سیاستمەدار دبێژن: حەیدەر ئەلعەبادى بریارێن تاکرەویى ددەت
دهۆک-KDP.info-
سیاستمەدارێن عیراقێ و كوردستانێ دبێژن، سەرۆک وەزیران ل عیراقێ (حەیدەر ئەلعبادى) ب تاکرەویى بریارێن سەخت لسەر هەرێما کوردستانێ داینە، ئەڤە جهێ رازەمەندیا هیچ لایەنەکێ سیاسیێ ناڤخویى و نیڤدەولەتى نینە.
جێگرى سەرۆکكۆماری عیراقێ (ئەیاد ئەلعەلاوى)، دچەند داخویانیێن میدیادا راگەهاندیە، سەرۆک وەزیران (حەیدەر ئەلعبادى) ب تاکرەویى بریارێن سەخت لسەر هەرێما کوردستانێ داینە، ب هیچ رەنگەکێ رابووچوونێن لایەنێن دیتر نەوەرگرتیە و ئەڤ بریارە دچارچوڤەیێ (حزب الدعوە)دا بووینە.
(ئەیاد ئەلعەلاوى)، گۆت:” سەرۆکێ هەرێما کوردستانێ (مەسعود بارزانى)، بەرى سالەکێ ئەنجامدانا ریفراندۆما سەربەخویا هەرێما کوردستانێ دگەل حکومەتا عیراقێ بەر بەحسکریە، لوى دەمى حکومەتا عیراقێ چ لێڤین بۆ جارەسەکرنا بابەتى نەکرن، ژبەر ڤێ ئێکێ ئەگەر ئەلعەبادى بووچوونا هەمى لایەنێن سیاسى یێن پشکدارى حکومەتا عیراقێ نەوەرگریت، واتە ئەڤە بریارێن نە لسەر بنیاتێ پشکداریا سیاسبیە، کۆ تا نوکە ژى ئەلعەبادى ئێک بەندێ دەستورى بجهنە ئینایە”.
(د. ئارام بالەتەیى)، ماموستایێ زانینگەهێ و چاڤدێرێ سیاسى بۆ مالپەرێ فەرمیێ پارتى دیموکراتى کوردستان گۆت:” ئەلعەبادى کەسایەتیا خویا سیاسى دناڤبەرا دوو کڤانێن تائیفى و دژایەتیا هەرێما کوردستانێدا ئاڤاکریە، ژبەر هندێ دترسیت هەر پێنگاڤەکا میانراو بەرامبەر کوردستانێ بهاڤێژیت ئەو کەسێن توندرەوێن دناڤ شیعەیاندا ژئێک جوداببن”.
(د. ئارام بالەتەیى) بەحسکر، ئەلعەبادى هەمى هەولا دێ دەت دانو ستاندن دگەل کوردستانێ نەئێنەکرن تا هەلبژارتێن عیراقێ دئێنە ئەنجامداندا، داکو کورسیکێن وى دڤێن بدەستخوڤە بینیت لسەر دژایەتیکرنا هەرێما کوردستانێ و لژێر وێ تابلویێ دبێژیت سەپاندنا یاسایێ ل هەمى عیراقێ و ئەگەر هەلبژارتن دماوەیێ خودا ل عیراقێ هاتنە ئەنجامدان، دێ ئێکەم کەس بیت جارەکا دیتر دەرگەهێ دانو ستاندنێ دگەل هەرێما کوردستانێ ڤەکەتەڤە، جونکى خەلکێ عیراقا ئەڤرۆ لسەر بنەمایێ خزمەتگوزاریى و ئایدولوژیێ هزر ناکەت، بەلکو لسەر بنەمایێ تائیفگەر و توندرەویێ هزر و رەفتار دکەت”.
تا نوکە چ سەرکردە بۆ پەرژەوەندیا گشتیا مللەتى عیراقێ نەهاتینە لسەر حوکمێ، بەلکو بۆ پەرژەوەندیا کەسوکى خەباتێ دکەن، ژبەر هندى دەولەتێن دەردۆر و بیانى دشێن بساناهى دەستوەردانێ دناڤ سیاسەتا ناڤخویا عیراقێ بکەن، وەک دکتورى دیارکرى.
(رێناس جانو)، ئەندامێ جڤاتا نوونەرێن عیراقێ سەر ب لیستا پارتى دیموکراتى کوردستان ڤە، زەلالکر:” ئەو سیاسەتا دارێژتیا عیراقێ یاسەرکەفتن تێدا نەئینایى، حەیدەر ئەلعبادى جارەکا دیتر لسەر وێ رێکێ دجیتەڤە، کۆ فشارا دئێختە لسەر هەرێما کوردستانێ بۆ بلندکرنا رێژا دەنگێن خۆ ل هەلبژارتنێن عیراقێ یێن داهاتى، ئەلعەبادى یێ یاریەکا ترسیناک دکەت، کۆ ژ هەمى رەخەکى ببەت و بیێ تشتەکێ بدەتە لایەنێن دیتر، ئەڤ یاریە ژ عەبادى مەزنترە و دەرئەنجامێ وێ دێ زیانێ لخۆ و عیراقێ ژى کەت، ئەڤە وێ ئێکێ دگەهینیت ریفراندوما کوردستانێ مەزنترین دەستکەفت بوو، جونکى بۆ هەمیان دیار بوو گرێدان دگەل عەقلیەتا بەغدا یا بزحمەتە و نوکە ئەلعەبادى بخو ژى دانپێدانێ دکەت”.
(رێناس جانو) دیارکرن:” حەیدەر ئەلعەبادى دڤێت هەیبەتا مللەتێ کورد کێم بکەتەڤە و سەرەدەریێ دگەل کوردان وەک هەولاتیێ پلا دوو بکەت، ئەڤە ژى جهێ نەرازەمەندیێ یە لسەر ئاستێ نیڤدەولەتى و ناڤخویى “.
چەند کەسەکن ل عیراقێ پێشتەڤانیا بریارێن ئەلعەبادى دکەن، یێن دیتر هەمى دژى سیاسەتا تاکرەویى نە.
ئەندامێ جڤاتا نوونەران ل عیراقێ بەحسکر، ئەگەر لایەنێن سیاسى بڤێت عیراقەکا ئارام ئاڤا بکەن، دڤێت کێشەیێن دناڤبەرا هەولێر و بەغدا جارەسەر بکەن و پرانیا لایەنێن سیاسى دگەل جارەکرنێ نە و بتنێ ئەو لایەن نەبن یێن دژایەتیا هەرێمێ و ئەلعەبادى بخو ژى دکەن، جونکى ئەڤە رەوشە دقازانجا عەبادیدا ژى نینە، ب تایبەت پشتى گەهشتیە هندەک باوەریێن نەدجهێ خودا، کۆ سەرکەفتنا ژناڤبرى داعشێ تومارکریە و تووشى غرورا سیاسى بوویە، ئەڤ چەندە دێ بیتە ئەگەر شکەستنا وى.
تُتاح هذه الصورة أيضا في: کوردی