كێ دی ڤه و ل نسێبینێ ژی 7 جاران قه‌ده‌غه‌یا هاتوچۆیێ هاتییه راگه‌هاندن و 125 كه‌س هاتینه كوشتن و ته‌رمێن 33 كه‌سان ژی نه‌هاتینه ناسكرن، ل ده‌مه‌كی زیان ب وان ناوچه‌یان ب شێوه‌یه‌كێ به‌رچاڤ گه‌هاندییه.
ل جزیرێ 291 كه‌س هاتینه كوشتن
لگۆری ئاژانسا سپۆتنیك، ل جزیرێ د قه‌ده‌غه‌یا هاتوچۆیێ و ده‌ركه‌ڤتنا كۆلاناندا 291 كه‌س هاتینه كوشتن و تا نها ژی ناسنامه‌یا 55 ژ وان كه‌سان نه‌هاتییه زه‌لالكرن، دیسا ژی تا نها ژی خه‌لكێ وێ ده‌ڤه‌رێ د ره‌وشه‌كا خراب دانه.
ل سوورا ئامه‌دێ 90 كه‌س هاتینه كوشتن
ژ ئالییه‌كێ دی ژی ڤه هه‌ده‌په دیاردكه‌ت ژی؛ ل سوورا ئامه‌دێ كو شه‌ڕ ب دژواری ل وێ ده‌ڤه‌رێ هاته‌كرن و تا شیاین كۆنترۆل بكه‌ن زیانه‌كا مه‌زن ب سوورێ گه‌هاند، هه‌روه‌سا دیاركرییه؛ 6 جاران قه‌ده‌غه‌یا هاتوچۆیێ هاتییه راگه‌هاندن و تا نها ژی چو ئامارێن دروست ده‌رباره‌یی ژمارا دروست یا قوربانییان نینن، لێ زانیاری ئاشكرادكه‌ن كو نێزیكی 90 كه‌سانه.
ل سلۆپی 59 كه‌س هاتینه كوشتن
هه‌ده‌پێ بۆ ئاژانسێ ئاشكراكرییه؛ ل سلۆپی 59 كه‌س هاتینه كوشتن و 2 جاران قه‌ده‌غه‌یا هاتوچۆیێ هاتییه راگه‌هاندن، دیسا ژی زیانه‌كا مه‌زن ب ملك و مالێن وه‌لاتییان ژی كه‌ڤتییه، ل ده‌مه‌كی هاتوچۆیێ كارتێكرنه‌كا مه‌زن ل سه‌ر ره‌وشا ژین و ژیارا وه‌لاتییان ب شێوه‌یه‌كێ گشتی ژی كرییه.
ل شرنه‌خێ 96 كه‌س هاتینه كوشتن
هه‌روه‌سا شرنه‌خ ژی ب ناوچه‌یه‌كا مه‌زن یا كوردان دهێته هه‌ژمارتن و حكومه‌تا توركیا قه‌ده‌غه‌یا هاتوچۆیێ ل وێ ناوچێ ژی راگه‌هاندییه و 96 كورد كوشتینه و تا نها ژی نه‌هاتییه زانین 33 كه‌سێن دناڤا واندا كینه.
ل گه‌ڤه‌رێ 98 كه‌س هاتینه كوشتن
هه‌روه‌سا زه‌لالكرییه؛ كو ل گه‌ڤه‌رێ 5 جاران قه‌ده‌غه‌یا هاتوچۆیێ و ده‌ركه‌ڤتنا كۆلانان ژ ئالیێ حكومه‌تا توركیا ڤه هاتییه راگه‌هاندن و 98 كه‌س هاتینه كوشتن، ل ده‌مه‌كی ل گه‌ڤه‌رێ گه‌له‌ك جاران شه‌ڕێن دژوار ژی دروست بووینه و په‌كه‌كێ ژی زیان ب سوپایێ توركیا گه‌هاندییه، لێ سپۆتنیك ئاماژه ب ئاماران نه‌كرییه.
تُتاح هذه الصورة أيضا في: کوردی
