په‌رده‌پوشیا قه‌یره‌بوونێ پتر كچێ ژ كوری ڤه‌دگریت
جوان عزت
هه‌موو ملله‌تان كه‌لتور، گۆتن دابونه‌ریتێن خوه هه‌نه و د ڤی ژیواری دا هه‌ر جڤاكه‌ك ل سه‌ر وی كه‌لتوری ب رێڤه دچیت وه‌كی ده‌ستووره‌كێ دهێته دانان كو هه‌ر كه‌سه‌كێ پێدڤی ب وی ده‌ستووری هه‌یه و بوویه پشكه‌ك ژ ژیانا مه یا رۆژانه و هه‌تا نها ژی گه‌له‌ك پێگریێ پێ ده‌كه‌ن، لێ ل ڤێره تشێ هه‌ره گرنگ كو پتر مه د ناڤا ڤێ شێل و بلێ دا دبه‌ت ئه‌وه كو هه‌تا نها ئه‌ڤرۆیا مه‌یه، هێشتا ئه‌م نه‌شیاینه ڤاڤارتنه‌كێ بێخینه وان گۆتنان ئه‌وێن كو ئه‌م بزانێن دێ ب كێر مه هێن، لێ تشتێ سه‌یر و گرنگ د ڤێ مژارێ دا كو من دڤێت ئاماژێ پێ بده‌م! ئه‌وه كو ئه‌گه‌ر ئه‌م به‌حسێ ناڤه‌رۆكا كچێ بكه‌ین كو هه‌بوونا كچێ د ناڤا جڤاكی دا دبیته فاكته‌ره‌كێ هه‌ری گرنگ د مژار و پێگه‌هان دا چ جوداهی د ناڤبه‌را كچ و كۆڕی دا نینه كچ ژی ئێك ژ وان كه‌سایه كو ده‌ستپێكێ ل سه‌ر پێگه‌هه‌كێ ره‌وشت به‌رزیێ هاتیه په‌روه‌ده‌كرن و مه‌زنكرن و رۆژ بۆ رۆژێ ژ ژیوارێ نه‌زانینێ ده‌ركه‌ڤتیه تاكو گه‌هشتیه قووناغا تێگه‌هشتنێ و هه‌بوونا وێ د ناڤا جڤاكی دا ده‌نگ ڤه‌دایه و بوویه پالده‌ره‌ك و مل ب ملێ كوری كار كریه تاكو شیایه به‌رێخودانا خوه د ڤی وری دا بكه‌ته ره‌نگڤه‌دانه‌ك بۆ ئاڤاكرنا جڤاكی خوه، لێ ئه‌و شێل و بێلا ئه‌م نها تێدا دژین، ئه‌و بوویه كو مه خه‌لكه‌ك هه‌یه كچێ د ژییه‌كێ كێم دا دهژمێریت قه‌یره كچ!، لێ ئه‌گه‌ر ئه‌م ته‌ماشه بكه‌ین كو د ڤی سه‌رده‌می دا پێشكه‌فتن رۆژ بۆ رۆژێ یا به‌ر ب ئاستێن بلند دچیت و د ڤی ژیواری دا نه‌بتنێ كچ دبیته قوربانی ڤان دابونه‌ریتان، به‌لكو كۆڕ ژی د ڤی ئیتاری دا دبیته قوربان، به‌س ئه‌ڤ په‌رده‌پوشیا قه‌یره‌بوونێ پتر كچێ ڤه‌دگریت ژ كۆڕی! چونكی كچ مالێ خه‌لكی یه و دێ چیته د ماله‌كا دی دا.
ل ڤێرێ دیسان هه‌ر كچن خوه دبینن ره‌وشنبیریا گوندان و ژیار و ده‌ستوورێن عشیره‌تیێ! ب راستی ئه‌م ژبیر دكه‌ین كو ئه‌ڤرۆ مه حكوومه‌ته‌ك و چه‌ندین رێكخروێن گرێدای مافێن ئافره‌تان هه‌نه و مه پلان و ستراتیجیێن خوه هه‌نه ژبۆ هه‌ر پرسه‌كێ گه‌شه‌پێدانه‌كێ، یان گهۆرینێن پێشداچوونێ، هه‌روه‌سا دگه‌ل ڤێ چه‌ندێ كو مه په‌رله‌مانتارێن ئافره‌ت و كه‌سێن خودان شیان و شاره‌زا خوه‌دی سه‌بۆر هه‌نه كو بشێن پشكداریێ د دانا بریاران و پلان و وه‌را پێشداچوونێن جڤاكی دا و سه‌ركێشیا گهۆرینان بكه‌ن، لێ ب مخابنی ڤه كو ئه‌ڤرۆ چه‌ندین چیرۆك سه‌رهاتیێن كچێن قه‌یره د ناڤا جڤاكێ مه دا ده‌نگڤه‌دانه‌ك هه‌یه كو رۆژ بۆ رۆژێ یێ به‌ر ب رێژه‌كا زۆر دچن و تانوكه ژی وه‌كو ئالیێن په‌یوه‌ندیدار ژلایێ حكوومه‌تێ ڤه چ بۆ نه‌هاتیه كرن وه‌كو دابینكرنا مووچه‌یه‌كی، ئانكو هه‌بوونا هاریكاری و مه‌زاختیێن پێدڤیێن وان هه‌ردیسان رۆلێ رێكخراوێن ئافره‌تان وه‌كو دانا سمینار و ورك شوپان بۆ زڤرینان هزروبیرێن دایك و بابێن وان، چونكی گه‌له‌ك جاران ژبه‌ر چه‌ندین ئه‌گه‌رێن خێزانی و بنه‌مالێ كچ دمنیت قه‌یره، ئانكو چه‌ندین خولێن كاركرنێ بۆ ڤان كچان ئه‌ڤه هه‌می ئه‌گه‌ر هه‌بووینه ژی ژلایێ رێكخراوێن مافێ ئافره‌تان كو ب رێژه‌كا زۆر كێم بوویه، له‌ورا پێدڤیه حكوومه‌ت و رێكخراو و ره‌وشنبیر و شاره‌زایێن جڤاكی ب رۆله‌كێ كاریگه‌ر رابن به‌رامبه‌ر ڤێ كاره‌ساتێ، داكو ئه‌ڤرۆ كچ نه‌بیته هێمایێ قوربانیدانا دابونه‌ریتان، ئانكو د ژیوارێ خێزانێ دا نه‌بیته قوربان، یاگرنگه رۆنكرنه‌كا باش ل سه‌ر كه‌یسێن هوسا بهێته شرۆڤه‌كرن دا كو كچ هه‌ست پێ بكه‌ت ئه‌ڤرۆ جڤاكی پێدڤی یا ب خزمه‌تا وێ هه‌ی و نه‌هاتیه پێش گوهاڤێتن و خوه‌نه هه‌ژمێرن (قه‌یره كچ).
تُتاح هذه الصورة أيضا في: کوردی
