تۆرا لالش
ئیرۆ 34 سال ل سەر کۆچبەرییا ملیۆنی یا ساڵا 1991ێ یا خەلکێ هەرێما کوردستانێ دەرباز دبن، ئەڤ کۆچبەرییە ژ بۆ رەتکرنا رژێما وی دەمی یا بەعسێ بوو.
نێزیکی 10 رۆژان پشتی راپەڕین و ئازادکرنا پرانییا باژێرێن باشوورێ کوردستانێ ژ دەستێ رژێما بەعسێ، ل 31ێ ئادارا ساڵا 1991ێ، لەشکەرێ وی دەمی یێ عیراقێ هێرشەکا بەرفرەهــ یا ئەردی و ئاسمانی کرە سەر باشوورێ کوردستانێ، د ئەنجامدا، نێزیکی ملیۆنەک و 500 هزار کورد، مال و سامانێ خوە ب جهـ هێلان و ب رێیێن دژوار دا خوە گەهاندنە سنۆرێن ئیران و تورکیایێ.
کۆچبەری یا ژ وەلاتی دژوار و زەحمەت بوو، زارۆک و پیر و نەساخان زێدەترین ئازار کێشان، ئاڤ، خوارن، چادر و دەرمان و چارەسەرییا پزیشکی ب کێمی بدەست دکەفتن و هه‌زاران کەس ب تایبەتی زارۆک و مەزن، ژ بەر سەرما یێ گیانێ خوە ژ دەست دان.
د ماوەیەکێ کێم دا، ژمارەکا زۆر یا کەمپێن دەمکی ل سەر سنۆرێن وان هەردوو وەلاتان دروست كرن، ل گۆر کۆمسیۆنا بلند یا نەتەوەیێن یەکگرتی بۆ پەنابەران، هەتا 6ێ نیسانا 1991ێ، 750 هزار کورد گەهشتنە ناڤ سنۆرێ ئیرانێ، 280 هزار گەهشتنە ناڤ سنۆرێ تورکیایێ و 300 هزارێن دی ل سەر سنۆرێ وی وەلاتی مان.
ئیرانێ هەر زوی سنۆرێن خوە ب رویێ کوردان دا ڤەکرن، لێ تورکیایێ د دەستپێکێ دا رەت کر کو سنۆرێ خوە ب رویێ پەنابەران دا ڤەکەت و پشتی فشارا نێڤدەولەتی و وەرگرتنا هاریکارییا دارایی، ژنووی دەرگەهێ خوە ب روویێ پەنابەران دا ڤەکر.
تُتاح هذه الصورة أيضا في: کوردی
