ئێكەم گورزێ بەعسیا ل كوردستانێ دای باسكێ شێخا تەعریب كرن
مەهدی حەسەن موراد
كەرب و كینا بەعسیا ل سەر ئێزدیاتیێ و ئێزدیان ڤەدگەریت بۆ وێ هاریكاری و پشتەڤانیا ئێزدیان بۆ شۆرەشا ئەیلولا مەزن ئەڤا ب سەرۆكاتیا بابێ روحی و نەتەوەیی بارزانیێ نەمر هاتیەكرن، دەڤەرا باسكێ شێخا ئەڤا نهۆ دبێژنێ كۆمەلگەها مەهەتێ ژ (14) گوندا پێكهاتیە ئەو ژی ئەڤەنە گوندێن(مەهەتێ، دولاهژیرێ، مامرەشان، جەروانا، موسكان، مەحمۆدان، گرخالس، موقبلێ، موقبلا كچك، مەحمەرەشان، بێت نارێ، باقەسر، كەندالێ، ئێسفنا سەری) ئەڤێ دەڤەرێ رووبەرەكێ عەردی یێ مەزن یێ چاندنێ یێ بەرفرەهـ هەیە و دەشتەكا ب خێر و بێرە و هەموو د خزمەتا شۆرەشێ دا كربوون.
دگەل هندێ رێكخستنەكا ب هێز یا پارتایەتی هەبوو و رێژەیەكا زۆر ژ خەلكێ دەڤەرێ گەهشتبوونە ناڤ رێزێن شۆرەشێ و ب بوون پێشمەرگەهـ و قوربانی بۆ دۆزا گەلێ خۆ داینە و دەربەدەر ژی بووینە و ژبەر ڤی رۆلێ خەلكێ ل ڤێ دەڤەرێ د بزاڤا ئازادیخوازا كوردستانێ و ب تایبەت ل شۆرەشا ئەیلولا مەزن ئێزدیان رۆلەكێ سەرەكی هەبوو ب هاریكاری و پشتەڤانیا پێشمەرگەهی و دەرگەهێ خانیێن خۆ بۆ پێشمەرگەهی ڤەدكرن و ئەرزاق و بەردەوام مالێن خۆ د خزمەتا شۆرەشێ داكربوون و خۆ ب كوردێن رەسەن دانە زانین، ئەڤە ژی بۆ وێ چەندێ ڤەدگەریت ئێزدیان باوەریەكا مەزن ب رێبازا پارتی و بارزانی دئینان، ژبەركو شۆرەشێ و بارزانی رێزگرتن ل ئێزدیان و هەر پێكهاتەیەكا ل كوردستانێ هەی دگرت، ڤێ چەندێ ژی باوەری بۆ ئێزدیان دروست دكر جارەكا دی تێكەلی شۆرەشێ بن و خۆ ل ئاخ و وەلاتی بكەنە خودان پشتی ڤەقەتیانەكا درێژ دناڤبەرا ئێزدیان و جڤاكێ دۆرماندۆر دروست بووی ژ ئەنجامێن وان فرمانێن هاتین سەرێ ئێزدیان بۆ جارا ئێكێ ل شۆرەشا ئەیلولا مەزن ئێزدیان جارەكا دی باوەری دان خۆ و ئازاد و سەربەست بژین وەك هاولاتیێن پلە ئێك ل كوردستانێ، لەوا میرێ ئێزدیان و بابا شێخ و چەندین مەزن و كەسایەتیێن جڤاكێ ئێزدیان ب هەموو تەخ و چینێن خۆڤە گەهشتن شۆرەشا ئەیلولا مەزن و داخواز ژ مللەتی كرن چەكێ شەرەفێ هەلگرن دژی ستەم و زۆرداریا بەعسیا و داگیركەرا راوەستن و بەرەڤانیێ ژ كوردستانێ بكن، ژبەر ڤی هەلویستێ ئێزدیان پشتی نەكسا سالا (1975)ێ و شۆرەشا كوردی شكەستی ژ ئەنجامێن ئەو خیانەتا هاتیەكرن كو عێراقێ نیڤ ئاڤا رووبارێ ئەرەبی (شەت العرب)دا ئیرانێ بەرامبەر شكەستنا شۆرەشا كوردی و دەستبەرداری وێ رێككەفتنا هاتیە مۆركرن ل سالا(1970)ێ دناڤبەرا سەركردایەتیا شۆرەشا ئەیلولا مەزن و دەستهەلاداریا بەعسیا، جارەكا دی ناڤچەیێن مە هاتن داگیركرن و گەلێ كورد ب گشتی هاتە دەربەدەركرن و گورزێ هەرە مەزن ب ئێزدیان كەفت و ئێكەمین پێنگاڤا بەعسیا هاڤێتی دەست ب تەعریبكرنا گوندێن ئێزدیان كرن و عەرەب ئینانە سەر گوند و ملك ئەملاكێن ئێزدیان و ئەڤ ناڤچا زەنگین ب خێر و خێرات و دەخل و دانەكێ زۆر ل ڤێ دەڤەرێ هەی رادەستی عەرەبا كرن و ئێزدی ئینانە خالا سفرێ و بندەست دكرن ل ڤێ كۆمەلگەها زۆرە مللی یا مەهەتێ ئاكنجی كرن.
