تۆرا لالش
رێڤه‌به‌ریا گشتی یا هاتن و چوونێ یا هه‌رێما كوردستانێ راگه‌هاند كو پێتڤییه ماتورێن كومپانیێن گه‌هاندنا خوارنێ ل هه‌رێما كوردستانێ بهێنه تومار كرن و مه‌رجێن سه‌لامه‌تیێ د ناڤدا هه‌بن، ئه‌گه‌ر نه كومپانی دێ هێنه سزادان.
رێڤه‌به‌ریا گشتی یا هاتن و چوونێ ئیرۆ ل رێكه‌فتی ٢٣ێ شوباتا ٢٠٢٥ دیار كر كو هه‌ر ماتۆره‌ك مه‌رجێن سه‌لامه‌تیێ تێدا نه‌بن، نابت كومپانی ده‌رفه‌تا كاری بده‌تێ، به‌روڤاژی، كومپانی دێ به‌رپرسیارێ بت ژ سه‌رپێچی و سزایێن دارایی یێن ماتورێن نه‌ناسكری و نه‌تومار كری.
ده‌رباره‌ی شێوازێ تومار كرنا سه‌رپێچیێن ماتۆران، هاتن و چوونا هه‌رێمێ دبێژت كو ئه‌و ماتورسوارێن د بۆری دا ل كومپانیان كار كرین و سه‌رپێچیێن هاتن و چوونێ كرین و سزا هاتینه سه‌ر وان، ب ناسینا لۆگویێ تایبه‌ت یێ كومپانیێ، به‌رپرسیاریا كێمته‌رخه‌میێ دكه‌ڤیته ستویێ كومپانیان.
ده‌رباره‌ی شێوازێ وه‌رگرتنا پاره‌یی سه‌رپێچیان ژ وان كومپانیێن هاتینه سزادان، رێڤه‌به‌ری دبێژت كو رازینه برێ پاره‌یێ سزایێن سه‌رپێچیان ب داشكاندنێڤه بده‌ن، هه‌تا داویا ئه‌ڤ سالێ ژی ئه‌ڤ ده‌رفه‌ته دێ به‌رده‌وام بیت، هه‌روه‌سا دكارین ب قیست پاره‌یێ سزایان بده‌ن، لێ پشتی وێ دیروكێ كومپانی دێ رووبه‌رووی لێپێچینێن یاسایی و راگرتنا كاران بیت.
ژ بۆ ره‌چاڤ كرنا دوخێ ده‌روونی یێ هاوه‌لاتیان و پاراستنا ژینگه‌هێ، هاتن و چوون داخواز دكه‌ت كو پێتڤیه هه‌ول بهێته دان كو بۆ گه‌هاندنا خوارنێ بۆ گه‌ره‌كێن ناڤ باژێری ماتورێن كاره‌بایی و بێده‌نگ بهێنه به‌كار ئینان، هه‌موو ماتۆر نه‌بنه ئه‌گه‌رێ بێزاریێ.
ده‌رباره‌ی سه‌لامه‌تیا ماتۆرسواران، رێڤه‌به‌ری هه‌روه‌سا دبێژت كو پێدڤیه كلاڤ ل سه‌ری خۆ بكه‌ن و جلك و به‌رگێن تایبه‌ت بپوشن، هه‌ر كومپانیه‌ك پێتڤیه جلك و به‌رگێن تایبه‌ت یێن خو هه‌بن و باجێن تایبه‌ت ل ته‌خا یه‌خا وان بن كو ناڤێ سیانی و كودێ كومپانیێ ل سه‌ر بن.
تُتاح هذه الصورة أيضا في: کوردی
