مرۆڤ و ماهیەتا هزرێ
جوان عزەت 
رەوشا گەلێ كورد تێدا دەرباز دبت هەتا ئاستەكی مرۆڤ ژ هێلا نەبوونێ رزگاركریە، بەلێ ئەو گهۆرینێن بلەزێن دجیهانێ دا هاتینە ئاراستەكرن ئیرۆ جڤاكێ كوردی هێلا د دوریانا ئاستەنگێن ژیانێ دا، ژبەركو جڤاكێ كەڤن راستی بوویەرێن هەلوەشاندنێ هاتیە و جڤاكێ نوو ژی هێش نەگەهشتیە كاروانێ ئاڤابوونێ ب راستێ ئەڤە ژی مرۆڤی دهێلت ناڤا دوو دلیێ دا،چنكو جڤاكێ دەرڤە بنگەهێ مرۆڤی ژ مێژە دایە ئاڤاكرن،لسەر ڤی تەڤنی مرۆڤێ كورد هاتە ئاراستەكرن بۆ ئەنجامێ بێ بنگەهیێ و كەفتە د پاوانا مشەخت بوون و هندابوونێ دا، لەورا هێدی هێدی هەست ب پرس و گۆمانان كر سەربارێ وێ چەندێ ژی هاتە بێ باوەركرن، ب راستی دەمێ مرۆڤ لسەر ڤێ دیرۆكێ دسەكنت ئێدی هزرا مرۆڤی بەرەف بنواشەكێ جوداتر دچت،كو مرۆڤەكێ ب بنگەهێ هەبوونێ بێتە ئاڤاكرن و ژ ناسنامە نەریتێن بێ ئەنجام بێتە ڤەقەتاندن،دەستپێكێ بنگەهێ ئاڤاكرنا مرۆڤێ كورد لسەر رێكخستنا سیستەمێ كەلتۆری بوویە، بڤی رەنگی مرۆڤێ كورد ژ گەلەك ئاستەنگان را بوویە هەڤال هەتا بگرە ژلایێ زمان، كارێكتەر،ناسنامەو…هتد ئەڤێ دووئالیزمێ نكاریە رێیا هزرێ بۆ مرۆڤێ كورد ڤەكەت، بەلێ بۆ بریارا وی بوویە ئەگەرێ هەلبژارتنەكا كێم چنكو ئەڤ سیستەمە دگەل وی بەردەوام مەزن، كەهی و پەروەردە بوویە، لەورا نكاریە ژیانەك پۆزەتیڤ ل نك خۆ پەیدا بكت،بڤی مەرجی پێشكەتنا باژێران ژی بەرەف كەلتۆرێ گوندی ڤە چۆ، ئەڤێ چەندێ ژی ئالۆزی دناڤبەرا باژێر و گوندان دا پەیداكر، بەلێ ئەگەر مرۆڤ ب كووری هزربكت ماف، ئازادی و هەبوونا مرۆڤی هەموو گرێدایی مەدەنیەتا باژێرانە،چنكو باژێر هەبوونا دەولەت و سەنتەرێ پراكتیكێ یە، كا چاوان بنگەهێ كەلتۆری هاتیە ئاڤاكرن،ئەها وەسا گرنگە ئازادیا تاكەكەسی و دەولەتا باژێری ژی بێتە دامەزراندن، ژبەر هندێ پرۆسێسا باژێری نە پرۆسێسەك ب سانەهی یە، بەلكو پێتڤی ب پلان و پرۆژەیێن ستراتیژی یە، بنێرە دەمێ مرۆڤ هزر دئاڤاكرنا قۆناغێن گهۆرینێ دا دكت،پێتڤیە هزر د دەربازبوونا ئەنجامێن ئەشیر و نەریتان ژی بكت، ژبەركو هنگی مرۆڤ خاترا خۆ ژ رابردوویی دخازت و بەر ب نیڤ رەوشەنبیریەكێ دچت، بڤی رەنگی مرۆڤ ژ كەلتۆرێ گوندان دەربازی كەلتۆرێ باژێران دبت،هزر بكە مرۆڤێ كورد دناڤ هندەك بەرهەمان دا پەروەردە بوویە، هەتا نهۆ نكاریە كارێكتەرەك جودا بخۆ دروست بكت،بەلكو ئەو لسەر كارێكتەرەك ب ماسك هاتیە بەرهەمدان بڤی رەنگی ئەو هەر رۆژ رووبرووی هزرێن نەچاڤەرێ كری دبت، هەتا بەرهەمێ ژیانا وی بوویە بەرهەمێ خەیال و تێكەلێن هزرا ئەفسانێ، لەورا لسەر ڤێ رێ تەخمینا هەرتشتی نەكریە و وەك پەنابەر لسەر ئارەستەكرنا ڤی زەمینەیی هاتیە راستەرێ كرن،ئەنجام: ئەرێ دێ چاوان كارن خۆ ب مەرجێن سەرهلدانا باژێری راگەهینن؟ یان ژی بین ئەو كەس یێن كو خۆ نێزیكی دەولەتا مودێرنیزمێ دكن؟ واتە، ئەقل سەنتەرێ هەرتشتی یە، لەورا گرنگە ئێدی مرۆڤ پرسا خۆ بكت،پاشی ئەقلێ خۆ لگۆر ماهیەتا هزرا خۆ بكاربینت، هەتا خۆ هەژمێرت ئێك ژ كەسێن خودان، ئەقل، ماف، ئیرادە و باوەری، ئەز باوەرم بڤی رەنگی هنگی هزرا باژێری ژی بخۆ دێ گەهت ئەنجامێ رەوشنگەریێ.
تُتاح هذه الصورة أيضا في: کوردی
