بۆچی خەلک حەز دکەت ناڤێن غەریب بدانیتە سەر زارۆیێن خۆ؟
گاڤ نیوز
دایک و باب ل ڤی سەردەمی دخوازن ناڤێن زارۆیێن وان جودا بن و پەنایێ دبەنە بەر ناڤێن نوی و نەیێن بەربەلاڤ و ل گۆرەی راپۆرتەکا ئاژانسا BBC ئەڤ بابەتە ل سەرتاسەری جیهانێ بەلاڤ بوویە تاکو گەهشتیە جڤاکێن پارێزگار ژی.
ئاژانسا BBC ب پشتبەستن ل سەر چەندین ڤەکۆلینێن زانستی دیار دکەت: نوکە دایک و باب حەز دکەن ناڤێن زارۆیێن وان جودا بن و نە دبەربەلاڤ بن و بۆ نموونە ل ئنگلتەرا ژ چەرخێ 13ێ تا بەری جەنگێ دویێ یێ جیهانی، بەربەلاڤترین ناڤێن کوڕان جۆن و ولیەم بوون و ل چەرخێ 17ێ سێ بەربەلاڤترین ناڤ ل ئنگلتەرا ل سەر 50٪ یا خەلکێ وێ بوون و پتریا خەلکێ ئنگلتەرا ژبەر گرێدانا وان ب ئایینی ڤە ناڤێن ئایینی ددانانە سەر زارۆیێن خۆ.
ژێدەر دیار ژی دکەت: ل وەلاتێن ئیسلامی ژی ب هەمان رەنگی بوو، ژبەر کارتێکرنا ئایینی ل سەر خەلکی، پشکەکا مەزن یا دایک و بابان ناڤێن زارۆیێن خۆ دکرنە محەمەد و ناڤێ محەمەد پێغەمبەری (س.خ) هەلدگرت، یان ژی ئێک ژ 99 ناڤێن خودای ددانانە سەر زارۆیێن خۆ یێن کوڕ و د ناڤ ناڤێن کچان ژی دا ناڤێ عائیشا و ناڤێ عائیشا دایکا موسلمانان (س.خ) هەلدگرت.
ژێدەر خۆیا ژی دکەت: ژ پشتی جەنگێ جیهانی یێ دویێ، ب تایبەت پشتی سالا 1990ێ و بەردەستبوونا ئینتەرنێتێ، ل ئەمریکا و بریتانیا و وەلاتێن دی یێن رۆژئاڤا، دایک و باب ناڤێن غەریب دداننە سەر زارۆیێن خۆ و تا ل وەلاتێن ئیسلامی ژی هەمان بابەت هەیە و پتریا دایک و بابان حەز ژ ناڤێن جودا دکەن ئەگەر ئەو ناڤ ئایینی ژی بن. بۆ نموونە ل پاکستانێ کو جڤاکەکا پارێزگار ژی هەیە، دایک و باب ناڤێن ئایینی یێن بۆ جڤاکێ وان غەریب دداننە سەر زارۆیان و ل جهێ ناڤێن کچ و کوڕێن خۆ بکەنە محەمەد یان عائیشا، ناڤێن غەریب یێن وەکی (اذان و ئایة) بکار دئینن.
BBC چەندین ئەگەر بۆ پەنابرنا دایک و بابان بۆ ناڤێن جودا دیار کرینە کو دیارترینێ وان ئەوە جڤاکێن بەرێ خەلکی پتر تێکەلی ل گەل هەڤدو هەبوو و ب کۆم دژیان، لێ جڤاکێن نوکە ب تاک دژین و تێکەلیێ گەلەک ناکەن. ئەگەرەکێ دی ئەوە کو دایک و باب نوکە هزر دکەن ئەگەر ناڤێ زارۆیێن وان ناڤەکێ غەریب بیت، دەمێ زارۆ مەزن دبیت، دێ کەساتیەکا جودا هەبیت و شێت بیتە کەسەکێ سەرکەفتی و ب ناڤودەنگ.
تُتاح هذه الصورة أيضا في: کوردی