سه‌رۆكێ بنگه‌هێ لالش:سەرەدانا سەرۆک بارزانی بۆ به‌غدا يا گرنگ بوو
ڕاگه‌هاندنا بنگه‌هێ لالش – سه‌ما
سه‌عيد جردۆ،سه‌رۆكێ ده‌سته‌يا بلندا بنگه‌هێ لالش ل دۆر سه‌ره‌دانا جه‌نابێ سه‌رۆك بارزانى بۆ به‌غدا راگه‌هاند؛ سه‌رۆك بارزانى وه‌كو كارێزمايه‌ك و سه‌ركرده‌يه‌كێ وه‌فادار و خه‌مخۆرێ ئه‌زموونا فيدراليه‌تێ ل عيراقا نوو،بزاڤ كرن هه‌موو ئاليان ب زمانێ ديالۆكێ ل سه‌ر مێزه‌يا دانوستاندنێ كۆم بكه‌ت،گۆتژى پێدڤیە پۆستێن پارێزگەها مووسل ب ڕێککەفتنا هەموو ئالیان بت.
سه‌رۆكێ بنگه‌هێ لالش،بۆ سه‌ما دياركر؛سه‌ره‌دانا سه‌رۆك بارزانى بۆ به‌غدا د ده‌مه‌كى دايه كو ده‌ستێوه‌ردانێن ده‌وله‌تێن هه‌رێمى دكاروبارێن عيراقێ دا زێده‌تر بووينه و ئه‌زموونا فيدراليه‌تێ ل عيراقێ به‌ره‌ف ئاقاره‌كێ نه‌ديار ڤه دبه‌ن،هه‌لبه‌ت بزاڤێن ڤان ئاليێن هه‌رێمى نه ژبۆ خێرا عيراقێ و پێكهاتێن وێيه،به‌لكو ئه‌جيندايێن خۆ يێن تايبه‌ت ل ڤى وه‌لاتى دا بجهـ دئينن و گه‌لێ عيراقێ دكه‌نه قوربانيا به‌رژه‌وه‌نديێن خۆ يێن هه‌رێمايه‌تى،له‌وما جه‌نابێ سه‌رۆكى وه‌كو كارێزمايه‌ك و سه‌ركرده‌يه‌كێ وه‌فادار و خه‌مخۆرێ عيراقا نوو و ئه‌زموونا فيدراليه‌تێ ل عيراقا نوو،بزاڤ كرن دڤێ سه‌ره‌دانا خۆ دا ژبۆ به‌غدايێ هه‌موو ئاليان ل سه‌ر مێزه‌يا دانوستاندنێ كۆم بكه‌ت دا هه‌ر ئاريشه‌يه‌كا ناڤخۆيى يا كو هه‌بت ب زمانێ ديالۆكێ و برايانه بێته چاره‌سه‌ركرن و ئه‌و بزاڤێن وه‌لاتێن هه‌رێمى يێن دڤێن ئاگرێ فتنێ دناڤ پێكهاتێن عيراقێ دا گۆڕ بكه‌ن و وى ئاگرى ڤه‌مرينت و عيراقيا هشيار بكه‌ت ل سه‌ر مه‌ره‌مێن وان يێن خراب.
سه‌عيد جردۆ رۆنكر،هه‌لبه‌ت به‌رامبه‌ر ڤێ يه‌كێ هه‌قه سياسه‌تمه‌دارێن خێرخوازا عيراقا نوو ژهه‌موو ئاليان و هه‌موو پێكهاتێن عيراقێ ڤێ سه‌ره‌دانا جه‌نابێ سه‌رۆك بارزانى ب گرنگ وه‌رگرن و وان ديتن و دووربينى و رێنما وئامۆژگاريێن سياسه‌تا جه‌نابێ وى يا حه‌كيمانه ژخۆرا بكه‌نه رێباز ژبۆ ئاڤاكرنا عيراقه‌كا نوو و نه‌خشه رێگه ژبۆ چاره‌سه‌ركرنا ئاريشه‌يێن هه‌ين و دوورخستنا عيراقێ ژ پيلانێن ده‌وله‌تێن هه‌رێمى يێن ڕۆژ بۆ ڕۆژێ ب هه‌موو ئالاڤان بزاڤان دكن كو عيراقێ بكه‌نه گۆره‌پانه‌كا ناكۆكيان و به‌رژه‌وه‌نديێن خۆ تێدا ده‌رباز بكه‌ن و رێ ب دوژمن و نه‌حه‌زێن عيراقێ نه‌ئێته خۆشكرن ئه‌جيندايێن خۆ بكاربينن و گه‌لێ عيراقێ ببته قوربانى.
ده‌رباره‌ى ڕوونشتنا جڤاتا پارێزگه‌ها مووسلێ بۆ هەلبژارتنا بەرپرسێن كارگێرى ل سنوورێن قەزا و ناحیان، سه‌عيد جردۆ ئاشكه‌راكر:گه‌له‌ك ژ ده‌ڤه‌رێن پارێزگه‌ها مووسل سه‌ر ب مادا 140 ڤه‌نه و ده‌ڤه‌رێن كێش و ڤه‌كێشێ نه و دڤێت ب حه‌كيمانه چاره‌سه‌رى ل گه‌ل وێ پرسێ بێته كرن و دڤێت ب ده‌ستووری بهینە چاره‌سه‌ركرن.
سه‌رۆكێ بنگه‌هێ لالش باس ل وێ چه‌ندێ كر،دڤێت ب زمانێ ديالۆگێ و رێككه‌فتنێ هه‌ر ئاريشه‌يه‌كا هه‌ى سه‌باره‌ت ب ڕێڤه‌برنا وان ده‌ڤه‌ران ب ره‌زامه‌نديا هه‌موو ئاليان بت نه‌ك ئاليه‌ك خۆ ب سه‌ر ئاليه‌كێ دى دا ب سه‌پينت، هه‌لبه‌ت وى چاغى دێ ململانێ زێده‌تر بن و خه‌لك ژى دێ كه‌ڤنه حاله‌ته‌كا نه‌يا جێگير يا ئێمناهيێ دا و خزمه‌تگۆزاى ژى ب سستى دێ ئێنه پێشكێشكرن.
جردۆ ئاماژه ب وێ چه‌ندێ دا پرسا ده‌ڤه‌رێن سه‌ر ب پارێزگه‌ها مووسل ڤه،دڤێت ب ڕه‌زامه‌‌‌نديا هه‌موو ئاليان بێنه چاره‌سه‌ركرن دوو ژ خورتكرنا ململانێ و ژێك دووركه‌فتنێ.
تُتاح هذه الصورة أيضا في: کوردی
