برنە دەرا نانێ گەرم دجڤاكێ ئێزدی دا
ئلیاس نەعمۆ خەتاری
هنجی بەرێ خۆ ددەینە ژیانێ و هنجی مە گوهـ لێ بوویە دێ بێژن بەرێ خۆشتربوو ژنۆكە،بەرێ ژیانەكا گەلەكا ب تام بوو ماڵ یە ب مالێ ڤەبوو هەموو وەكو خوشك و برابوون،رێزگرتن هەبوو عەیب و شەرم هەبوو ئانكو نەوەكی نۆكە بوو ژبەركو ئیرۆ رۆژ گەلەك گهۆرین ل ناڤا جڤاكی دا پەیدابووینە، ل سەردەمێن بەرێ نانپێژی هەر ل مال بوو كارێ كابانییا مالێ بوو كابانی دێ رابا ئار ئینابا و هێڤێندكر دكرە هەڤیر و باش ڤەسترا و باش د نخامت داكو ترش بت هەتا سبێ، ل شەبەقێ دگەل تیرۆژكێن رۆژێ كابانی دچۆنە بەر تەرونا ئاخێ داكو نانی ب پێژن و ب هەڤكاری دگەل ئێك دووا نانێ خۆ دپات، هەلبەت بەری بێنە ماڵ ئەو تەرونا گەرم بجهـ نەدهێلا و كلۆسكێ نەهكا ⁄نۆكا ئان یێن باقلكا یان هەگەر دەهنقوتبا یان هەگەر سەروپێك بان دكرنا دناڤا تەرونێ دا و بۆ ڤراڤینێ و باش د نخامت، پشتی هنگی دێ هاتبانە ماڵ نانێ خۆ بەری خواربا دێ گۆتبانە زارۆكەكی كا ڤان دووسێ نانا بخێر ببە هندەك مالێن جیناران و گەلەك جاران دێ ترارەكێ ماستی و سەرتووی دگەل بربان ئانكو بۆ دانێ تێشتێ بەری تێشتێ بخۆن تێشتەك دبرنە دەر و بەلكو هەتا ئیرۆ رۆژ نان پاتن و برنەدەرا نانێ گەرم ل ناڤا جڤاكێ ئێزدی یا بەردەوامە،هەر هۆسا دان وستاندن دناڤا جیناریێدا هەبوو بێ كو عەیب تێدا هەبت دێ چۆبانە پیڤازەكێ یان دوو باجانا یان دوو هیكا یان پلەكە خۆیێ یان هندەك شەكرێ یان دەهن و ساڤاری و روونی.
ژ ئالیەكێ دن ڤە دچۆنە مالێت ئێك غەرازان وەكی مەرك و ملهێب و قازمە و قالۆغ و تەفشی و چەكوچ و بزمار یان سیتلۆكەكا ئاڤا مالێ یان هندەك بەفرێ هەتا ب جلوبەرگان و پێلاڤان تایبەت ل دەمێن مێهڤانیان و عید و عەرەفاتان و شەهیان و داوەتان، بەلێ ب ئەڤی رەنگی جیناریا بەرێ و ئۆلداشیا بەرێ ب رێڤەدچۆ هەتا ل دەمێ كارێ و كاركرنان دێ باكربانە ئێك و دوو ب هەڤكاری دێ هندەك كار ئەنجامدابان وەكی دەمێ جۆتی و دروونان و شخرە و جێنجران و چنین یان ئاڤاكرن و هنوتنا بانا و برینا لبنان و گەلەك كارێن دی، ئەڤەژی هەموو بۆ وێ چەندێ دزڤرت كو تفاق و تەبایی بەرێ هەبوو و بتربوو ژڤی دەمی، قەولێن مە ئێزدیان ئاماژە ب ڤێ چەندێ دایە و كەرەمكریە و گۆتیە:
تفاق و تەبایی
چۆمە دیوانا پەدشایی
من لێ دیتن خۆشی و شایی
سەرێ هەمووێ تفاق و تەبایی
خودێ گۆتییە من ژ تفاقێ شەرمە
تفاق كارەكی پیرۆزە
برا كرە تەبایێ برای
چیا دانا ل سەر چیایی
دڤێت مە ئێك و دوو بڤێت
دڤێت ئەم ئێك و دوو بگرین
تێكەلبوونا نان و ئاڤا مالان رامانەكا مەزن ددەت باوەری و راستی دناڤا جیناراندا ژ براتیێ مەزنترە مەزنا یا گۆتی جینارێ باش برایە،لەوما برنە دەرا نانێ گەرم دناڤا جڤاكێ ئێزدی دا كارەكێ پیرۆز و هەری بەردەوامە، ژ خودێ مەزن دخوازم ئەڤ كریارا هۆسا یا مەزن و موكم و جوان و مفادار هەر دناڤا جڤاكێ مەدا ساخ بمینت.
تُتاح هذه الصورة أيضا في: کوردی
