شێخ شامۆ:دامەزراندنا بنگەهێ لالش وەرچەرخانەكا مێژوویی بوو بۆ ئێزدیان
تۆرا لالش/دهۆك
سەرۆكێ دەستەیا بلندا بنگەهێ لالش یێ رەوشەنبیری و كۆمەلایەتی ل دهۆكێ دیاركر،كو دامەزراندنا بنگەهێ لالش ل12/5/1993ێَ وەرچەرخانەكا مێژوویی بوو بۆ ئێزدیان و ئەڤ بنگەهە بەرهەمێ بزاڤا رزگاریخوازا كوردی بوویە و سەردەستێ كۆمەكا خەمخۆرێن رەوشەنبیرێن ئێزدیان هاتە دامەزراندن،و دا دیاركرن 28 سالێن كەد و خەباتا ڤی بنگەهی كو شیایە ببتە سازییەكا گرنگ و بەرهەمدار ل ناڤ جڤاكا كوردستانێ ب گشتی و یا ئێزدیان ب تایبەتی،هەر بڤێ هەلكەفتێ سەرۆكێ بنگەهی دەستخۆشی ل تایی و نڤیسینگەهێن لالش كر ژبۆ كارابوون و ئەنجام دانا چالاكیێن جودا جودا ل هەموو دەڤەرێن ئێزدیان و داخوازكر بەردەوام ئەڤ بزاڤ و چالاكی بێنە ئەنجام دان ب شێوازهكی كو رێنمایێن خوهپارێزیێ ژ ڤایرۆسێ كرۆنایێ راچاڤ بكهن.
كۆمبوونا ئاسایی یا دەستەیا بلندا بنگەهێ لالش ب سەرۆكاتیا بەرێز شێخ شامۆ سەرۆكێ بنگەهێ لالش ئيرۆ رۆژا شەمبوویێ8ى ئهيارا 2021ێ ب ئامادەبوونا ئەندامێن دەستەیا بلند و بەرپرسێن تایێن بنگەهێ لالش هاتە ئەنجام دان،كو بەحسێ چەندین تهوهر وبابەتێن جودا جودا هاتە كرن.
د كۆمبوونێ دا بەحسێ هەلبژارتنێن داهاتی یێن عێراقێ هاتە كرن و سەرۆكێ بنگەهی هەموو پشتەڤانیا بنگەهێ لالش بۆ سەرێخستنا ڤان هەلبژارتنان دووپاتكر.
ژلایەكێ دی ڤە شێخ شامۆ سووپاسیا حكوومەتا هەرێما كوردستانێ كر بۆ دامەزراندنا دادگەهەكا تایبەت بۆ دادگههیكرنا تاوانێن داعش ل كوردستانێ و ئهڤهژی پێنگاڤەكا مەزن بوو هاڤێتی ئەڤە وێ چەندێ دگەهینت،كو هەردەم حكوومەتا هەرێمێ خۆ ل كێشە و داخوازیێن ئێزدیان كریە خودان.
دتهوهرهكێ دێ يێ كۆمبوونێ دا سەرۆكێ بنگەهێ لالش راگەهاند،كو چاپكرنا زنجیرە پەرتۆكێن بنگەهێ لالش دێ یا بەردەوام بت،و ل دەمەكێ نێزیك ژمارەك ژ وان پەرتۆكێن بەردەست گەل ژمارا نوو یا گۆڤارا لالش دێ كەفتە بەردەستێ خووندەڤانان.
بابەتێ پەرتۆكێن ئێزدیاتیێ ئەوێن ل قوتابخانا دئێنە خووندن ب درێژی دڤێ كۆمبوونێ دا هاتە بەحسكرن و هەول دئێنە دان بۆ دووبارە پێداچۆن و چاپكرنا وان،بنگەهێ لالش هەولدایە ئەڤ پەرتۆكنە دسیستەمێ پەروەردا عێراقێ ژی دا بێنە خووندن.
ههروهسا سەرۆكێ بنگەهێ لالش بەحسێ كۆنگرێ بنگەهێ لالش كر و دیاركر كو قەیران لدووڤ قەیرانێ بوویە ئەگەرێ پاشخستنا ڤی كۆنگرەی،لێ ب ئانەها خودێ ئەگەر رەوش یا هاریكار بت تایبەت ژئالیێ پەتایا كۆرۆنایێ ڤە ل دەمەكێ نێزیك ئەمێ حازریێن خۆ بۆ ل دارخستنا كۆنگرەی بكن.
ل داویا كۆمبوونێ گەنگەشە دناڤبەرا ئەندامێن دەستەیا بلند و بەرپرسێن تایێن بنگەهێ لالش لسەر گرنگترین كار و چالاكیێن بنگەهێ لالش هاتە كرن.
تُتاح هذه الصورة أيضا في: کوردی