پشتی ئاوارەبوونێ دیاردا خۆكوشتنێ دناڤ گەنجێن ئێزدی دا زێدەبوویە
تۆرا لالش یا راگەهاندنێ/ئەمین شەمۆ
ژبەر بارودۆخێ ل ڤان چار سالێن بۆری جڤاكێ ئێزدی تێدا بۆری و ژیانا ب زەحمەت و سەخت پشتی ئاوارەبوونێ دناڤ كەمپان دا و هەڤژینیا پێش وەخت دناڤبەرا كچ و كوران دا و چەند هۆكارێن دیتر،بووینە سەدەمێ زێدەبوونا دیاردا خۆكۆشتنێ دناڤ گەنجان دا.
لدۆر دیاردا خۆكوشتنێ دناڤ جڤاكێ ئێزدیان دا مامۆستا (ئەمین ئلیاس) دیاركر،ئەگەرێ خۆ كوشتنێ ل جڤاكێ مە دا دزڤرت بۆ نەبوونا دەرفەتێن كاری و هەبوونا بێكاریێ یە،ئەڤ هۆكارە دبتە ئەگەرێ تێكچوونا دەروونێ گەنجان دیسان هەبوونا ئەڤینیەكا نە ساخلەم دناڤبەرا كور و كچان دا كو نە لسەر بنەمایێ هەڤتێگەهشتنێ یە و بنەمایێن ئەڤینیێ و هەڤالینیێ پەیرەو ناكن و دئێك و دوو ناگەهن و كێشێن وان مەزن دبن و دگەهنە وی رادەیی هزر ل خۆ كوشتنێ دا بكن،هەروەسا بارودۆخێ سیاسی یێ دەڤەر تێدا دەربازدبت ئێك ژوان ئەگەرایە و ب تایبەتی ئەو بارودۆخێ ل ڤان چار سالێن بۆری دا جڤاكێ ئێزدی تێدا بۆری و گەلەك ژ خەلكێ ئێزدی خۆشتڤی و هەڤال و كەس و كارێن خۆ ژ دەست داینە.
هەر لسەر ڤی بابەتی چالاكڤانا كچ(نەسیما سلێمان) دبێژت:ئێك ژئەگەرێن خۆ كوشتنێ هەڤژینیا پێش وەختە دناڤبەرا كچ و كوران دا كو هێژ نەگەهشتینە تەمەنێ هەڤژینیێ ڤێ پرۆسێ پێك دئینن،دیسان ژیانا ئاوارەبوونێ یا ب زەحمەت دناڤ كەمپان دا و نەبوونا ژیانەكا جێگیر و ب تایبەتی ل نك چینا گەنجان كو رۆژ بۆ رۆژێ پێتڤیێن ژیانێ یێن وان زێدە دبن و خواستەك و داخوازیێن وان پتر لێ دئێن ژبۆ بسەربرنا ژیانەكا خۆشتر.
ژلایەكی دی دەروونناس (شەرەف خدر) ئاشكەراكر،پتریا حالەتێن خۆ كوشتنێ ل نك وان جڤاكا روددەن كو بارێ ئابووریێ وێ دەڤەرێ یان وی وەلاتی یێ لاوازە و داهاتێ رۆژانە و هەیڤانە و سالانا یێ تاكەكەسان تێدا یێ كێمە،ئەڤ دیاردە ب تایبەتی ل نك چینا سنێلان بەربەلاڤە ئانكو ئەو كەسێن تەمەنێ وان دناڤبەرا (13 هەتا19) سالیێ دا،هەروەسا چەند ئەگەرێن دی هەنە وەكو بارێ ئابووری یێ سەخت و دژوار و هەژاری و هەبوونا كێشێن كۆمەلایەتی ب تایبەتی گەنج دگەل كۆمەلگەهێ و خێزانێ و كەسانێن دەوروبەر و هەڤالان و نەبوونا ئازادیەكا تەمام ل كۆمەلگەهێ دا و دامەزراندنێ و داب و نەریتێن كۆمەلایەتی و كێشێن قوتابخانێ و حالەتێن دەروونی،ئەڤە هەموو دبنە سەدەم كو دیاردا خۆ كوشتنێ ل جڤاكێ ئێزدیان دا بەرەف زێدەبوونێ ڤە بچت.
تُتاح هذه الصورة أيضا في: کوردی