بایدن:پێتڤيه عێراق دابەش بت
هەولێر-KDP.info-
لە میانی چاوپێکەوتنێکی لەگەڵ کەناڵی سی بی ئێس، (جۆ بایدنی) جێگری سەرۆکی ویلایهته یهكگرتووهكانی ئەمریکا رایدەگەیەنێت، کورد ھەرگیز قبوڵ ناکات شیعەکان حکوومی کوردستان بکەن، هەروەها باسیش لەوە دەکات کە ئەو ئێستاش لەگەڵ ئەوەیە عێراق بەسەر سێ هەرێمی فیدڕاڵیدا دابەش بێت، ئەم قسانەی (بایدن) لە دوای لێدوانەکانی (مەسرور بارزانی) راوێژکاری ئەنجوومەنی ئاسایشی هەرێمی کوردستان دێت کە رایگەیاندبوو، پێویستە عێراق بەسەر سێ هەرێمی شیعە، سوننە و کوردا دابەش بێت.
(جۆ بایدن) جێگری سەرۆكی ئەمریكا، لە نوێترین چاوپێكەوتنیدا لە گەڵ كەناڵی تەلەفزیۆنی سی بی ئێسی ئەمریكیدا باس لە دوو بابەتی گرنگ دەكات بە نسبەت كوردەوە.
بابەتی دابەشكردنی عێراق و ھەروەھا رۆڵی كورد و (مەسعود بارزانی) سەرۆكی ھەرێمی كوردستان لە رووبەرووبوونەوەی تیرۆر و چارەسەركردنی قەیرانەكانی ناوچەكەدا.
(بایدن) لە بارەی دابەشكردنی عێراقەوە، رایگهیاند، ئەو لە ساڵی 2005 یشدا باسی لە دابەشكردنی عێراق كردووە، بەڵكو لە ئێستاشدا باشترین چارەسەر بە لای ئەوەوە ئەوەیە، سێ ھەرێمی فیدراڵی لە ناو عێرقدا سنووریان بۆ دیاری بكرێت و ھێزی سەربازی تایبەت بە خۆیان ھەبێت و لە رووی ئابووری و دەستوریشەوە خاوەن بڕیار و سەربەست بن لە چوارچێوەی عێراقێكدا كە سەنتەرەكەی بەغدا بێت.
ههروهها دهڵێت: “ھەرێمێك بۆ كورد، لە باكوور، ھەرێمێك بۆ سوننە لە ناوەڕاست و لە بەغداوە تا بەسرەش ھەرێمێك بێت بۆ شیعەكان، ئەو كات ھێزی تایبەتی ھیچ یەك لەو ھەرێمانە ناتوانێت سنووری ھەرێمێكی دیكە ببەزێنێت، بەم جۆرە ھیچ پێكھاتەیەك ناتوانێت ستەم لە پێكھاتەیەكی دیكە بكات، چونكە ھەرگیز كورد رازی نابێت شیعە حوكمی بكات و سونەش بە ھەمان شێوە. جا بە گوێرەی ئەم پلانە عێراق ئارامی بۆ دەگەڕێتەوە و ھەر سێ پێكھاتەكەش، سوننە و كورد و شیعە بە ئاسودەیی لە چوارچێوەی عێراقدا دەمێننەوە”.
جێگری سهرۆكی ئهمهریكا دهڵێت: “من لەگەڵ ئەوەبووم کە سیستەمێکی فیدڕاڵی هەبێت لە عێراق کە تا ئێستاش بە باشترین چارەسەری دەبینم، ئەویش بەو شێوەیەی کە بەغدای پایتەختت هەبێت کە کۆنتڕۆڵی سنوورەکان و سیاسەتەکانی دەرەوە بکات، بەڵام هەرسێ هەرێمی سوننە، کورد و شیعە هەمان دەسەڵات و ئۆتۆنۆمی هەبێت”.
لە بەشێكی دیكەی قسەكانیدا و تایبەت بە ھەوڵی رزگار كردنی ناوچەكانی ژێر دەسەڵاتی داعش، بە تایبەت شاری مووسڵ و دواتریش ئاوەدانكردنەوەی ئەو ناوچانەی كە لە دەست داعش رزگار دەكرێن، (بایدن) پێی وایە، ھیچ ھەوڵێك بە بێ كورد و سەرۆكی ھەرێمی كوردستان (مەسعود بارزانی) سەركەوتوو نابێت،
(جۆ بایدن) دهشڵێت: “ئێمە پێویستە و ھەمیشەش خۆم كارم لە سەر ئەوە كردووە، ههماههنگی و متمانە دروست بكەم لە نێوان كورد، بەرێز (بارزانی)، مەبەستم سەرۆك (مەسعود بارزانی)یە لە گەڵ بەغداد دا، ئەمە تاكە رێگای چارەسەرە و دەمانگەیەنێتە ئامانج”.
جێگری سەرۆكی ئەمریكا دەڵێت: “تاكە چارەسەر ئەوەیە بەغدا ههماههنگی لە گەڵ (بارزانی)دا بكات و بە ھاوكاری وڵاتانی ھاوپەیمان دەتوانرێت زۆربەی كێشەكانی عێراق چارەسەر بكرێن و بهو جۆرە ھەم داعش لە ناو دەچێت و ھەم ئاسایش بۆ ناوچەكە دەگەڕێتەوە”.
تُتاح هذه الصورة أيضا في: کوردی