لێ تشتێ من دڤیا بێژم وان سالێن بن دەستیێ ریهسپی و مەزن و ماقولێن ئێزدیان داخواز ژ بەرپرسێن بەعسیا و ب تایبەت (عزەت دوری)كرن جارەكێ سەرەدانا دەڤەرا مەهەتێ كربوو بەرسڤا وان ئەو بوو دگۆتن مافێ هەوە ئێزدیان یێ دبەریكا مەلا مستەفا (بارزانی)دا، ژبەركو دوژمنا باش دزانین ئێزدی چەند دلسۆزێن رێبازا بارزانی بوون،پشتی ئازادیا عێراقێ هەر كەس ل كوردستانێ ب مافێ خۆ شادبوون بتنێ ئێزدی و ناڤچەیێن ئێزدیان مانە هەلاویستی ب ماددەیەكی دەستوری ڤە و نەهاتن چارەسەركرن هەتا ئەڤ فرمانا شۆم یا شنگالێ و هاتنا تیرۆرستێن (داعش) ب سەرێ ئێزدیان هات و ئێزدی ژ كوك دا هاتن هەلقاندن و ژ ناڤبرن و یێ كەفتیە دەستێ تیرۆرستێن داعش و یێ دەربەدەربووی و یان كۆچبەری ئەورۆپا و وەلاتێن جیهانێ بووین و ل ڤێ ئازادیێ و خۆشیێ ئێزدی بتر ژ(70%) ل ناڤا چادر و كاڤل و كەمپا دا دژین و بێ خودان ماینە هەر كەسەك دئێت بۆ بەرژەوەندیا خۆ دربا خۆ ل ئێزدیان ددەت و پێ دەرباز دبن.
لێ پشتی ئازادیا عێراقێ تا رادەیەكی ئێزدی د ئازاد و سەربەست دژیان ل كوردستانێ و جارەكا دی ئەڤ عەرد و ملكێن ئێزدیان ڤەگەریاین ب تایبەت پشتی ئازادیا عێراقێ عەردێن خۆ د كێلان و رۆلێ خۆ دناڤ دام ودەزگەهێن حكومی و حزبی دا دیتن و خۆ ب پشتەڤانێن پارتی و بارزانی د دانە زانین و ب دەنگێن ئێزدیان دەستوورێ عێراقێ سەركەفت و هەموو هەلبژارتنا ئێزدیان رێژەیەكا زۆر بدەستخۆڤەئینان دگەل پارتی، ئەڤ چەندە ژی بوو بارگرانیەك بۆ ئێزدیان كو عەرەب جارەكا دی گورزەكێ دن ل ئێزدیان بدەن و هەموو هەولدان ناڤچەیێن ئێزدیان نەچنە سەر هەرێما كوردستانێ و هەتا نهۆ مان ڤەقەتیایی، هەردیسان ئێك ژ ئەگەرێن ڤێ فرمانا داویێ و هاتنا تیرۆرستێن داعش بۆ ناڤچەیێن ئێزدیان و ئەڤ دربا ل ئێزدیان دای ژبەر هەلویستێ ئێزدیان بوو دگەل كوردستانێ لەوا نهۆ ئێزدی دخوازن پارتی و بارزانی چاڤێ خۆ بدەن ئێزدیان،ژبەركو سەرانێن بەعسیا د گۆتن مافێ ئێزدیان یێن د بەریكا بارزانی دا نهۆ مە سێ بارزانی هەینە ئەوژی بەرێزان كاك مەسعود بارزانی و نێچیرڤان بارزانی و مەسرور بارزانی ئەڤ جار د هاوارا ئێزدیان دا بێن گەلەك باشە،ژبەركو ئێزدی خۆ ب مەغدور د بینن شنگال رەوشەكا خراب دایە و دەڤەرا شێخان ژی وەكی پێتڤی رێز ل ئێزدیان نەهاتیە گرتن باسكێ شێخا ژی گازندێن خۆ هەینە، ژبەركو هەتا نهۆ خانیێن مە نەهاتینە تاپۆكرن و مەلاكێن عەرەب یێ داخوازا عەردێن مە دكن وەكی پێتڤی رێزگرتن ل خەلكێ شۆرەشگێر ژی نەهاتیە گرتن و مافێ خۆ یێ سیاسی و ئیداری لەشكەری شاد نەبووینە.
تُتاح هذه الصورة أيضا في: کوردی