دەڤەرێن ڤەقەتیایی كوردستانیبوونا خۆ سەلماندن
مەهدی حەسەن
هیڤیا دەرئەنجامێ ڤێ سەركەفتنا مەزن یا مێژوویی و چارەنڤیساز ل كوردستانێ ب گشتی و دەڤەرێن ڤەقەتیایی و ب تایبەتی كاندیدێن كوردستانی ب سەركەفتین بووین، پێگەهێ هەرێما كوردستانێ وەكو قەوارێ سیاسی و دەستووری لسەر ئاستێ عێراقێ و هەرێمایەتی و نێڤ دەولەتی هێشتا بهێزتر بوو و پێتڤی یە شەراكەتا نیشتمانیا راستەقینە لسەر دەستهەلات و حوكمرانیا عێراقێ ب دروستاهی بێتە سەپاندن،ژلایەكێ دن ڤە، ئۆمێدەوارین پێكڤە كار بكن ژبۆ بەرژەوەندیا بلندا گەل و نیشتیمانی وەكو تیمەكا هەڤپەیمانیا كوردستانی ل پەرلەمانێ عێراقێ و د ئێكگرتی بن داكو بكارن ب هەڤڕە ماددێ(140)ێ یێ دەستووری بجهبینن و سەرجەم كێشێن هەلاویستی چارسەر بكن و ئێكلا بكن، هەر چەندە ب ڤان ئەنجامان كەركووك و شنگال و زوومار و دەشتا نەینەوا و مەخموور كوردستانیبوونا خۆ سەلماند، ئەگەر چ د داگیركری بوون و رێ ژی ل بانگەشا هەلبژارتنا ل وان دەڤەران هاتەگرتن بەلێ ب دەنگێ خۆ و بەرخودان و كوردایەتیا خۆ نامەكا دی دانە جیهانێ و داگیركەرا كو ئەڤ دەڤەرێن ب دارێ زۆرێ عەرەبێن شۆفێنی و هێزێن بیانی خۆ سەپاندین لسەر نەخاسمە ل شنگالێ د ڤان هەلبژارتنان دا دیار بوو كو هەر سێ كاندیدێن پارتی ل بازنێ شنگالێ سەركەفتن، ئەڤە ژی باشترین بەلگەیە كو شنگال كوردستانی یە و رێ بدەن خەلكێ مە ڤەگەرنە سەر حال و مالێن خۆ و خەلكێ بیانی چۆل كن داكو د شنگالێ دا ئاشتی و تەناهی بەرقرار بت، تشتێ سەیر د ڤان هەلبژارتنان دا هندەك حزبا چ بەرنامە و دیتن بۆ ڤان هەلبژارتنا نەبوون و بتنێ بەرنامێ وان یێ هەلبژارتنان لسەر بنگەهێ دژایەتیكرنا پارتی دیموكراتی كوردستان هاتبوو داڕشتن و تووشی شكەستنێ بوون،ژبەركو لیستا بێ بەرنامە هەژی سەركەفتنێ نینە، ژبەركو پارتی ئەڤە(75)سالە خەباتێ دكت نە ژبۆ مووچەكی و مولكەكی و ژین و ژیارەكا خۆش گوزاری، بەلكو ژبۆ رزگاركرنا كوردستانێ و ئازادیا مرۆڤێ كوردستانێ بوویە،رێیا سەخت و دژوار پارتی یا هەلبژارتی ژبۆ گەل و وەلاتی بێشك ل تەنگاڤیا دێ مللەت لگەل بت، گەلێ كورد گەلەك ژیر و ئازایە پشتراست بن نا كەڤینە بن فشارا چوو دەسهەلاتێن دكتاتۆر ب فەرزكرنا ئابلوقەكێ یان برینا مووچە و بودجەیێ هەرێمێ یان گەفەكا لەشكەری،خەبات و خزمەت و قوربانیدان و خۆ شەهیدكرن و بەرخودانا گەلێ كوردستانێ ب هەموو پێكهاتێن خۆڤە بەردەوامە لەوا مللەتی دەنگێ خۆ دایە پارتی و بارزان،گەلێ كوردستانێ د ڤان هەلبژارتنان دا پەرلمانتارێن كورد یێن بەرێ ئەوێن ل بەغدا ب هەموو شیانان دژایەتیا كورد و كوردستانێ دكرن ب توندی سزادان و ریسواكرن، و دوژمنێن كوردان و پێكڤەژیانێ و ئەوێن دەستێن وان سۆر ب خوونا پێشمەرگەی دناڤ عێراقێ دا زۆر خرابی و سەرشۆر بوون و تووشی شكەستنێ بوون و ئەڤە ب خۆ ژی سەركەفتنەكا مەزن بوو د ڤان هەلبژارتنان دا بۆ گەلێ كوردستانێ، هەر چەندە هەلبژارتن د كەش و هەوایەكێ ئارام و ب كێشێن زۆر كێم ب رێڤەچوو و دەستكاری د هەلبژارتناندا نەهاتەكرن، بتنێ كێشا تەكنیكی د هندەك وێستگەهان دا بۆ دەنگدەران پەیداكرن و جارەكا دی پارتی بوو پارتا ئێكێ ل عێراقێ و بتریا كورسیان ژ هەموو پارتێن كوردستانی ئینان.
تُتاح هذه الصورة أيضا في: کوردی