د. ماجد شنگالی: پێتڤیە حكومەتا نوو یا عێراقێ رێككەفتنا ئاساییكرنا شنگالێ بجھ بینت
باسنيوز:
د. ماجد شنگالی، كاندیدێ سەركەفتی یێ پارتی دیموكراتی كوردستان ل شنگال چاڤپێكەڤتنەكێدا بۆ (باسنیوز) راگەهاند كو پێدڤیە ئیدارا شەرعی بزڤرتە شنگال وحكومەتا داهاتیا عێراقێ ل سەر بجه ئینانا رێكەفتنا ناڤبەرا حكومەتا هەرێما كوردستانێ و عیراقێدا كاربكەت بۆ ئاساییكرنا رەوشا شنگال.
(باسنیوز) چ ل سەر حكومەتا داهاتی یا عیراقێ پێدڤیە بۆ باشكرنا رەوشا شنگال ئەنجام بدەت”.
د. ماجد شنگالی: “پێدڤیە حكومەتا داهاتی یا عیراقێ كار ل سەر باشكرنا رەوشا شنگال و نەهێلانا هێزێن نەیاسایی ناڤ شنگال دا بكەت. ئەم وەكو نوونەرێن خەلكێ شنگال دێ ناڤ پەرلەمانێ عیراقێ دا كار كەین بۆ زڤرینا ئاواران وئاڤەدانیا شنگال، هەروەسا ژی پێدڤیە حكومەتا بهێت یا عیراقێ دەست بجه ئینانا رێكەفتنا دناڤبەرا حكومەتا هەرێما كوردستانێ و عیراقێ دا بكەت بۆ ئاساییكرنا رەوشا شنگال و نەهێلانا گرۆپ وهێزێن چەكدار ناڤ شنگالێ دا هەموو كار بهێنە كرن بۆ زڤرینا ئیدارا شەرعی یا شنگال ورەوشا سیاسی یا شنگال چارەسەربیت “.
(باسنیوز) گیرۆبوونا بجه ئینانا مادێ 140ێ چ زیانێ دگەهینتە دەڤەرێن كوردستانی؟
د. ماجد شنگالی: “خەلكێ مە یێ كورد ل دەڤەرێن كوردستانی یێن دەرڤەی ئیدارا هەرێما كوردستانێ تووشی زیانەكا مەزن بووینە، هەتا ژی خەلك نەشێن ڤەگەرنە سەر جهێن خۆ و كرین و فرۆتن مولكێ كوردان هێتە كرن. د خولا بهێت یا پەرلەمانێ عیراقێ دا ئەم دێ هەموو هەولا دەن مادێ 140 بجه بهێت چونكو دەمێ مادێ دەستورێ یێ 140 بجه دهێت دێ هەموو ئاریشەیێن مە چارەسەربن ودەڤەرێن كوردستانی دێ زڤرنە باوەشا هەرێما كوردستانێ، دێ خزمەتا خەلكێ مە پتر بهێتە كرن”.
(باسنیوز) هێزێن نەیاسایی دگەل حەشدا شەعبی ریگری ل زڤرینا ئیدارا شەرعی شنگال كرن، پشتی هەلبژارتنان دێ ئیدارا شەرعی زڤرتە شنگال؟
د. ماجد شنگالی: “هیزێن نەیاسایی ئێدی نەشێن ریگریێ ل زڤرینا ئیدارا شەرعی بكەن وئێدی نەشێن ئالۆزیان ل شنگال دروست بكەن چونكو بۆ هێزێن نەیاسایی روهن و ئاشكرابوو خەلكێ شنگال بتنێ پارتی دڤێت. خەلك دخوازن پارتی بزڤرتە شنگال گەلەك باشی بۆ حكومەتا عیراقێ ژی دیاربوو پارتی خودانێ شنگالێ یە هەكە جارەكا دی هێزێن نەیاسایی ریگریێ بكەن پێدڤییە حكومەتا عیراقێ بێدەنگ نەبیت ب هەر شێوەیەكێ هەبیت بەغدا كاربكەت هێزێن نەیاسایی ژناڤ شنگال دەربێخت”.
(باسنیوز) ئەو نامەیا خەلكێ شنگال ل هەلبژارتنان گەهاندی دێ بیتە ئەگەر تەناهی ل شنگال پەیدابیت؟
د. ماجد شنگالی: “ئەو نامەیا خەلكێ شنگال ل هەلبژارتنان گەهاندی دێ بیتە ئەگەر تەناهی وئاڤەدانی ل شنگال پەیدابیت چونكو خەلكێ شنگال گۆتنە هێزێن نەیاسایی مە هوون نەڤێن ، دەمێ ئەم دەستبكاربن ل پەرلەمانێ عیراقێ ب هیچ شێوەیەكێ ئەم رازی نابن هێزێن نەیاسایی ناڤ شنگالدا بن چونكو ئەڤە پتر ژ پێنج سالانە شنگال بن دەستێ هێز و گرۆپێن نەیاساییدا، وان نەشیایە تەناهی و ئاڤەدانی ل شنگال دابین بكەن نۆكە دەم هاتیە كار بهێتە كرن هێزێن نەیاسایی شنگال چۆل بكەن داكو خزمەتا خەلكێ شنگال بهێتە كرن. تەناهی وئاڤەدانی ل سەر دەستێ پارتی ل شنگال بهێتە كرن”.
تُتاح هذه الصورة أيضا في: کوردی