دێ گوهارتن بسەر رەنگێ تەکسیێن هەرێمێ ئێتە کرن؟
ئێن ئارتى
وەزارەتا ڤەگوهاستن و گەهاندنا هەرێمێ دەرباری گهورینا رەنگێ تەکسیێن هەرێمێ راگەهاند، دنهادا چ بریارەک دەربارێ ڤێ ئێکێ نینە و ئەوا هەی تنێ نۆچەیێ هند میدیایانە.
لگۆری راگەهاندنەکا وەزارەتا ڤەگوهاستنێ و گەهاندنێ کو تێدا هاتیە “ئەو نوچە و زانیار دویرن ژ راستیێ و هیچ پرۆژە و بریارەک ب ڤی رەنگی نینە و زانیاری ب شاشی ژئالیێ هند میدیایان ڤە هاتیە بەلاڤکرن و ئەوا هەیە تنێ بریارا لۆگۆ و لەزگێ یە، کو تەکسیێن باژێران ژ هەڤدوو تێن جوداکرن و تێ رێکخستن”.
هەروەسا ئاماژە ب وێ ئێکێ ژى کریە کو “شوفێران و وەلاتیان پشتراست دکەین کو د رەوشا نها یا کریزا داراییا هەرێما کوردستانێ دا، ب هیچ رەنگەکی بریارەک نائێتە دان کو تێچوون و خەرجیان بێخینە سەر وەلاتیان و شوفێران”.
دەربارێ لەزگێ و لۆگو، وەزارەتا ڤەگوهاستنێ ئاماژە ب وێ ئێکێ کریە ” ئەف بریارە گەلەک تیچوون نەڤێتن و پتر د بەرژەوەندیا وەلاتیان و شوفێرێن باژێرانە و ب رێیا وی لۆگۆیێ و لەزگێ تەکسیێن باژێران ژ هەڤدوو تێ جوداکرن”.
وەزارەتا ڤەگوهاستنێ و گەهاندنێ راگەهاندیە ژى کو بۆ هەر پارێزگەهەکێ رەنگەکێ دیار کری هاتیە تەرخان کرن و تەکسیێن ناڤا باژێری و دەرڤەیێ باژیری ژ هەڤدوو بێن جوداکرن، هەروەسا مافێ تایبەتێ کارکرنێ ژبۆ شوفێران ڤەدگەرە و کاری وان تێ رێکخستن ل سنورێ وان و ژئالیێ پاراستن و سەلامەتیێ ڤە د بەرژەوەندیا وەلاتیانە.
لگۆر ئامارێن هاتن و چونا هەرێمێ، نها پتر ژ ٨٠ هزار تەکسیان دنافا هەرێمێ دا کار دکەن کو ب ڤی جوری هاتینە تۆمارکرن، هەولێر پترترین تەکسێ تێدایە کو هژمارا وان دگەهیتە ٣٥ هزار تەکسیان و ل سلێمانیێ نێزیکی ٣٠ هزار و ل دهۆکێ پتر ژ ١٧ هزار تەکسی هەنە.
ز.ح
تُتاح هذه الصورة أيضا في: کوردی