تۆرا لالش
ل نیڤرۆ یا ئيرۆ سێ شه‌مبوويێ 18-3-2025ێ، ل باره‌گايێ بنگه‌هێ لالش ل دهۆكێ، درێوره‌سمه‌كێ دا په‌رده ل سه‌ر پانوراما شنگال هاته لادان، كو دهربرينێ ژ جينۆسايدا ئێزديان دكه‌ت.
ب به‌رهه‌ڤبوونا د. كاروان محه‌مه‌د سابير، ژ نڤيسينگه‌ها به‌رێز( مه‌سرور بارزانى) سه‌رۆكێ حكومه‌تا هه‌رێما كوردستانێ و سه‌رۆك و ئه‌ندامێن ده‌سته‌يا بلند و هه‌ژماره‌كا به‌رپرسێن حكومى و حزبى و داى شه‌مێ نوورا قوربانيان و رزگاربوويان، په‌رده ل سه‌ر پانوراما شنگال هاته لادان.
درێوره‌سمان دا، جه‌عفه‌ر سمۆ، ئه‌ندامێ ده‌سته‌يا بلندا بنگه‌هێ لالش دپه‌يڤه‌كێ دا بخێرهاتنا ئاماده‌بوويان كر و دياركر، كو تابلۆيه‌كا پانورامى ژلايێ شێوه‌كار ئارام ناسر خه‌لكێ هه‌ولێرێ ڤه هاتيه دروستكرن و ئه‌ڤه دچارچووڤێ بزاڤ و چالاكيێن به‌رده‌وام يێن بنگه‌هێ لالش دايه ب پشته‌ڤانيا نڤيسینگه‌ها سه‌رۆكێ حكومه‌تێ، بۆ هندێ هه‌ر كه‌سه‌كێ ل ده‌مێ سه‌ره‌دانا بنگه‌هێ لالش دكه‌ت هه‌ست ب ئێش و ئازارێن ئێزديان بكه‌ت، ژبه‌ر جينۆسايدا ب سه‌رێ ئه‌واندا هاتى ل سه‌ر ده‌ستێ تيرۆرستێن داعشێ.
لدووڤدا سه‌عيد جردۆ، سه‌رۆكێ بنگه‌هێ لالش په‌يڤه‌ك پێشكێشكر و گۆت: ئيرۆ جهێ شانازيێ يه بۆ مه وه‌كو بنگه‌هێ لالش ب هه‌ڤكارىیا نڤيسينگه‌ها سه‌رۆكێ حكومه‌تا هه‌رێما كوردستانێ كاره‌كێ هونه‌رى بهێته دروستكرن ئه‌و ژى (پانوراما شنگال)ـه كو دهربرينێ ژ جينۆسايدا ئێزديان دكه‌ت و ئه‌و ئاخ و به‌رێن پيرۆز يێن ڕێكا لێقه‌وميايى يێن جينۆسايدێ تێدا ده‌ربازبووين هاتينه دانان داكو جۆره پيرۆزيه‌كێ بده‌ته ڤى كارى.
ژلايێ خۆڤه، ئارام ناسر، شێوه‌كارێ تابلۆيێ دياركر، ئه‌ڤ كاره د گه‌له‌ك قۆناغان ڕا ده‌ربازبوویه، ئێك ل هه‌ولێرێ وه‌كو تابلۆ و يا دووێ ل بنگه‌هێ لالش و نێزیكی هه‌یڤه‌كێ مژوولی ئه‌نجامدانا ڤی كاری بووین، درێژاهیا تابلۆيێ شه‌ش مه‌ترێن پێوانه‌یی یه و تابلۆ دوو مه‌تر و بیست سانیتمه‌تران یا بلنده و بلنداهیا گشتی نێزیكی چار مه‌ترایه و رۆناهیا كه‌هره‌بی ژی تێدا هاتیه بكارئینان، ناڤه‌رۆكا ڤی كاری ده‌ربرینێ ژ ئاواره‌بوونا خه‌لكێ شنگالێ ل سالا 2014ێ ل شنگالێ دكه‌ت، هیڤیدارم ئه‌ڤ كارێن هونه‌ری ل جهێن دیتر یێن كوردستانێ و جیهانێ بێنه ئه‌نجام دان، داكو ب جیهانێ بێژین ئه‌ڤه زولم و سته‌ما د دیرۆكێ دا ب سه‌رێ مه ملله‌تێ هاتی ئه‌گه‌ر ژی نه‌ژادێ مه بوویه چنكو مه پاراستنا وێ دكر.
پاشان په‌رده ژلايێ داى شه‌مێ وه‌كو نوونه‌را قوربانى و رزگاربوويان ل سه‌ر پانوراما شنگال هاته لادان.
هه‌ر ژ ده‌ستپێكا جينۆسايدا ئێزديان ل سه‌ر ده‌ستێ رێكخراوا تيرۆرستى یا داعش، بنگه‌هێ لالش يێ ره‌وشه‌نبيرى و كۆمه‌ڵايه‌تى ل دهۆكێ ده‌ست ب ديكيۆمێنتكرنا جينۆسايدێ و ڤه‌حواندنا ئاواره‌يان و دانه‌نياسينا كه‌يسى ل سه‌ر ئاستێ ناڤخۆ و نێڤ ده‌وله‌تى كر و تا نوكه به‌رده‌وامه.
تُتاح هذه الصورة أيضا في: کوردی
