وەزیری خوێندنی باڵا: یەکشەممە زانکۆلاین بۆ دەرچووانی 12ی ئامادەیی کارا دەکرێت
باسنيوز :
وەزیری خوێندنی باڵا، ئاشكرای كرد، پرۆسه‌ی پێشکەشکردن بۆ وه‌رگرتنی ده‌رچووانی دوانزه‌ی ئاماده‌یی له زانكۆكانی كوردستان دەستپێدەکات و لە سبەینێوە یەکشەمە لە كاتژمێر 8ی بەیانی، زانكۆلاین بۆ ماوەی 10 رۆژ بۆ دەرچوانی دوانزەی ئامادەیی کارا دەکرێت.
د. ئارام محمد قادر، وەزیری خوێندنی باڵا و توێژینەوەی زانستی ڕایگەیاند: “لە سبەینێوە یەکشەمە ڕێکەوتی 2022/9/18 لە كاتژمێر 8ی بەیانی، وێبسایتی (www.regayzanko.com) بۆ دەرچووانی دوانزەی ئامادەیی، تا كاتژمێر 12ی شەوی ڕۆژی 2022/9/27، واتە بۆ ماوەی 10 ڕۆژ کارا دەبێت، به‌وه‌ش ده‌رچووانی 12ی ئاماده‌یی لەو ماویە ده‌توانن فۆرمی وه‌رگرتن له زانكۆ و په‌یمانگه‌كان پڕبكه‌نه‌وه‌و پێشكه‌شی بكه‌ن”.
ئاماژەی بەوەش داوە: “ده‌رچووان ده‌بێت بە بەكارهێنانی هەمان ناوی بەکارهێنەر و وشەی تێپەڕ (یوزەرنەیم و پاسۆرد) كە پێشتر له خوێندنگەکانیان وه‌ریانگرتۆته‌وه فۆرمی وه‌رگرتن پڕبكه‌نه‌وه.
وەزیری خوێندنی باڵا روونیشی كردووەتەوە: “بۆ به‌رچاوڕونی زیاتری ده‌رچوانی پۆلی دوانزه‌و ئاشنابونیان به‌سیستمه‌كانی وه‌رگرتن (زانكۆلاین، پارالێل، ئێواران) دەتوانن لەسەر وێبسایتی (www.regayzanko.com) ڕێبەری وەرگرتن بە وردی بخوێننەوە وەک بنچینەیەک بۆ پڕکردنەوەی فۆرمەکانیان، هەروەهاش دەتوانن سەردانی مەڵبەندەکانی ڕاوێژکاری زانکۆکان بکەن بۆ وەرگرتنی ڕوونكردنه‌وه‌ی پێویست له‌سه‌ر چۆنیه‌تی پڕكردنه‌وه‌ی فۆرمی وه‌رگرتن به‌سیستمه جیاوازه‌كان، کە ئه‌مه‌ش ده‌ره‌فه‌تێكی گرنگه بۆ ئه‌وه‌ی دەرچوان به‌ر له‌وه‌ی فۆرمی وه‌رگرتن پێشكه‌ش بكه‌ن و ئاگاداری ورده‌كارییه‌كانی سیستمه‌كه بن و هەوڵ بدەن خودی خۆیان فۆڕمەکان پڕبکەنەوە و ڕوو لەو سەنتەرانە نەکەن کە فەرمی نین و تەنها بۆ دەستکەوتنی بڕێک پارە فۆرم بۆ دەرچوان پڕ دەکەنەوە، چونکە وەزارەت بەرپرس نابێت لەهەر هەڵە و بەشێک کە لەلایەن دەرچوو پێشکەش دەکرێ”.
وەزارەتی خوێندنی باڵا و توێژینەوەی زانستی ڕاشیدەگەیەنێت: “وەرگرتن لە زانکۆکان بەپێی ڕیزبەندی ئەو کۆلێژ و بەشانە دەبێت کە دەرچوان لە زانکۆلاین پێشکەشی دەکەن بە ڕەچاوکردنی کۆنمرەی خوێندکار/ قوتابی، بۆیە پێویستە بە وردی ڕیزبەندی ئەو کۆلێژ و بەشانە دیاری بکەن کە ئارەزو دەکەن خوێندنی تێدا تەواو بکەن. هەروەها پێویستیشە دەرچوانی پۆلی دوانزە هەر لە یەکەم ڕۆژی کاراکردنی زانکۆلاین دەست بکەن بە پێشکەش کردن و کارەکانیان دوا نەخەن بۆ کۆتا ڕۆژەکانی زانکۆلاین”.
س.س
تُتاح هذه الصورة أيضا في: کوردی
