هەلبژارتن پرسەكا نیشتمانی یە
جوان عزەت
گەلۆ دڤی ماوێ هەستیار دا پێویستیا مە ب چ هەیە؟ یان ئەم چەند دكارین خۆ لسەر رێیەكا دروست ب دەینە سەپاندن؟ ئەرێ ئەم دكارن دڤێ هەلبژارتنێ دا وان دەستكەفتێن چۆی بزڤرینن ڤە! یان ژی وێ شەراكەتێ تەوازنێ دیسان دروست بكەینەڤە؟ واتە وەكی یادیار كو د ماوێ ڤان چارسالان دا رەوش ب گشتی بەرەف بارودۆخ و ئاستەنگێن مەزن چۆ،كەواتە ئەڤێ چەندێ وەكر كو خەلك بێتە دابرن و تۆرەكرن ژ ڤێ رەوشێ،بەلێ ئەڤە نائێتە وێ واتەیێ كو ئەم دەستان دا هێلین و قەستا پاشداچۆن و بێ باوەریێ بكەین،بەلكو یا گرنگە كار بۆ ڤەگەراندنا وێ هێزێ بكەین، هەتا بكارن جارەكا دی كۆنترۆلا چارەسەركرنا كێشەیێن ناڤخۆیی ئەنجام بدەین.
ل ڤێدەرێ راستە هەلبرژارتن، پرسەكا نیشتمانی یە،چنكو ل هەر وەلاتەكی بت دەما دئێتە ئەنجام دان، ب ئاوایەكی رێك و پێك و سیستەمی دئێتە رێڤەبرن،لەورا دبتە مافەكێ رەوایێ كەسی بەلێ د دیرۆك دەستكەفتێن وی وەلاتی دا، بەردەوام خووندن بۆ هەر جۆرە لایەنەكی دئێتە كرن و تاكێن وی دخوازن ئەوێ خووندنێ ب ئەقلەكێ ئازاد بخوونن و دەنگێ خۆ هێژایی وی جۆرە لایەنی دبینن، یێ كو بزانن ئەڤە دێ بۆ وی مللەتی بتە هێمایێ سەركەفتنێ،بەلێ مخابن ل باشوور هەر تشت دناڤ هەڤ هاتیە تێكهەلكرن،چنكو ژبەر نەبوونا تەوازن و تەوافقێ دناڤبەرا كارێكتەرێن سیاسی دا، ئێدی ناڤ مالەك هاتە دروستكرن كو رێزگرتن و پشتەڤانی بەرەف سستبوونێ بچن،لەورا كەدا ئەوا چۆی ژ هەموو ئالیان ڤە دئەقلێ مرۆڤێ كورد دا نەهاتە وەرگرتن و خووندن و ژێك ڤاڤارتن،بنێرە مرۆڤ ب ئاوایێ هزری، د كارت هەر جۆرە پێكهاتەكێ دا مەزرینت،چنكو هزرا مرۆڤی هەڤبەندیەكە دگەل زانینا راستەرێ كری،ب هزرا من، دەنگدان ژی بەشەكە ژ دامەزراندنا وێ هزرێ بەلێ كەسێ كورد ب شێوازەكێ دی تر نێرینێ بۆ وێ پرۆسسێ دكت چنكو وەسان فێربوویە ب هەست و دلینی كاربكت،لەورا ئەڤێ چەندێ ب ئەركەكێ سەرەكی نابینت.
ئەنجام:گەلۆ دێ چاوان پرسا هەلبژارتنێ د ئەقلێ خەلكی دا دەینە گونجاندن؟ یان دێ چاوان بۆ خەلكەكی سەلمینین كو رێزگرتن ل بەربژێران ئەركەكی نیشتمانی مرۆڤایەتی یە؟ واتا نابت ئەڤ خالە دسەر هزرا مرۆڤێ كورد را دەربازببن، بێ كو خووندنەك بۆ بێتە كرن،چنكو دحوكمێن هەر مللەتەكی دا رێزگرتن، رەفتار و پرەنسیپ بووینە، هەلگرێن خامەیەكێ ئازاد دئەقلێ مرۆڤان دا،لەورا پێویستە تاكێ كورد بزانت كا ئەركێ وی دڤێ قۆناغا هەستیاردا چیە ؟ پاشان ئەو خۆ ببینت وەك پێشرەوەكی مللەتی ل دووڤ دا كەدا بەربژێری ل بەرچاڤ وەربگرت و قەستا ماف، ئەرك و تۆماركرنا دەنگێ خۆ بكت،داكو ژ ڤێ نەهامەتیا قەیرانان دەربازی بن وژیارەكا ئارام ببت.
تُتاح هذه الصورة أيضا في: کوردی