ئيراقێ 4 بڕيار ل دژى ده‌ستدرێژيێن ئيرانێ و توركيا دان
گاڤ نيوز
جڤاتا وه‌زارى يا ئاسايشا نيشتيمانى يا ئيراقى ب سه‌رۆكاتيا محه‌مه‌د شياع سودانى فه‌رمانده‌يێ گشتى يێ هێزێن چه‌كدار و ب ئاماده‌بوونا سه‌رۆك ئه‌ركانێن پێشمه‌رگه‌ى ئه‌ڤرۆ چارشه‌مبيێ كۆمبوو و ژماره‌يه‌كا بڕياران ل دۆر ده‌ستدرێژيێن ئيرانێ و توركيا بۆ سه‌ر ئاخا ئيراقێ دان.
ليوا يه‌حيا ره‌سوول په‌يڤدارێ فه‌رمانده‌يێ گشتى يێ هێزێن چه‌كدار د به‌يانه‌كێ دا راگه‌هاند؛ د چارچووڤه‌يێ بزاڤێن راوه‌ستاندنا هێرشێن بۆ سه‌ر ئاخا ئيراقێ و به‌رده‌واميدان ب بزاڤێن دپلۆماسى، جڤاتا وه‌زارى يا ئاسايشا نيشتيمانى ژماره‌يه‌كا بڕياران ده‌ركرن.
ئاشكرا ژى كر؛ ئه‌ڤ بڕيارێن ل خوارێ د كۆمبوونێ دا هاتنه دان:
1. دانانا پلانه‌كێ بۆ دوباره به‌لاڤپێكرنا هێزێن پاسه‌وانێن سنوورى ب مه‌ره‌ما كونترۆلكرنا خالا سفر ب درێژيا سنوورێن ئيراقێ ل گه‌ل ئيرانێ.
2. دابينكرنا هه‌مى پێدڤيێن لوجيستى يێن فه‌رمانده‌يێن هێزێن پاراستنا سنوورى و ب هێزكرنا شيانێن مرۆڤى و دابينكرنا كه‌ره‌سته و چه‌كێ پێدڤى بۆ بجهئينانا ئه‌ركێن وان.
3. وه‌زاره‌تا ناڤخۆ شيانێن مرۆڤى يێن پتر بۆ ب هێزكرنا بنكه‌يێن سنوورى به‌رده‌ست بكه‌ت.
4. هه‌ماهه‌نگى ل گه‌ل حكومه‌تا هه‌رێما كوردستانێ و وه‌زاره‌تا پێشمه‌رگه‌ى بۆ بجهئينانا بڕگه‌يێن ئێك و دو يێن ل سه‌رى ب ئارمانجا ئێكخستنا بزاڤێن نيشتيمانى بۆ پارێزگاريكرنێ ل سنوورێن ئيراقێ بهێته كرن.
تُتاح هذه الصورة أيضا في: کوردی
