وه‌زاره‌تا په‌روه‌ردێ ژماره‌يه‌كا بڕياران ل دۆر سالا نوى يا خواندنێ دان
گاڤ نيوز
وه‌زاره‌تا په‌روه‌ردێ يا حكومه‌تا هه‌رێما كوردستانێ ئه‌ڤرۆ رۆژا ئێكشه‌مبيێ ژماره‌يه‌كا بڕياران ل دۆر ده‌ستپێكرنا سالا خواندنێ يا نوى 2022-2023 ده‌رئێخستن.
د نڤيساره‌كا وه‌زاره‌تا په‌روه‌ردێ دا هاتيه؛ پرۆسه‌يا وه‌رگرتنا زارۆك و قۆتابيان ل ناڤه‌ندێن خواندنێ يێن حكومى و نه‌حكومى ژبلى قۆتابخانه‌يێن بيانى و نێڤده‌وله‌تى دێ ژ رێكه‌فتى 26ى خزيرانێ ده‌ستپێكه‌ت و تا 26ى تيرمه‌هێ دێ به‌رده‌وام بيت و ب ڤى ره‌نگێ ل خوارێ: زارۆكێن ژدايكبوويێن 1/1/2018 تا 31/12/2018 دێ ل قووناغا ئێكێ يا باخچه‌يێن حكومى و نه‌حكومى هێنه وه‌رگرتن، زارۆكێن ژدايكبوويێن 1/1/2017 تا 31/12/2017 دێ ل قووناغا دویێ يا باخچه‌يێن حكومى و نه‌حكومى هێنه وه‌رگرتن و قوتابيێن ژدايكبوويێن 1/1/2016 تا 31/12/2016 دێ ل پۆلا ئێكێ يا بنه‌ره‌تى ل قۆتابخانه‌يێن حكومى و نه‌حكومى هێنه وه‌رگرتن.
د نڤيسارى دا هاتيه ژى؛ ئه‌و قوتابيێن پۆلا شه‌شێ بنه‌ره‌تى ته‌مامكرين و پۆلا 7ى بنه‌ره‌تى ل قوتابخانه‌يێن وان نه‌بيت، پێدڤيه ژ 26/6/2022 تا كو 26/7/2022 ل قوتابخانه‌يه‌كا دى ل پۆلا 7ى بنه‌ره‌تى ل گۆره‌ى بڕيارا رێڤه‌به‌ريا په‌روه‌رده‌يا قه‌زايێ خۆ تۆماربكه‌ن، ئه‌و قوتابخانه‌يێن پۆلا 7ى بنه‌ره‌تى تێدا ژى گوهۆڕينا ئاستى بۆ قوتابيان دێ ب رێكا سيسته‌مێ E- Parwarda هێته ئه‌نجامدان.
نڤيسارێ ئاماژه دايه وێ چه‌ندێ ژى؛ پێدڤيه ده‌رچوويێن پۆلا 9ى بنه‌ره‌تى رێكارێن وه‌رگرتنێ ل په‌يمانگه‌هێن وه‌زاره‌تا په‌روه‌ردێ يان ئاماده‌يێن زانستى و وێژه‌يى و پيشه‌يى يان خواندنێن ئيسلامى ژ 26/6/2022 تا كو 26/7/2022 ئه‌نجامبده‌ن.
تُتاح هذه الصورة أيضا في: کوردی
