ژ جەژن و هەلكەفتێن ئێزدیان”جەژنا خدرلیاس”
پارێزەر:سالار فائز /ئەلمانیا
جەژنا خدرلیاس ئێكە ژ جەژنێن پیرۆزێن ئێزدیان ئەڤ جەژنە دكەفتە د پێنچ شەمبوویا ئێكێدا ژ مەها سباتا رۆژهلاتی،سێ رۆژا بەرهنگی ئانكو رۆژا دووشەمبوویێ و سێ شەمبوویێ و چار شەمبوویێ و رۆژا پێنچ شەمبوویێ جەژنە و ڤێ جەژنێ ژی گرێدانەك ب وەرزێ چاندنێ و سروشتی ڤە هەیە، ئەڤ سالە ل رێككەفتی 16/2/2017ێ جەژنە و ناڤێن (خدر و لیاس) ل گەلەك ئاینان هەینە و هەر ئێك ب ڕەنگەكی بانی وان دكت،بەلێ ل هەموو ئاینان هەر مەرەما وان ژێ ئەڤ هەردوو برایێن ئێكن كو دوو كەسێن چاكسازبوون ئێزدی دبێژنێ خدر لیاس و ئاینێ یهودیا دبێژتێ ئەیلیا و كرستیان دبێژنێ جرجیس و بسرمان دبێژنێ خچر الیاس،بەلێ ئاینێ هندۆسی دبێژنێ خواجە خدر.
رێ و رەسمێن جەژنێ:ل رۆژا دوو شەمبوویێ هەر مالەك هندەك دەخل و دانی دقەلینت و دبێژنێ قەلاتك ئەڤ قەلاتك پێكدئێن ژ گەنم و جەه و نۆك و نیسك و خۆی و گارس و دەندك) پاشی ل رۆژا چارشەمبوویێ قەلاتكا د هێرن دبتە پێخوون،پاشی هندەك پێخوونێ ل گەل دۆشاڤێ ڤەدستێرن دبێژنێ (خەبیسە) هەر دیسا ل رۆژا چارشەمبوویێ ئانكو هێڤارا جەژنێ كابانیێن مالا هندەك پێخوونێ دسێنیكەكێ دكن و دانێن سەر خانیێ مالێ ب وێ هیڤیێ كو خدر الیاس نیشانەكێ لێ بكت،ل سبەیكا جەژنێ ساڤارێن هێرای و هندەك قەلاتكا دكەنە زادێ جەژنێ دبێژنێ (جەرخووس )،جۆتیار هندەك پێخوونێ ل زەڤی زارێن خۆ دڕەشینن بۆ خێر و بەرەكەتێ و گوندی قەستا نیشانگەها دكن تایبەت نیشانگەها خدر لیاس ل باعەدرێ،ل ڤێ جەژنێدا وەكی هەموو جەژنێن ئێزدیا هندەك بیر و باوەر هەینە ژ وانا ل رۆژێن رۆژیا و جەژنێ , نێچیر قەدەغەیە و سەر بڕ نائێنە سەرژێكرن ژبەر ل باوەریا ئێزدیاندا ئەڤە دەستپێكا دەمێ جووت بوون و زۆربوونا گیانەوەرایە ،هەروەسا داربڕین گونەهە ژبەر پاراستنا ژینگەهێ و جوانیا وێ و بەرەف وەرزێ بەهارێ ڤە چوون، دیسان ل وان رۆژان دا ئێزدی ب رێ و رێبارێن دوور ناچن و د ئاڤێ ناكەڤن ،باوەریەك هەیە گرێدایی ب گەنجا ڤەیە د رۆژا جەژنێدا هەر گەنجەكی د خەوا خۆدا ئاڤێ ل مالەكێ ڤەخۆت دێ قیزا وێ مالێ بتە هەڤژینا وی و هەمان باوەری بۆ قیزێ ژی هەیە.
ڤێ جەژنێ گرنگیا خۆ دناڤ ئێزدیاندا هەیە و ب ئێك ژ جەژنێن هەرە كەڤن دئێتە هژماڕتن ل پتریا مللەتێن كەڤن , ل دەڤەرا رۆژهلاتا ناڤین , رێ و رەسمێن ڤێ جەژنێ دگێران ، جڤاكێ ئێزدی ئێك ژ وان جڤاكایە , رێ و رەسم و بیر و باوەرێن ڤێ جەژنێ پاراستینە و هەتا نۆكە گرنگییەكا زۆر پێ ددەن , خدر و لیاس دناڤ ئێزدیاندا دوو چاكێن خودێنە و ئێزدی گرنگیێ د دەنە ڤێ جەژنێ و هەردووچاكا جەژنا وان دئێتە گێران و پووتەكا مەزن ددەنە ڤان هەردوو ناڤا و (خدر و لیاس) چەندین نیشانگەهێن (خدر , لیاس) ل گوند و دەڤەرێن ئێزدیا و پەرستگەها پیرۆزا لالش هەینە و ناڤێن وان ل گەلەك تێكستێن ئاینی دا هاتینە و ئەڤ هەردوو چاكنە برایێن ئێكن و لەشێن وان ل لالشێ هاتینە ڤەشارتن،ل ڤێ جەژنێ گۆتنەك هەیە ( خدر لیاس و سال خلاس ) ئانكو پشتی ڤێ جەژنێ سەرما و سر و سەقەم دشكێت و بەرەف وەرزێ بەهارێ ڤە دچین.
تُتاح هذه الصورة أيضا في: کوردی