رێڤهبهرێ چاندنێ ل سنۆنێ: حهشدا شهعبى رێ نادهت 443 هزار دونهمێن ئهردى ل سنۆنێ بێنه چاندن
باسنيوز:
رێڤهبهرێ چاندنێ ل سنۆنێ: حهشدا شهعبى رێ نادهت 443 هزار دونهمێن ئهردى ل ناحیا سنۆنێ بهێنه چاندن
رێڤهبهرێ چاندنێ ل ناحیا سنۆنێ دیار كر: کو ئهڤ سالا ژبهر ملیشیايێن حهشدا شهعبى روویبهرێ 443 هزار دونهمێن ئهردێ ل ناحیا سنونێ ناهێنه چاندن، دوهختهكێ دا جوتیار چاڤهرێ بوون ئهڤ سالا ئهردێ خوه بچینن، لێ پشتى حهشدا شهعبى هاتیه دهڤهرێ، ههموو رێك هاتینه گرتن ل بهر جوتیاران و رێ ناهێته دان چاندنێ بكهن.
بهرهكات عیسا، رێڤهبهرێ چاندنێ ل ناحیا سنۆنێ بۆ (باس) دیار كر: “ئهڤ سالا ههتا ئهڤرۆكه ژى ئێك مهترا ئهردى ل ناحیا سنۆنێ نههاتیه چاندن، ژبهر مهترسیا ملیشیايێن حهشدا شهعبى ل دهڤهرى، هیچ جوتیارهك نهشێت قهستا سنۆنێ بكهت بۆ چاندنا ئهردێ خوه، ژبهر كو حهشدا شهعبى رێكا ناڤبهرا دهۆك بۆ سنۆنێ دا گرتیه و هاتن و چوون نينه، ههروهسا ژى گازوائیل ل دهڤهرى نینه و ئامیرێن سهخبیریا تهركتوران ژى بۆ كارێن چاندنێ نههاتینه دابینكرن و هیچ ههڤكارییك نههاتیه كرن بۆ جوتیاران ئهردى خوه بچینن، ههتا نوكه حهشدا شهعبى ژى رازى نهبوویه ژ دهڤهرى دوور بكهڤیت، جوتیار بشین بچن چاندنێ بكهن”.
بهرهكات عیسا گۆتژى: “حهشدا شهعبى ملیارێن دیناران زیان گههاندنا جوتیارێن دهڤهرا سنۆنێ ئهڤ سالا، چونكو ل ڤێ دهمێ سالیێ جوتیاران چاندنێ دكر و گهنم وجهه هاته چاندن، ئهڤ سالا هیشتا حهشدا شهعبى رێك خوهش نهكریه چاندنێ بهێته كرن ل سهرانسهرى دهڤهرى، ئهڤه دێ بیته ئهگهر جوتیار بهێنه دوورخستن ژ كارێن چاندنێ ل دهڤهرى، ئهڤه ههوهكا ژ ههوهیێن تهعریبكرنێ ل دهڤهرێ دهێته كرن، دژى جوتیارێن دهڤهرێ”.
خۆیاژى كر: “تیرۆرستێن داعش سالا 2014 دهمێ شنگال داگیر كرین، ل وێ دهمێ تیرۆرستان گهنمێ و جههێ دهڤهرى ههموو برن و جوتیار تووشى زیانهكا مهزن بوون، پشتى پێشمهرگهى كوردستانێ سنۆنێ رزگار كرى و رێك هاتیه ڤهكرن ب پشتهڤانیا حكوومهتا ههرێما كوردستانێ گهنم و ئامیرێن چاندنێ بۆ جوتیاران هاتنه دابینكرن و دهست بكارى چاندنێ ل دهڤهرى هاته كرن، لێ ئهڤ سالا جارهكا دێ وهكو سالا 2014ێ جوتیار تووشى زیانى بووینه، ژبهر ملیشیایێن حهشدا شهعبى ل دهڤهرێ”.
رێڤهبهرێ چاندنێ ل ناحیا سنۆنى ئاشكرا كر، كو ل سنۆرێ ناحیا سنۆنێ ئهردهكێ بهرفهره ههیه بۆ چاندنێ و سالانه پتریا وێ ئهردى دهێته كێلان و چاندن بۆ مهبهستا چاندنا گهنمى و جههى و سال دووڤ سالێ 443 هزار دونهمێن ئهردى هاتنه چاندن، ژبلى ئهردى سهخرى و چیایى بتنى ئهردى چاندنێ.
ئاماژه دا وى چهندى ژى، كو ژبهر باشیا ئهردێ چاندنێ ل ناحیا سنۆنێ، جوتیارێن دهڤهرێ سالانه رێژهكا باش یا گهنمى دچینن و گهنمێ سنۆنێ ژى رێژهكا باش ب دهست خوهڤه دئینت، ئانكو پله ئێك دهركهڤت، مخابن ئهڤ سالا حهشدا شهعبى رێ نادهت جوتیارێن ناحیا سنۆنێ ئهردێ خوه بچینن، د وهختهكێ دا ئهڤ سالا خهلك چاڤهرێ بارانهكى بوون بۆ كێلانا ئهردێ خوه”.
بهرهكات عیسا، رێڤهبهرێ چاندنا سنۆنێ زێدهتر گۆت: “80% ژین و ژیارا وهلاتیان ل سهر كارێن چاندنى یه ل دهڤهرا سنۆنێ، ههكه چاندنى نههێته كرن دێ رێژا ههژارى بیته 100% ل دهڤهرى، چونكو ژبهر گرۆپێن چهكدار ل دهڤهرى خهلك نهشین هیچ كارهكى بكهن”.
تُتاح هذه الصورة أيضا في: کوردی