هەڤالێ زیندی
خانی سەبری
هەموو دەمان مڕۆڤ و خوەدا،
ب ڕەنگەكێ ژ ڕەنگان عاشقێن هەڤن
تەك تشتێ ڤان عاشقان دگەهینت ئێك،
مرنە ئانكو مرن دەرگەهێ ب هەڤگەهشتنێ یە،
ئەگەر مرن دەرگەه بت،
كەواتە، شەهید بوون دەرگەهەكێ قفل زێڕە
هەڤالێ من
ژ ئاگری یە ، نە ژ ئاخێ یە
هەڤالێ من، نە وەك منە، نە وەك تەیە، وەكی خوەیە
بەری بنڤت، گۆتە من: وەرە پیاسەیەكێ دگەل بیرهاتنێن خوە بكن!
مە قەهوەیەك ڤەخوار
مە داستانا خەونەرۆژێن خوە ڤەگێرا
دوماهیكێ،
ئەم بونە دوو سیمەرخ
مە بەرێ خوە دا تاڤەسۆركێ
ئەو نڤست و
ئەز زڤریم
ئەو گرنژی و ئەز گریم !
هوون دزانن بەری بنڤت چ گۆتە من؟!
گۆت: ئەز وەستیام !
بەری بنڤت،
رۆناهی ژ چاڤێن وی پەشیا
سڤیانك ژ سەر لێڤێن وی فریا
ئەز مام هشیار و ئەو نڤست
ب خوینا خوە، دەستنڤێژا ئاخێ ئێخست
هەڤالۆ
توو چەندێ خائینی د هزرا نەزانان دا،
توو چەندێ هەستیگرانی د فەرهەنگا موجاهیدان دا…
توو چەندێ ماقویلی د حوبرێ ڤی قەلەمێ د بەریكا من دا
هەڤالۆ
گوهێ خوە بدێ، ئەم چ دبێژن و تەمبیرا وان چ دبێژت:
ئەم دبێژن دونیا بیكا دەلالە، ئەو دبێژن پویچ و بەتالە
ئەم دبێژن كوشتن حەرامە، ئەو دبێژن جیهادە، حەلالە
ئەم دبێژن دەولەت مافە، ئەو دبێژن خەونە، خەیالە….
حال چ حالە…؟
هەر ئێك ژوان بوویە سولتان،بوویە ئەمیر
بوویە سەیدەك و هێلما دەڤی بوویە بوخیر
ب نڤشتەكێ، دشێن ژنێن مە بكن مەهینێن بەرگیر
ب فەتوەكێ، دشێن زەلامێن مە بكن فێرسێن بێ شیر
ب درەوەكێ، دشێن فەقیرێ مە بەتران بكن و زەنگینێ مە بكن فەقیر
ب دوعایەكێ، دشێن سەرۆكێن مە ژ خوە نێزیك بكن و ژ هەڤ دویر
ل بەر قەنتەرێن خانیكێن مە،
ئێك ژ وان بوویە مونكەر، ئێك ژی بوویە نەكیر
خولامێ وان، بەرا ب سیبەرا مە وەردكت
و هەگەر ب وی بت، ژیانا مە دێ بتە بیئسەلمەسیر
دڤێن، بەهشتا مە بكن جەهەننەم و
جەهەننەما خوە بكن زۆزان و زەمهەریر
ژ مێژا من تزبیا وان بەردا
مادەم یێ ژ هەمیا شەریفتر، بوویە ریهدرێژەكێ حەقیر
وا دەستەبراۆ
ئەم بوونە پرۆمیتیۆسێن رۆژهەلاتێ و ئەو بوونە تەیرێن كەلەخان
لێ، مە ئاگر ژ خوەداوەندی نەدزیبوو
ئەم بوونە ئادەمەك بەلەنگاز ، لێ مە سێڤا بەهشتێ نەخواربوو
ئەم بوونە گلادیاتۆرێن رۆژهەلاتێ و مە وەسیەتا خوە نە نڤیسیبوو
د وارێ خوە دە،
ئەم بوونە زیندانی و ئەو بوونە جەلاد
ئەم بوونە حەلاج و ئەو بوونە حەجاج
ئەم بوونە سوهروەردێ و ئەو بوونە زاهرێ بێداد
ئەم بوونە خوراسانی و ئەو بوونە مەنسوورێ بەغداد
هەڤالۆ…
وان ناس بكە،
ئەو شیرەتكار و دانا نە
ئەو عەلامە و زانا نە…
لێ، هەر دێ مرن!
و ئەم؟
ئەم شەهیدن…. ئەم نامرن! ئەم نامرن
تُتاح هذه الصورة أيضا في: کوردی