ده‌میرتاش به‌حس ل ئه‌گه‌رێن مرنا ئوجه‌لان دكه‌ت
ئه‌ڤرۆ نیوز:
هه‌ڤسه‌رۆكێ پارتیا دیموكارتیا گه‌لان “هه‌ده‌په” راگه‌هاند كو هه‌تا نوكه نزانن رێبه‌رێ زیندانكریێ پارتیا كرێكارێن كوردستانێ “په‌كه‌كه” یێ زیندی یه یان ژی مریه.
سه‌لاحه‌دین ده‌میرتاش هه‌ڤسه‌رۆكێ هه‌ده‌پێ و په‌رله‌مانتارێ توركیا د ئاخفتنه‌كا خوه دا ل باژێرێ وانێ یێ باكوورێ كوردستانێ راگه‌هاند: شه‌ڤا كوده‌تایا سوپایی، هه‌رلكوپته‌ره‌ك چوویه گزیرتا ئیمرالی و شه‌ر و پێكدادان روودایه، به‌لێ “هێشتا نزانین ژ ئه‌نجامێ وی شه‌ر و پێكدادانێ چ چێبوویه”.
سه‌لاحه‌دین ده‌میرتاش ئاماژه ب وێ چه‌ندێ كر كو ئه‌و دێ مانگرتنێ كه‌ن هه‌تا ده‌نگوباسه‌كی ل سه‌ر ره‌وشا ساخله‌میا عه‌بدولا ئوجه‌لان رێبه‌رێ په‌كه‌كێ دزانن، “رۆژا 5ی ڤێ هه‌یڤێ دێ مانگرتنه‌كا ڤه‌كری راگه‌هینین”.
هه‌ڤسه‌رۆكێ هه‌ده‌پێ گۆمان یا هه‌ی كو ئه‌و ژه‌نرالێ ب هه‌لكوپته‌رێ چووینه یونان هه‌مان ئه‌و كه‌س بن یێن شه‌ڤا كوده‌تایێ چووینه دورگا ئیمرالی و بزاڤا كوشتنا عه‌بدولا ئوجه‌لان كرین بن.
ده‌میرتاش گۆت: “رێبه‌رێ په‌كه‌كێ زیندانیه‌كێ ئاسایی نینه و هه‌كه ده‌سته‌لاتا توركیا رێ ب خێزان و پارێزه‌رێن وی نه‌ده‌ت سه‌ره‌دانا وی بكه‌ن، ئه‌و دێ به‌رده‌وامیێ ده‌نه مانگرتنا خوه”.
بڕیاره رۆژا دوشه‌مبی 5ی ئیلۆنا 2016ێ 50 چالاكڤان و ئه‌ندامێن حزب و رێكخراوێن كوردی یێن باكوورێ كوردستانێ مانگرتنه‌كا ڤه‌كری بكه‌ن و “خوارنێ نه‌خون” هه‌تا تشته‌كی ژ ره‌وشا ساخله‌میا عه‌بدولا ئوجه‌لان دزانن.
عه‌بدولا ئوجه‌لان ل رۆژا 15ی شوباتا 1999ێ ژ لایێ ده‌زگه‌هێ هه‌والگه‌ریا توركیا ل وه‌لاتێ كینیا هاته ده‌سته‌سه‌ركرن و پاشان دادگه‌ها توركیا بڕیارا زیندانكرن بۆ هه‌تا هه‌تایێ ب سه‌ردا سه‌پاند و بۆ گزیرتا ئیمرالی هاته ڤه‌گوهاستن.
تُتاح هذه الصورة أيضا في: کوردی
