نەخۆشێن شنگال بۆ چارەسەریێ دچنە مووسل و تلەعفەر
باسنيوز:
ژ بەر نەبوونا دەرمان و پێدڤیێن نۆژداری ل نەخۆشخانێن شنگال، نەخۆش ناچار بووینە رێیەكا دوور بۆ مووسل و تلعەفەر بدەنە بەر خۆ بۆ هندێ چارەسەریا خوە وەربگرن.
د. بیبۆ ئەیاد، ل نەخۆشخانا شنگال بۆ (باسنیۆز) دیار كر، رەوشا ساخلەمیێ ل شنگال گەلەك یا خرابە و نۆژدار و دەرمان زۆر دكێمن و پتریا نەخۆشخانان ب دەستێن برینپێچان دهێنە برێڤەبرن، داعش و حەشدا شەعبی زیانێن مەزن ب نەخۆشخانان گەهاندینە و پتریا نەخۆشخانان ژی دەرمان لێ نینن و ب تنێ دەرمانێن سادە وەكوو ئەسپرین و پاراسیتۆل و دەرمانێن گەرماتیێ لێ هەنە.
ئاشكرا ژی كر كو پتریا نەخۆشێن شنگال پشتی سەرەدانا مەدكەن، ژ بەر نەبوونا دەرمانێن پێدڤی ئەم رەوانەی مووسل و تلەعفەر دكەین، بۆ هندێ بشێن چارەسەریا خوە وەربگرن و گۆتیشی: مەترسی ل سەر ژیانا نۆژدارێن شنگال هەیە و گەلەك ژ وان نەوێرن كاربكەن و حەشدا شەعبی ژی گەفا ل وان دكەت.
ئاكنجیێن شنگالێ ددەنە خویاكرن كو ژبەر نەبوونا دەرمانا و بنگەهێن ساخلەمیێ و نەخۆشخانەیان ل شنگال، بۆ وەرگرتنا چارەسەریێ وان بەرێ خوە دایە مووسل و تلەعفەر، چنكو ژبەر گرتنا رێكێ ئەو نكارن قەستا هەرێما كوردستانێ بكەن.
وەلاتی (زهێر خەلەف) ئاكنجی یە ل شنگالێ بۆ (باسنیۆز) دیار كر، ل شنگال نهۆ مە پێدڤی ب چاڤدێریا ساخلەمیێ هەیە و نهۆ ئەم گەلەك جارا نەچار دبن سەرەدانا مووسل و تەلەعفەر دكەین، هەر چەندە ڕەوشا ئێمناهیێ هێش نەیا ئارامە ل وان دەڤەران بەلێ هەر چاوا بیت ئەم دچین.
گۆت ژی: ل دەمێ بۆری دا مە گەلەك جارا سەرەدانا پارێزگەهێن هەرێما كوردستانێ دكر، بەلێ رێیا كو شنگال ب هەرێمێ ڤە گرێدەت یا گرتیە و ئەم نكارن بچینە كوردستانێ.
ژلایەكی دی ڤە (ئیلهام خودێدا) ئاكنجیا شنگالێ یە دبێژیت: نەبوونا نۆژدارێن تایبەت ب ژنان ڤە ڤالایەكا گەلەك مەزنە و ژ هەر تشتی گرنگترە و نەبوونا سالێن ژ دایك بوونێ هەر چەندە ئەم نكارن سەرەدانا هەرێما كوردستانێ بكەین و نكارن ل تلەعفەر و مووسل بمینن بۆ ماوێ چەند رۆژان، ژبەر رەوشا ئێمناهیێ یا خرابە ل وێدەرێ، ژبەر ڤێ چەندێ ئەم دخوازن هەر پێدڤیەكا ساخلەمیێ بۆ مە بهێتە دابینكرن دا كو ژیانا مە باشتر لێ بهێت.
تُتاح هذه الصورة أيضا في: کوردی