سەرۆك وەزیر مەسرور بارزانی رەفتارێن نهۆ یێن بەغدا بەرامبەر هەرێما كوردستانێ رەت دكەت و ته‌كه‌زێ دكه‌ت كو ئەو دخوازن پەیوەندیێن هەولێر و بەغدا ڕاست ڤه بكەن.
ل دەمژمێر 10:00ێ سپێدەهیا ئيرۆ شەمبوويێ، 11-01-2025، ل باژێرێ هەولێرێ، ب ئامادەبوونا مەسرور بارزانی، سەرۆكێ حكومەتا هەرێما كوردستانێ، قوباد تاڵەبانی، جێگرێ سەرۆكێ حكومەتێ، نوێنەرێن هەرێمێ د حكومەتا فیدراڵ دا و سەرۆكێن فراكسیۆنێن كوردستانی یێن هەمی لایەنان، جڤینەكا نە ئاسایی یا ئەنجوومەنا وەزیران دەربارەی پرسا مووچە و مافێن دارایی یێن هەرێما كوردستانێ ل حكومەتا فیدراڵ دەست پێ كر.
سەرۆكێ حكومەتا هەرێما كوردستانێ د دەستپێكا كۆمبوونێ دا، راگەهاند “ئەم گەهشتینە وێ قەناعەتێ كو ئەڤ رەفتارا نهۆ بەغدا بەرامبەر هەرێما كوردستانێ دكەت، سته‌م و نەدادپەروەريه و نائێتە قەبوولكرن ژی.”
سەرۆك وەزیرێ هەرێما كوردستانێ گۆت ژی: “دڤێت ئەم ڤێ پەیوەندیێ (پەیوەندیا هەولێر و بەغدا) راست بكەین؛ دەستوورەك مە يێ هەی و دڤێت ئەم پابەندێ ڤی دەستووری بین.” باسى وێ چه‌ندێ ژی كر “دادگەها فیدراڵی، تنێ د بەرژەوەندیا حكومەتا فیدراڵی دا، بریار دەركرینە و قەت بریارەك دەرنەكریە كو بەرژەوەندیا خەلكێ هەرێما كوردستانێ تێدا بیت.”
سەرۆكێ حكومەتا هەرێمێ ئەو ژی دیار كر “دڤێت د ساڵا 2025ێ دا كارەكی وەها بكەین دا خەلكێ مە ژ ڤێ نیگەرانیا دەروونی دەركەڤت. خەلكێ مە نە هه‌ژى وێ چەندێ یە ب ڤی رەنگی سه‌ره‌ده‌رى دگەل بێتە كرن. خەلكێ كوردستانێ هه‌ژى وێ چەندێ یە رێز ل خەبات و قوربانیدانا وی بێتە گرتن وەكی هەموو خەلكێ دی یێ عيراقێ.
مەسرور بارزانی د دكۆمبوونێ دا ئاماژە ب وێ چەندێ ژی دا “ئەم داخوازا یەكسانی و مافێن خۆ یێن دەستووری دكەین و داخواز دكەین چ د ئاستێ ئیداری دا، چ د ئاستێ كاركرنێ دا ب هەر رەنگەكی، ئه‌م هەموو، هەموو بزاڤێن خۆ بكەین كار دا بكارين ئەڤ كێشە و ئاسته‌نگێن هەین راست بكەین و ئێدی پەیوەندیەكا ساخلەم د ناڤبەرا هەولێر و بەغدا دا دروست ببت.”
وەكی ئەوا سەرۆك وەزیری باس لێ كری “ئەڤ سه‌ره‌ده‌ريا نهۆ یا بەغدا دگەل هەرێما كوردستانێ، سه‌ره‌ده‌ريا كیانەكێ فیدراڵی نینە. دگەل پارێزگەهەكێ ژی ب ڤی رەنگی سه‌ره‌ده‌ريێ ناكەت.”
تُتاح هذه الصورة أيضا في: کوردی
