كار لسەر دروستكرنا هۆلەكا هەلكەفتان ل كۆمەلگەها خانكێ دئێتە كرن
تۆرا لالش یا راگەهاندنێ
خەلكێ گوندێ زەنیات ل كۆمەلگەها خانكێ ب تفاق و تەبایی و ب پشكداریا ژمارەكا خێرخواز و دەولەمەندان،لسەر كیسێ خۆ دەست ب ئاڤاكرن و دروستكرنا هۆلەكا هەلكەفتان كرن و نهۆ كار لسەر دئێتە كرن.
سەرۆكێ باژێرڤانیا خانكێ ئەندازیار(حەمود غەربی حەسەن)دیاركر،هولا هەلكەفتان یا گوندێ زەنیات دكەفتە سنوورێ باژێرڤانیێ دا،پشتی خەلكێ گوندی لژنەك پێك ئینایی داخاز ژمەكرین مە رازەمەندی دا كو رووبەرێ پتر ژ(700)م2 بێتە تەرخانكرن بۆ ئاڤاكرنا هۆلێ،پشتی مە داخاز ژ قایممقامیا قەزا سێمێلێ و جیێن پەیوەندیدار كری رازیبوونا خۆ دانە دیاركرن ژبۆ ئەردی،نهۆ هۆل دقۆناغا كاری دایە و ب شێوەیەكی ئەندازیاری دێ ئێتە چێكرن.
(شێخ مەروان حەسەن)ئێك ژ كەسایەتیێن گوندێ زەنیات گۆت:خەلكێ گوندی بریار دان هۆلەكا هەلكەفتان لسەر كیسێ خۆ ئاڤا بكن،ب تفاق و هاریكاری و پشتەڤانیا خەلكێ مە ل ڤێدەرێ و ئەورۆپا نهۆ كار لسەر ئاڤاكرنا هۆلێ یێ دئێتە كرن.
هەروەسا (خێری خەلەف) وەلاتیەكی گوندی یە خویاكر، بەری نهۆ هۆل ل گوندی نەبوون تنێ چادر بوون،خەلكێ داخوازكرن و پێكڤە هاریكاریا خۆ كۆمكرن ژبۆ چێكرنا هۆلەكا خێرو شەرا،پشتی ب تفاقا هەموویان و هاریكاریا چەند خێرخواز و دەولەمەندان،مە داخوازا خۆ گەهاندە باژێرڤانیا خانكێ و رازیبوونا خۆ دیاركرن و نهۆ دەست ب ئاڤاكرنێ هاتیە كرن.
كۆمەلگەها خانكێ ژ (13) گوندێن ناڤخۆیی و چەند گوندێن دەوروبەر پێك دئێت،ژمارا ئاكنجیێن وێ نێزیكی (24) هەزار كەسایە و سێ هۆلێن لالش یێن هەلكەفتان لێ هەنە.
تُتاح هذه الصورة أيضا في: کوردی