خۆراگریا ژنا ئێزدی د كارەساتا شنگالێ دا
تۆرا لالش یا راگەهاندنێ/سالار فائز 
ژنا ئێزدی ب هەزاران سالا خەبات و بزاڤ كریە پێخەمەت وەلاتێ خۆ و خۆگۆری كریە بۆ پاراستنا ئاین و نەتەوەیێ خۆ مل ب مل ل گەل زەلامی،و هەر ژنەكێ ب رەنگەكی خەبات و بزاڤ كریە قۆناغ ب قۆناغ ل دووڤ كاودانا،گەلەك جاری ژنا ئێزدی چەك هلگرتی یە و گەلەك جاری خامە هلگرتی یە وەك هۆیەك بەرامبەری دوژمنێ خۆ راوەستت یان گەلەك جارا و هەتا ئیرۆ ژی ژنا ئێزدی ئەگەر هەردوو نەكاری بن ژی خوارن و هاریكاری پێشكێشێ شەرڤانێن وەلاتێ خۆ كریە،دیسا ژنا ئێزدی ئیرۆ بوویە پەیامەكا مرۆڤایەتی كو ئێش و ئازارێن مللەتێ خۆ نیشا جیهانێ بدەت و ب سەدان ئیرۆ رۆژ بەشداری كونگرا و سیمنارا دبن و كاردكن خۆبەخش ل رێكخراوا.
چالاكڤان”گولیستان حەسەن”دبێژت: ژنا ئێزدی ئەو مرۆڤەیە پشتی هەفتی و چار فرمانا دبێژت نامرم هاتە كوشتن سۆتن فرۆتن،لێ نائێتە گهورین و هەردەم ژنا ئێزدی بوویە قەلا بەرخودانێ و قوتابخانا ژیانێ و رەوشت و تیتال و زمان ژ وێ دەستپێدكت،هەتا نها ژنا ئێزدی بەرەڤانیێ ژ وەلاتێ خۆ دكت چ ب چەكێ خۆ یان خامێ خۆ …هتد،و ب هەزاران كچێن ئێزدی هاتن كوشتن پێخەمەت ئاین و نەتەوە و وەلاتێ خۆ وهەتا نۆكە ب سەدان ژ وان ل زیندانێن داعشێ دا دگرتینە ،لێ ئەز دەنگێ خۆ دگەهینم ژنا ئێزدی بتر بەردەوام بت سەر بزاڤ و خەباتا خۆ و ئەڤ بەردەوامیا وێ و خۆراگریا وێ باشترین رومە بۆ سنگێ دوژمنی.
نڤیسكار”مەیان خێری بەگ” گۆت:ئەو ئێش و ئازارێن ژنا ئێزدی كەفتیە تێدا مەزنترن ژ دەریا و ئۆقیانۆسا ب هەزاران سالا و تایبەت پشتی كارەساتا چیایێ شنگالێ ژ رەڤاندنا وان و كوشتنا وان و بێبنكرنا وان و بازرگانی كرن ب وان و هەتا خلاس بن ژی ژ دەستێ داعشێ هندەك برێڤە دمرن یان دزڤرنە ناڤ جڤاكێ خۆ پشتی وێ زلمێ و شەرمێ تووشی نەخۆشیێن دەروونی دبن ،تایبەت پشتی ڤەكۆلەرەكی لێكۆلینەك سەر كری كو 90 ژ سەدێ ئەو كچێن ئازادبن ژ دەستێ داعشێ تووشی نەخۆشیێن دەروونی دبن،سەر هندێ را ئافرەتا ئێزدی كەلها خۆڕاگریێ بووە و راوەستیایە و هەڤركی كریە گەل ڤان بارودۆخا و پێنگاڤێن پیرۆز هاڤێتینە و مل ب ملێ زەلامی كاركریە ب هەموو رەنگا چی ب چەكێ خۆ یان خامێ خۆ ،سەر هەموو وان ئاستەنگێن تێنە رێكا ئافرەتێ لێ وێ چوچاری خۆ رادەستی ژیانێ نەكریە و تایبەت ئافرەتا ئێزدی ل ڤێ قۆناغێ دا شەرڤان و پێشمەرگە بوویە و مێژوو دێ بتە بەلگە سەر ڤێ چەندێ و دیسا ژبلی ڤێ هەموویێ دڤێت رێز و هەیبەتا خۆ هەبت ئافرەتا كوردی ب گشتی،چوكو ئەو تشتەكێ پیرۆزە ل جڤاكی ئەوە دبتە دەیك و كچ و خوشكا مرۆڤی.
سوزان سەفەر،بەرپرسا رێكخراوا داك بۆ گەشەپێدانا ئافرەتا ئێزدی و ئەنداما دەستەیا بلندا بنگەهێ لالش ل دهۆكێ دبێژت: ژنا ئێزدی هەر ژ پەیدابوونا ڤی ئاینی ب هەزاران سالا مل ب ملێ زەلامێ ئێزدی هەڤركی كریە ل گەل ژیانێ د هەموو بیاڤێن ژیانێ دا،بەلێ ل كارەساتا شنگالێ ژنا ئێزدی جارەكا دی دەنگ ڤەدا ل جیهانێ ب زیرەكی و خۆراگریە خۆ ،ژنا ئێزدی كاری بەشداری چەند كۆمبوون و كۆنگرێن نێڤ دەولەتی بت ب سەرفەرازی و شێرانە و كاری بەحسێ تاوانێن هۆڤێن داعشێ بكت وەك كوشتن و رەڤاندن و بێ بنكرن و هەر ب كەرامەندی شیا دەنگێ خۆ بگەهینت دەولەتێن ئاشتی خواز ل سەرانسەری جیهانێ و بتنێ ژنا ئێزدی كاری دەنگێ ئافرەتا عێراقێ بگەهینت جیهانێ و بەحسێ وان ئێش و ئازارا بكت،لەورا ئەم دكارین بێژین ژنا ئێزدی سەروەرا ئافرەتێن رۆژهەلاتا ناڤینە تێتە قەلم دان ،باشترین و پیرۆز ترین دوو تشت كو ژنا ئێزدی پاراستین زمانێ كوردی و نەتەوا خۆ و یا دی ئاینێ پیرۆزێ ئێزدی.
تُتاح هذه الصورة أيضا في: کوردی