بنگەهێ لالش باعەدرێ 80 قوتابیێن سەرکەفتی خەلاتکرن
تۆرا لالش
ل ژێر دروشمێ زانست بهێزترین چەکە ژبۆ ئاڤاکرنا وەلاتان و ب هەلکەفتا دامەزراندنا بنگەهێ لالش تایێ باعەدرێ و ل ژێر چاڤدێڕی و ئامادەبوونا ڕێڤەبەرێ ناوچه‌دارييا باعەدرێ ڕێزان میرزا بەگ ئیرۆ رۆژا پێنج شەمبوویێ رێکەفتی 11 / 7 / 2024ێ بنگەهێ لالش تایێ باعەدرێ قوتابیێن سەرکەفتی ل سەنتەرێ ناحیا باعەدرێ ل باخچێ هۆلا باعەدرێ یا بیرەوەریان خه‌لاتكرن.
ڕێ و رەسمێن خەلاتکرنێ ب رێڤەچوون ب ئامادەبوونا نوێنەرێ لقا بیست و بەرپرسێ بەشێ جەماوەری و پیشەی یا PDK بەڕێز هڤال صالح نرمو ل شێخان و جومگێن ب سەرڤە و سەرۆکێ دەستەیا بلندا بنگەهێ لالش بەڕێز (سعيد جردو) و شاندێ دگەل دا و سەرۆکێ شارەوانیا شێخان بەڕێز خالد نرمو و رێڤەبەرێ پەروەردا شێخان بەڕێز فرج عثمان و رێڤەبەرێ ساخلەمیا شێخان د. كريم كمال و بەرپرسێ دەزگەهێ خێرخوازیێ بارزانی ل شنگال شێرو سمو و نوێنەرێ ئێکەتیا مامۆستایان ل باعەدرێ و ژمارەک ژ رەوشەنبیر و کەسایەتی و ریهسپی و ئەنجومەنێ مالا میران و نوێنەرێن دام و دەزگەهێن حکومی و حزبی ل باعەدرێ و دەڤەرێ ورێڤەبەرێن قوتابخانان و بنگەهێ لالش شێخان و ن. ئێسیا و سەمیانێن قوتابیان و قوتابیێن سەرکەفتی و تەخ و پێکهاتێن جودا یێن باعەدرێ و دەڤەرێ.
پشتی چەندەکێ راوەستیان وەک رێزگرتن بۆ شەهیدێن بزاڤا ڕزگاری خوازا کوردی سەرکێشێ وان بارزانیێ نەمر و ئەدرێسێ هەمیشە زیندوو، بەرپرسێ بنگەهێ لالش باعەدرێ مامۆستا (خلات باعەدری) بخێرهاتنا گشت ئامادەبوویان کر و پیرۆزباهی ل تەڤایا قوتابیان کر و تەکەز ل سەر چەند خالێن گرنگێن پەیوەندیدار ب رەوشا زانست و قوتابیان ڤە و رۆلێ زانست و زانینێ و سالڕۆژا دامەزراندنا بنگەهێ لالش تایێ باعەدرێ ئینا زمان.
لدووڤدا رێڤەبەرێ پەروەردا شێخان بەڕێز (فرج عثمان) دپەیڤەکێ دا پیرۆزباهی ل تەڤایا قوتابیان کر و سەرکەفتنا وان ب گرنگ ل قەلەم دا، هەروەها رۆناهی ئێخستە سەر باندۆرا زانست و زانینێ دژیانا جڤاکاندا، هەروەها خۆڕاگریا مامۆستایان پێخەمەت تەمامکرنا پرۆسێسا خواندنێ ل سنورێ شێخان تەوەرەکی دیترێ پەیڤا وی بوو.
پاشی تەڤایا قوتابیێن سەرکەفتی کو ژمارا وان هەشتی قوتابی یێن سەرکەفتی ل سەر ئاستێ پۆلێن خۆ بۆ سالأ خواندنێ (2023 / 2024) ل سەنتەرێ ناحیا باعەدرێ هاتنە خەلاتکرن ب دیاریێن بنگەهێ لالش تایێ باعەدرێ و ژلایێ بەڕێزێن ئامادەبووی ڤە هاتنە پارڤەکرن دکەش و هەوایەکی بالکێش و هەبوونا گرنژین و مۆرا بلندا ئامادەبوویان.
ب ڤی ئاوایی ئەڤ هێڤاریا کێم وێنە ژ بزاڤ و چالاکییێن بنگەهێ لالش تایێ باعەدرێ ب داوی هات.
تُتاح هذه الصورة أيضا في: کوردی
