سووند خوارن د جڤاكا ئێزدیان دا
حەیدەر عەرەبۆ یوسڤانی
هەر مللەتەك،دینەك،باوەرییەك،سووندا خۆ یا تایبەت هەیە هەر مللەتەك ب شێوەكی جودا سووند دخۆن هەموو دخالەكا هەڤپشك دا دگەهنە ئێك ئەو ژی ناڤێ خودێ یە، و ژ كەڤندا مللەتێ ئێزدی باوەری ب ناڤێ خودێ ئانی یە و هەر تشتەكێ سروشتی و ئاینی ب هەبوونا خودێ دزانن، و هەر ژ نژاندنا دنیایێ و چێكرنا قالبێ ئادەم پێخەمبەر و شەڤ و رۆژ و باشی و خرابی و چەندین دیاردێن دژی هەڤ ب فروارا خودێ مەزن بۆ مرۆڤی هاتینە،ئێزدیان بۆ هەر هێزەكا سروشتی خوداوەندەك ژێرا دانایە و قوربانی بۆ وان پێشكێش كرینە دا د هزرا خۆدا بێتە پاراستن،و ژ ئالیەكێ دن ڤە دێ بینن زۆر جارا ئەڤ هەموو دیاردە و هێزنە جیێ ڕێزگرتنێ و باوەریێ و ژێدەرێن ژیانێ نە و مەبەست ژێ كو سووند هاتیە ژ ترسێ یان ژ بیروباوەران یان رێزگرتنێ،چما دبێژن سووندخوار: سووند ئانكو گۆتن بۆ پشتراستكرنا تشتەكی كو مرۆڤێ بەرامبەر باوەری پێ بت و سووند پشتراستكرن بۆ راستیا ئاخفتنا و جڤاكی بخۆ وەرگرتیە بۆ بهێزكرنا سەراستكرنا ئاخفتنا خۆ وەك پێویستیەكا دەروونی بۆ هنارتنا گیانێ باوەریێ و پشتراستیێ دناڤبەرا یێ گۆهدار و ئاخفتنكەر د جڤاكی دە،سووند ژ سۆزێ هاتیە بكارئینان دبتە گەهینەرەكێ روحی دناڤبەرا ئەوێ هێزا پێ سووند دخۆن و دناڤ روحا (گیانێ) مرۆڤی دا ل گشت ئەندامێن لەشی دگەرێت وەكی خوارنێ ب رێیا خوونێ لەوما دێ بینین ل چاخێ سووند خوارنێ زمان دشكێت یان دێ مەندەهۆش بت و گیانێ وی دێ بێ شەنگ دبت یان ژی دێ بینین زۆر جارا پشتی سووندێ ئەو مرۆڤ دێ تووشی نەخۆشیا ب، سووند خوارن (سووندخوار) ئەو كەسێ سۆزێ ددەت ب تشتەكی بۆ خەلكی دبێژن ڤی كەسی سووند خوار،ئێزدیان چەندین تشتێن پیرۆز هەنە سووندێ پێ دخۆن وەك (خەرقە،بەرات،تاووس،توك، ئاگر، شیخادی،ئێزی،عەرد،ئەسمان، قوب، هتد)،و ژ بەر پیرۆزیا ڤان نیشان و ناڤێن خاسا ئێزدی سووند پێ دخۆن و باوەریەكا قایم و موكوم پێ هەیە، لێ ل دەمێ گرێدانا سۆزەكێ – هەڤبەندیەكێ دناڤبەرا دوو ئالیاندا سووندا وان ب بەراتا شیخادی یە و ل دەمێ ڤەبرینا قەلەنا و نەهێلانا دوژمناتیێ بتریا جاران بەرات تێ بكارئانین و ل هندەك جیان خەرقە ژی دبە بەدیل، د ژیانا رۆژانە دا باوەرمەندیا ئێزدیا بخودێ و تاووسی مەلەك و خاسێن خودێ و رۆژێ و ئاگری و مالا شیخادی (لالشا نورانی)یە،و فەقیرێن خەرقە سووندا وان یا سەرەكی ب خەرقەیە و دیسان جارنا ئێزدی دبێژن بسۆزا مێرێن بەرێ گەلەك جاران سووند دخۆن بنانی و دبێژن (بڤی زادی و نانێ هەنێ یێ ژێ نەخۆت نەدینە و نەئیمانە،گەلۆ باوەرمەندیا ئێزدیان ب چ سووند دخوە هەیا بتر گۆتنێن وان ببنە جیێ باوەریێ؟ د ڤی واری دا فەرمی ئێزدیاتی نەبوویە دینەكێ دەستهەلاتدار و حوكمداری بناڤێ دینی نەگێراینە دڤی سەردەمی دا و نەبوونە پشكەك ژ یاسا و بریاران یێن كو خەلكێ ئێزدی تێدا ژیان دكن،هەتا نۆكە ل دادگەهـێن عێراقا فیدرال دا چ تشت دیار نەكرینە ژبۆ ئێزدیان هەتا كو سووندا وان یا دیار بت ل قانوون و شەرعا دەولەتێ دا.
تُتاح هذه الصورة أيضا في: کوردی