بارودۆخێن ناڤخۆی و هەرێمایەتی د گونجاینە بۆ ئەنجام دانا ریفراندۆمێ
خالد خدر 
رۆژ بۆ رۆژێ ژڤانێ پرۆسا ریفراندۆمێ ل هەرێما كوردستانێ نێزیك دبە هۆسا دئێتە خویاكرن كو ب هیچ شێوەكی داگێرانێ ژ ئەنجام دانا ریفراندۆمێ ناكەن ، بتایبەتی كو رێزدار (مەسعوود بارزانی ) سەرۆكێ هەرێما كوردستانێ ئەو چەندە دایە خویاكرن و دووپاتی لێكریە ل چەندین هەلكەفتان ، تشتەكی سروشتی یە و مافێ هەر مللەتەكی یە كو ریفراندۆمێ ئەنجام بدەت و بۆ هەر پرسەكێ ب تایبەتی ئەگەر گرێدایی پرسا چارەنڤیسێ مللەتەكی بت مینا مللەتێ كورد كو هژمارا وان دگەهتە نێزیكی(40) چل ملیۆن كەسان وهێشتا نەبوویە خودان دەولەت و قەوارەكی سیاسی كوردستان ژ ئەنجامێ پەیمانا سایكس پیكو لسالا 1916 هاتە دابەشكرن لسەر چار وەلاتان (توركیا ،سووریا ، عێراق ، ئیران )، وئەڤە دەهێن سالایە گەلێ كوردستانێ دنالت ژ ستەم و ستەمكاریا وەلاتێن ناڤهاتیێن داگیركەرێن كوردستانێ ، و ل هیچ دەمەكی ڤی گەلێ هەژار و بەلەنگاز تاما خۆشی و شادیێ نەدیتیە لبن دەستهەلاتا ڤان وەلاتێن داگیركەر و لسەر دۆزا خۆیا ڕەوا دەریایەكا خوونێ رێتی یە.
گەلێ مەیێ كوردستانێ ب هیچ شێوەكی بن دەستی و ستەمكاری لسەر خۆ قەبوول نەكرینە و رابوویە ب چەندین شۆرەش و سەرهلدانا ل دژی دوژمنێن داگیركەر ل هەر چار پارچان ، مینا شۆرەشا عوبەیدولایێ نەهری و شیخ عەبدولسلامێ بارزانی و شێخ مەحمودێ حەفید و شێخ سەعیدێ پیران ودڤێ رێكێ دا ل كوردستانا باشوور مەزنترین و دریژترین شۆرەشا هەڤچەرخ گەلێ كوردستانێ كریە ل دژی رژێما عێراقێ ل 11-9-1961 بناڤێ شۆرەشا ئەیلولا مەزن ب رێبەرایەتییا بابێ روحی یێ نەتەوا كورد (بارزانیێ نەمر ) ، كو ڤێ شۆرەشا هەنێ دەنگڤەدانەكا مەزن هەبوو لسەر ئاستێ ناڤخۆی و هەرێمایەتی و نێڤ دەولەتی ، كو بۆ جارا ئێكێ ناڤێ كوردان كەفتە دناڤ دستوورێ دەولەتا عێراقێ دا و پاشی رژێما بەعسا گۆربەگۆر نەچار بوو دانپێدانێ ب مافێ گەلێ كوردستانێ بكەتن ، ئێدی گەلێ كوردستانێ نەما ستەم و بن دەستییێ قەبوول كت ، چنكو هەموو رێك و شێوازێن دوژمنكاریێ ل دژی گەلێ كوردستانێ هاتنە بكارئینان ژئالییێ ڤان وەلاتێن داگیركەر ، داوی دوژمنكاری ئەو بوو شەرێ دڕندەترین و هۆڤانەترین رێكخراوا تیرۆرستی ل جیهانێ ئەوژی داعش لسەر گەلێ كوردستانێ سەپاندن ، بەلێ سوپاس بۆ خودایێ میهرەبان و خۆشبەختانە ئەڤ رێكخراوا ناڤهاتی شكەستنەكا مەزن خوار لسەر دەستێ كورێن گەلێ مە و ب خۆراگری و قارەمانیا پێشمەرگێ كوردستانێ، و ب سەركردایەتیا رێزدار (مەسعوود بارزانی) فەرماندێ گشتییێ هێزێن پێشمەرگێ كوردستانێ كو جەنابێ وی هەر ل رۆژێن ئێكێ یێن ڤی شەری یی ئامادەبوو ل بەرۆكێن پێشیێ یێن شەری وتاكو هەموو دەڤەرێن كوردستانی ئازاد كرنەڤە ژبن دەستێن هۆڤێن داعش.
هەموو كاودان وبارودۆخێن ناڤخۆی و هەرێمایەتی د گونجاینە بۆ ئەنجام دانا ریفراندۆمێ ، ئەڤ ئالیێن دبێژن دەم نەیێ گونجایە ئەو نە دگەل مافێ گەلێ خۆنە،بەلكو بەروڤاژی ئەو دگەل ئاراستەیا دوژمن و داگیركەرێن كوردستانێ نە ، سروشتی یە چ جارا دوژمن و داگیركەرێن وەلاتێ مە نابێژن ئەم دگەل ماف و سەرخۆبوونا وەنە و ل هیچ دەمەكی نەڤێن ئەم بگەهینە مافێن خۆ یێن ڕەوا ،هەروەسا ئەگەر ژ وان بێت ئەو ناهێلن دەولەتا كوردستانێ ژدایك ببت و گەلێ مە ب ڤێ خەونا خۆ یا سەدێن سالایە شادبت ،لەوما پیتدڤیە هەموو گەلێ مە ئێك بگرە و ل ریفراندۆمێ بێژت (بەلێ ).
تُتاح هذه الصورة أيضا في: کوردی