بارزانی: بۆ بەرەڤ پێشچوونا دوزا گەلێ کورد مە پێدڤی ب ئاشتیێ یە نەک شەری
ئێن ئارتى 
دەمیرتاش داخازێ ژبارزانی دکەت هەولێن خۆە ژبۆ دەسپێکرنا پێڤاژۆیا ئاشتیێ دەسپێبکەت و بارزانی ژی راگەهاند،”نها مە پێدڤی ب ئاشتیێ یە نەک شەری و ئەگەر مە ل رابهوری گازندە و گلەیی ل زلهێزان و دەولەتان هەبوو، ئەڤە نها دەمێ وێ ئێکێ یە گازندێ ل خۆە بکەین”.
ئەڤرۆ ٢١ێ ئەیلولا ٢٠١٦، سەرۆکاتیا هەرێمێ کوردستانێ دراگەهاندنەکێ دا ئاماژە ب وێ ئێکێ کریە کو د کۆمبوونا ناڤبەرا بارزانی و سەلاحەدین دەمیرتاش هەڤسەرۆکێ پارتا دیموکراتا گەلان ( هەدەپە) و ئوسمان بایدەمیر و شاندێ هەڤالەبەند دا، دەمیرتاش ئارمانجا سەرەدانا شاندی بۆ هەرێما کوردستانێ بەحس کر کو هەولەکە ژبۆ سازدانا دیالۆگێ دناڤبەرا هەموو لایەنێن سیاسیێن کوردستانێ و بۆ ڤێ ئێکێ پرۆژەیەک بەرهەڤ کرینە.
هەروەسا لگۆری وێ راگەهاندنێ، دەمیرتاش سوپاسیا بارزانی کریە بۆ ڤێ هەڤدیتنێ و پێزانیێن خۆە ژبۆ رۆلێ وی ل شەرێ دژی داعشێ و قوربانیێن پێشمەرگە نیشاندا.
هەروەسا بایدن پەسنا رۆلێ بارزانی کریە ل پشتەڤانی کرن و پێشخستنا پێڤاژویا ئاشتیێ ل باکوور و راگەهاند، کو ئەو چاڤەرێ وێ ئێکێ نە کو بارزانی هەولێن خۆە ژبۆ دەسپێکرنا پێڤاژۆیا ئاشتیێ دەسپێبکەت و وەکە برایێ مەزن پشتەڤانێ پرۆژا دیالۆگێ بیت دناڤبەرا ئالیان دا.
هەڤسەرۆکێ هەدەپێ ئاماژە ب وێ ئێکێ ژی کر، ژبۆ سەرخستنا دیالۆگێ بەرپرسیارەتی دکەفیتە سەر ملێ هەموو ئالیان و گوت” گەنجێن کورد ل چەپەرین بەرەڤانیێ دا ئاخا کوردستانێ دپارێزن، لێ مخابن رۆلێ میدیایێن کوردستانی دنها دا دخزمەتا برایەتی و هەماهەنگیا ئالیێن سیاسی دا نینە و سەرکردان نارەحەت دکەت و خەلک ژ ڤی زمانی بێزارە، ژبەر هندێ پێدڤیە پێنگاڤا ئێکەما دیالۆگا ئالیان ب رێکا گوهورینا زمانێ ئاخڤتنا میدیایان بیت و میدیا بێخنە د خزمەتا برایەتی و دیالۆگا ئالیان دا نەک نها کو بویە بەشەک ژئاریشان.
هەروەسا دەمیرتاش د رێژەیا ئاخڤتنا خۆد ا بەحسێ ئاریشە و ئاستنەگێن بەردەمی دۆزا کورد کر و دیالۆک و هەڤکاری دناڤبەرا ئالیێن کوردستانێ دا ب تاکە رێک دانا ژبۆ چارەسەکرنا ئاریشان.
د هەمبەری دا بارزانی راگەهاند، گەلێ کورد بێ خواستا خۆە هاتیە دابەش کرن و بۆ ژیان و پاراستنا ناسنامەیا خۆە شەر کریە و شیایە ناسنامەیا خۆە بپارێزیت، لێ نها قوناغا مسۆگەرکرنا دەسکەفت و بەرەڤپیشچوونا دوزا گەلێ مەیە و بۆ ڤێ ئێکێ ژی مە پێدڤی ب ئاشتیێ یە نەک شەری.
بارزانی گوت ژی” ئەگەر مە ل رابهوری گازندە و گلەیی ل زلهێزان و دەولەتان هەبوو، ئەڤە نها دەمێ وێ ئێکێ یە گازندێ ل خۆە بکەین”.
بارزانی ئاماژە ب وێ ئێکێ ژی، ئەنجامێ شەری مالوێرانی و کاڤلی یە و رۆژەک شەر زویتر بهێـتە راوەستاندن باشترە و د قازانجا هەموو ئالیەکی دایە و ژبۆ سەرخستنا ئاشتیێ پێدڤیە هەموو ئالی پشتەڤان و هەڤکارێ هەڤدووبن.
هەروەسا لگۆری راگەهاندنتا سەرۆکاتیا هەرێمێ، بارزانی بەرهەڤیا خۆە نیشاندایە ژبێخەمەتا دەسپێکرنا پیڤاژۆیا ئاستیێ ل تورکیا هەڤکار بیت و هەموو هەولێن خۆە بدەت و پشتەڤانیا هەموو هەولەکێ ددەت ژبۆ ڤێ مەبەستێ.
ئەڤرۆ چارشەمبی ٢١ێ ئەیلولا ٢٠١٦ێ سەلاحەدین دەمیرتاش هەڤسەرۆکێ هەدەپێ و شاندەکێ هەڤالبەند ب رێکا فرۆکەخانەیا نیڤدەولەتیا هەولێرێ گەهشتە هەرێما کوردستانێ و دگەل بارزانی کۆمبوو و بریارە ژی دگەل ئالیێن سیاسیێن هەرێمێ کۆمبیت.
تُتاح هذه الصورة أيضا في: کوردی