دڤێت كوردێن ئێزدی دوو جاران دەنگ ب بەلێ بدەن
لەید حسێن
25ـی ئەیلۆنا 2017ـێ ناڤ دكن ب رۆژا ریفراندۆمێ بۆ كوردان،لێ ئەو رۆژا دیرۆكی وشانازیا كوردانە ودڤێت هەرتاكەكی كورد چ ل كوردستانا دایك یان ژی ل وەلاتێن ژدەرڤە بت ب خۆشی ودیلان ڤە لڤێ رۆژێ بەرەف سندۆقێن دەنگدانێ بچت وب دەنگێ بەلێ دەنگێ خۆ بدەت.
كوردێن ئێزدی دڤێت دووجاران دەنگ ب بەلێ بدەن،ئێك ژبۆ ب داوی ئینانا وان كارەساتێن جار بجار بزەحمەتتر دبن وپتر خەلكێ مە دكەنە قوربانی ،دوو ژبۆ نەبەرزەكرنا نەتەوەیا كوردینیێ ئەوەكو چەندین لایەن ل وێ چەندێ دگەرن كو كوردینیێ وئۆلا وان یا ئێزدیاتیێ ژئێك جودا بكن وپاراستنا ئێزدیاتیا وان ئەوە كو ب هەزاران سالان بەرەڤانی ژێ كرین وچ كەسی نكاریە بگهۆرت. ئەڤجا ژبەر وێ چەندێ ژی خەلكێ مە ب هەموو تاخ وچینێن خۆ ڤە ول پتریا دەڤەروكەمپێن لێ ئاكنجی وهەروەسا ل وەلاتێ ئەلمانیا ژی لبەرامبەر بنگەهێ لالش ل باژێرێ بیلفێلد ب ئاهنگ وبانگەشێن مەزن پشتەڤانیا خۆ بۆ پرۆسا ریفراندۆما كوردستانا باشوور ئانین زمان وخویاكرن كو كلیلا هەموو كێشا وئاریشێن وان ئەوە ل رۆژا 25ـی ڤێ هەیڤێ ب بەلێ دەنگێ خۆ بدەن وبێژن بەلێ بۆدەولەت وسەربەخۆبوونا وەلاتێ مە ئەو ژی كوردستانە ئەوا ناسیار ب وەلاتێ پێكڤەژیانا هەموو پێكهات وئۆل ونەتەوە،دیسان سۆز بۆ خەباتا كوردینیێ وبەرەڤانیێ ژ هەموو دەڤەروناڤچێن ئێزدی نشین و هەموو كوردستانیان نووكرنەڤە ورەسەناتیا خۆ دووپاتكرن هەر وەكی ل پەیڤا جەنابێ مەلامستەفا بارزانی دا هاتی” كوردێن رەسەن ئێزدینە،ئێزدی نەبن كورد نینن” ،ئەڤجا هەواروگازی بۆ تەڤایە خەلكێ مە بلا كەس هەوە نەخاپینت چنكو ئەم خودانێن ڤێ ئاخێ نە.
گرنگیا ڤێ پرۆسێ بۆ مە وەك ئێزدی ژ پتریا پێكهاتێن دی یێن كوردستانێ پترە ،ئێك ژبۆ پاراستنا ئایینێ مە وئێدی ب ئازادی وئارامی ژیانا خۆ ب بۆرینن ،دوو ژبۆ هاریكاریكرنا جڤاتا ناڤدەولەتی وپتر كۆمكرنا بەلگا ژبۆ ناساندنا وێ كارەساتا بسەرێ مە هاتی وەك جینۆساید ودانانا مافێ مە وەك قوربانی دانا مە ،سێ پارێزگەهـبوونا شنگال بسەر كوردستانێ ڤە ورێڤەبرنا وێ ژلایێ خەلكێ وێ بخۆڤە ،چار ئاڤادانكرنا وان دەڤەران وئینانا خزمەتكاریان،پێنج پترلێگەریان ولێكۆلین ژبۆ رزگاركرنا تەڤایەگرتیێن مە ودانانا مافێ وان قوربانیان بۆ كەسوكارێن وان ،هەروسان ژمارەكا زۆر ژئەگەران یا هەی وپر وگرنگن ومە پالڤەددن بۆ دەنگدان ب بەلێ وسەركەفتنا ڤێ پرۆسێ دا،ئێدی ئەم ژی وەك ئێزدی ژیانا خۆ ب رەوانە وسەرفەرازی برێڤەببن مینا هەر تاكەكێ كورد.
تُتاح هذه الصورة أيضا في: کوردی